ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵜⵙⵏⵎⴰⵍⴰ ⵜⵎⵙⵎⵓⵏⵜ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵏⴰⴹⵜ ⵏ ⵟⴰⵏⵊⴰ ⵜⵉⵟⵟⴰⵡⵉⵏ ⵍⵃⵓⵙⵉⵎⴰ – ⴰⵢⵢⴰⵡ ⵍⵃⵓⵙⵉⵎⴰ -, ⵉⵛⵜ ⵏ ⵜⵙⵓⵜⵍⵜ ⵏ ⵓⵙⵎⵓⵜⵜⴳ ⴰⵙⵙ ⵏ ⵓⵙⴰⵎⴰⵙ 16 ⵏⵓⵡⴰⵏⴱⵉⵔ 2025 ⴳ ⵜⴰⴷⴷⴰⵔⵜ ⵏ ⵉⵃⵓⴷⵔⵉⵢⵢⵏ – ⵉⵎⵣⵓⵔⵏ ⵉ ⵉⵎⵃⴹⴰⵕⵏ ⴷ ⵜⵎⵃⴹⴰⵕⵉⵏ ⵏⵏⵉ ⵉⴳⴳⵓⵔⵏ ⴰⴷ ⵙⵙⵄⴷⵓⵏ ⴰⵎⵃⵉⵣⵡⴰⵔ ⵏ ⵓⵙⵍⵎⴷ (ⵜⴰⵥⵍⴰⵢⵜ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ). ⵉⴱⴷⴷ ⵅⴼ ⵡⵓⵜⵓⵢ ⵏ ⵜⵙⵓⵜⵍⵜ ⴰ, ⴰⴷⵓⴽⵜⵓⵕ ⵎⵚⵟⴰⴼⴰ ⵍⵄⵇⵇⴰⴷ ⴰⵙⵎⴰⵜⵜⴰⴳ ⵜⴰⵥⵍⴰⵢⵜ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵡⴰⵎⵎⴰⵙ ⴰⵏⵎⵏⴰⴹ ⵏ ⵜⵣⵓⵍⵍⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴳ ⵜⵎⵏⴰⴹⵜ ⵏ ⵟⴰⵏⵊⴰ ⵜⵉⵟⵟⴰⵡⵉⵏ ⵍⵃⵓⵙⵉⵎⴰ – ⴰⵢⵢⴰⵡ ⵍⵃⵓⵙⵉⵎⴰ, ⴷ ⵓⵙⵍⵎⴰⴷ ⵎⵓⵃⵎⵎⴷ ⵕⵕⴰⵛⵉⴷⵉ ⴰⵙⵍⵎⴰⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⴰⵙⵍⵎⴰⴷ ⴰⵏⵔⵣⵓⴼ ⴳ ⵡⴰⵎⵎⴰⵙ ⴰⵏⵎⵏⴰⴹ ⵏ ⵜⵣⵓⵍⵍⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴳ ⵜⵎⵏⴰⴹⵜ ⵏ ⵜⴳⵎⵎⵓⴹⵜ – ⴰⵢⵢⴰⵡ ⵏⵏⴰⴹⵓⵕ.
ⴰⵎⵓⵏ ⴳ ⵜⵙⵓⵜⵍⵜ ⴰ, ⵓⴳⴳⴰⵔ ⵏ 120 ⵏ ⵉⵎⵃⴹⴰⵕⵏ ⴷ ⵜⵎⵃⴹⴰⵕⵉⵏ.
ⵜⵙⵙⵏⵜⴰ ⵜⵙⵓⵜⵍⵜ ⴰ ⴳ ⵓⵎⵣⵡⴰⵔⵓ, ⵙ ⵜⴳⵓⵔⵉ ⵏ ⵓⵎⵖⴰⵔ ⵏ ⵜⵎⵙⵎⵓⵏⵜ. ⵙⴳ ⵙⵙⵏⵏⵉ ⵉⵙⵙⵏⵜⴰ ⵓⴷⵓⴽⵜⵓⵕ ⵎⵚⵟⴰⴼⴰ ⵍⵄⵇⵇⴰⴷ ⵜⵉⵏⴰⵡⵜ ⵏⵏⵙ ⵅⴼ “ⵜⵓⵜⵍⴰⵢⵜ ⴷ ⵓⵙⵖⵉⵡⵙ” ⵉⵙⵙⵏⴽⴷ ⵜⵉⵎⵢⴰⴷⴰⵙⵉⵏ ⴷ ⵜⵥⵉⵕⵉⵏ ⵏⵏⵉ ⵉ ⵖⴰ ⵢⴰⵡⵙⵏ ⵉ ⵉⵎⵃⴹⴰⵕⵏ ⴰⴷ ⵙⵎⵓⵜⵜⴳⵏ ⵉ ⵢⵉⵔⵉⵎ, ⵉⵙⵉⵡⵍ ⴰⵡⴷ ⵅⴼ ⴽⵔⴰ ⵏ ⵉⵍⴳⴰⵎⵏ ⵏ ⵜⵎⴰⵣⵉⵖⵜ (ⴰⵙⵙⴰⵖ, ⵜⴰⵡⵉⵏⵙⵜ…).
ⴳ ⵜⵉⵣⵉ ⵏ ⵜⴷⴳⴳⵯⴰⵜ, ⵜⴻⵜⵜⵡⴰⴳⴳ ⵉⵛⵜ ⵏ ⵜⵉⵏⴰⵡⵜ ⵅⴼ ⵜⴷⵉⴷⴰⴽⵜⵉⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⴳⴳⵉ ⵜⵜ ⵓⵙⵍⵎⴰⴷ ⵎⵓⵃⵎⵎⴷ ⵕⵕⴰⵛⵉⴷⵉ ⵉⵙⵙⵏⴽⴷ ⴳⵉⵙ ⵉⵙⵏⵎⵍⵏ ⵓⵍⵍⵖⵏ ⵉ ⵉⵔⵎⵎⵓⵙⵏ ⵏ ⵜⴷⵉⴷⴰⴽⵜⵉⵜ ⴷ ⵜⴱⵉⴷⴰⴳⵓⵊⵉⵜ, ⵙⴳ ⵙⵙⵏⵏⵉ ⵉⵎⵎⵓⵜⵜⵉ ⵖⵔ ⵓⵖⵣⴷⵉⵙ ⵓⵙⵏⵉⵙ ⵏ ⵜⴷⵉⴷⴰⴽⵜⵉⵜ ⵏ ⵜⵎⵜⵜⴰ.
ⴳ ⵓⵎⴳⴳⴰⵔⵓ ⵏ ⵜⵙⵓⵜⵍⵜ, ⴱⴹⴰⵏ ⵉⴳⵎⴰⵎⵏ ⵏ ⵜⵎⵙⵎⵓⵏⵜ ⵉⵙⵍⴽⵉⵏⵏ ⵏ ⵜⴷⵔⴰⵡⵜ ⵅⴼ ⵉⵎⴷⵔⴰⵡⵏ ⴷ ⵜⵎⴷⵔⴰⵡⵉⵏ ⴷ ⵉⵙⵍⵎⴰⴷⵏ ⵉⵙⵎⴰⵜⵜⴰⴳⵏ.
