ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵔⴰⴷ ⵉⵙⵏⵎⴰⵍⴰ ⵓⵙⴰⵔⵎ ⵏ ⵓⵙⴳⵎⵉ ⴷ ⵜⵎⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ ⴷ ⵜⵓⵜⵍⴰⵢⵉⵏ ⴳ ⵜⵉⵏⵎⵍ ⵜⴰⵏⴰⴼⵍⵍⴰⵜ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴳ ⴱⵕⵕⵛⵉⴷ ⵉⴹⴼⵕⵏ ⵉ ⵜⵙⴷⴰⵡⵉⵜ ⵍⵃⴰⵙⴰⵏ ⴰⵎⵣⵡⴰⵔⵓ ⴳ ⵙⵟⵟⴰⵜ, ⵜⵉⵏⴰⵡⵜ ⵜⴰⵎⴰⵙⵙⴰⵏⵜ ⵜⴰⵏⴰⵎⵓⵔⵜ ⵜⴰⵎⵣⵡⴰⵔⵓⵜ ⵅⴼ ⵓⵙⵏⵜⵍ: « ⴰⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⵎⵓⵜⵜⴳ ⵏ ⵉⵙⵍⵎⴰⴷⵏ ⵏⵏⵙ: ⵜⵉⵏⵥⴰⵕ ⵏ ⵓⵙⵎⵓⵜⵜⴳ ⴷ ⵉⵎⵙⵓⵔⴰⵙ ⵏ ⵓⵙⵎⴰⵢⵏⵓ ⴰⴷⵉⴷⴰⴽⵜⵉ », ⴰⵢⴰ ⴳ ⵡⵓⵙⵙⴰⵏ ⵏ 18 ⴷ 19 ⵎⴰⵢⵢⵓ 2026 ⴳ ⵓⵙⵖⵉⵎ ⵏ ⵜⵉⵏⵎⵍ ⵜⴰⵏⴰⴼⵍⵍⴰⵜ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴳ ⴱⵕⵕⵛⵉⴷ.
ⵜⴷⴷⴰ ⴷ ⵜⵉⵏⴰⵡⵜ ⴰⴷ ⴳ ⵓⵙⴰⵜⵉ ⵏ ⵜⴰⵡⵉⵜ ⵉⵜⵜⵡⴰⵔⵏⴰⵏ ⵉ ⵜⵎⵙⴰⵔⵉⵏ ⵏ ⵓⵙⵍⵎⴷ ⵏ ⵜⵓⵜⵍⴰⵢⵉⵏ ⴷ ⵓⵙⵎⵓⵜⵜⴳ ⵏ ⵉⵙⵍⵎⴰⴷⵏ, ⵍⵍⵉⵖ ⴳⴰⵏⵜ ⵙⴳ ⵜⵔⵙⴰⵍ ⵜⵉⴷⵙⵍⴰⵏⵉⵏ ⵏ ⵓⵙⵏⴰⵎ ⵏ ⵓⵏⴰⴳⵔⴰⵡ ⴰⵙⴳⵎⴰⵏ ⴷ ⵓⵙⵙⴰⵍⵉ ⵏ ⵓⵖⵓⴷⵓ ⵏ ⵉⵍⵎⵎⵓⴷⵏ, ⴷ ⵓⵍⴰ ⴳ ⵓⵎⵏⴰⴹ ⵏ ⵉⵙⵏⴼⵍⵏ ⵉⵡⵏⴳⵉⵎⵏ ⴷ ⵉⵙⴳⵎⴰⵏⵏ ⵏⵏⵉ ⴷ ⵉⵔⴰⵔⵏ ⴰⴷⴷⵓⵔ ⵉ ⵜⵓⵜⵍⴰⵢⵉⵏ ⵜⵉⵏⴰⵎⵓⵔⵉⵏ ⵍⵍⵉⵖ ⴳⴰⵏⵜ ⴰⴼⵔⴷⵉⵙ ⵏ ⵜⵎⴰⴳⵉⵜ ⵜⴰⴷⵍⵙⴰⵏⵜ ⴷ ⵉⵎⵉⵙ ⵏ ⵓⴼⴰⵔⵙ ⴰⵡⵙⵙⴰⵏ ⴷ ⵓⵎⵢⴰⵡⴰⴹ ⴰⵎⵓⵏⴰⵏ.
ⵜⵡⴰⵜⵜⵙ ⵜⴼⵓⴳⵍⴰ ⴰⴷ ⵜⴰⵎⴰⵙⵙⴰⵏⵜ, ⴰⴷ ⵜⵕⵥⵎ ⵢⴰⵏ ⵓⵎⵙⴳⴷⴰⵍ ⴰⴽⴰⴷⵉⵎⵉ ⴷ ⵓⵙⵎⵢⴰⵏⴰⵡ ⵏ ⵜⵎⵓⵣⴰⵢⵉⵏ ⴷ ⵜⵉⵔⵎⴰⵡⵉⵏ ⵅⴼ ⵜⵉⵍⴰⵡⵜ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵉⵥⵕⵉⵜⵏ ⵏ ⵓⵙⴱⵓⵖⵍⵓ ⵏⵏⵙ, ⵙ ⵓⵙⵇⵙⵉ ⵏ ⵜⵎⵙⴰⵔⵉⵏ ⵏ ⵓⵙⵖⵉⵡⵙ ⴰⵙⵏⵉⵍⵙ, ⴷ ⵓⵙⵎⵓⵜⵜⴳ ⴰⴷⵙⵍⴰⵏ ⴷ ⵓⵙⵓⵍⴰⵏ, ⴷ ⵓⵙⵍⵍⵡⵉ ⴰⴷⵉⴷⴰⴽⵜⵉ, ⴷ ⵜⵏⵥⴰⵕ ⵏ ⵓⵣⵣⵓⴳⵣ ⴰⴱⵉⴷⴰⴳⵓⵊⵉ, ⴷ ⵓⵍⴰ ⴰⵙⵎⴰⵇⵇⵍ ⵙ ⵉⵎⵏⵉⴷⵏ ⵏ ⵜⵎⵓⵟⵟⵓⵏⵜ ⴷ ⵜⴰⵜⵉⴽⵏⵓⵍⵓⵊⵉⵜ ⵏ ⵓⵙⴳⵎⵉ ⴳ ⵓⵙⵍⵎⴷ ⵏ ⵜⵎⴰⵣⵉⵖⵜ.
ⵎⴽⴷⴰ ⵜⵡⴰⵜⵜⵙ ⵜⵉⵏⴰⵡⵜ ⴰⴷ ⴰⴷ ⵜⵙⵙⵉⴽⵣ ⵉⵎⵓⴽⵔⵉⵙⵏ ⵓⵚⴽⵉⵡⵏ ⴷ ⵉⵎⵙⵙⵓⴷⵙⵏ ⴷ ⵉⴷⵉⴷⴰⴽⵜⵉⵢⵏ ⵏⵏⴰ ⵉⵜⵜⵎⵏⴰⵍⴰ ⵓⵙⴰⵡⵔ ⵏ ⵓⵙⵎⴰⵜⴰ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵜⵙⵓⵎⵔⵜ ⵏ ⵉⵔⴰⵎⴰⵙⵏ ⵓⵎⵀⵉⵍⵏ ⵉ ⵓⵙⴱⵓⵖⵍⵓ ⵏ ⵢⴰⵏ ⵓⵣⵓⵔⵜ ⵏ ⵓⵙⵎⵓⵜⵜⴳ ⵉⵎⵙⴰⵙⴰⵏ ⵉⵣⴷⴷⵉⵏ ⵏⴳⵔ ⵓⵙⵎⵓⵜⵜⴳ ⴰⵎⵙⴷⴰⵡ ⴷ ⵓⵙⵎⵓⵜⵜⴳ ⴰⵣⵣⵓⵍⴰⵏ, ⵙ ⵎⴰⴷ ⵉⵙⴽⴰⵔⵏ ⴰⵎⵢⴰⵙ ⵏⴳⵔ ⵓⵙⵕⵚⵍ ⵉⵎⵉⵥⵉⵕ ⴷ ⵜⵙⵓⴳⴰⵔ ⵜⵉⵣⵣⵓⵍⴰⵏⵉⵏ ⵜⵓⵙⵏⵉⵙⵉⵏ.
ⵢⵓⵎⴰ ⵓⵖⴰⵡⴰⵙ ⵏ ⵜⵉⵏⴰⵡⵜ ⵜⵉⵏⴰⵡⵉⵏ ⵏ ⵓⵕⵥⵥⵓⵎ ⴷ ⵜⵖⵉⵎⵉⵜⵉⵏ ⵜⵉⵎⴰⵙⵙⴰⵏⵉⵏ ⵙ ⵜⴷⵔⴰⵡⵜ ⵏ ⵜⵎⵔⵣⵓⵜⵉⵏ ⴷ ⵉⵎⵔⵣⵓⵜⵏ ⴷ ⵉⵎⵓⵣⴰⵢⵏ ⴷ ⵉⵎⵥⵍⴰⵢⵏ ⵙⴳ 22 ⵏ ⵜⵎⵔⵙⵍⵜ ⵜⵉⵎⵙⴷⴰⵡⵉⵏ ⴷ ⵜⵎⵔⵣⵓⵜⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ, ⵔⴰⴷ ⵏⴰⵡⵍⵏⵜ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⴽⵔⴰ ⵏ ⵉⵙⴰⵡⵔⵏ ⵉⵣⴷⵉⵏ ⵙ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙⴳⵉⵙⵏ: ⵉⵎⵙⵓⵔⴰⵙ ⵏ ⵓⵙⵖⵉⵡⵙ ⴷ ⵜⵏⵥⴰⵕ ⵏ ⵓⵣⵣⵓⴳⵣ, ⴰⵜⵡⴰⵍ ⵏ ⵓⵙⵎⵓⵜⵜⴳ ⴷ ⵓⵙⵖⵔⵜ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵜⴰⴷⵉⴷⴰⴽⵜⵉⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵉⵎⵙⵓⵔⴰⵙ ⵏ ⵓⵙⵎⴰⵢⵏⵓ ⴰⴱⵉⴷⴰⴳⵓⵊⵉ, ⵜⴰⵙⵎⵓⵟⵟⵓⵏⵜ ⴷ ⵜⴰⵜⵉⴽⵏⵓⵍⵓⵊⵉⵜ ⵏ ⵓⵙⴳⵎⵉ ⴳ ⵜⵏⴰⴼⵓⵜ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵓⵍⴰ ⵉⴱⵔⴷⴰⵏ ⵏ ⵓⵙⴱⵓⵖⵍⵓ ⵏ ⵉⵎⴰⵙⵙⵏ ⵏ ⵓⵣⴷⴰⵢ ⵏⴳⵔ ⵓⵙⵎⵓⵜⵜⴳ ⴰⵎⵙⴷⴰⵡ ⴷ ⵓⵙⵎⵓⵜⵜⴳ ⴰⵣⵣⵓⵍⴰⵏ, ⵙ ⵎⴰⴷ ⵉⴷⵔⵓⵏ ⴳ ⵓⵙⵖⵔⵜ ⵏ ⵜⵙⵍⵎⴰⴷⵉⵏ ⴷ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⴷⵓⵙ ⵏ ⵜⵙⵓⴳⴰⵔ ⵏⵏⵙⵏ ⵜⵉⵣⵣⵓⵍⴰⵏⵉⵏ.
ⵜⵡⴰⵜⵜⵙ ⵜⴰⵢⵎⵓⵏⵜ ⵏ ⵓⵙⵏⵎⴰⵍⴰ, ⵙⴳ ⵜⵉⵏⴰⵡⵜ ⴰⴷ, ⴰⴷ ⵜⴷⵔⵓ ⴳ ⵜⵙⵉⵍⴰⵡⵜ ⵏ ⵉⵥⵕⵉⵜⵏ ⵉⵎⴰⵙⵙⴰⵏⵏ ⴷ ⵜⵎⵢⴰⴷⴰⵙⵉⵏ ⵜⵓⵎⵀⵉⵍⵉⵏ ⵉⵥⴹⴰⵕⵏ ⴰⴷ ⵙⴱⵓⵖⵍⵓⵏⵜ ⴰⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⴰⴷ ⵙⵙⴰⵍⵉⵏⵜ ⴰⵙⵎⵓⵜⵜⴳ ⵏ ⵉⵙⵍⵎⴰⴷⵏ ⵏⵏⵙ, ⵙ ⵎⴰⴷ ⵉⵜⵜⴰⵡⵙⵏ ⴳ ⵓⵙⴷⵓⵙ ⵏ ⵜⵉⵍⵉⵜ ⵏⵏⵙ ⴷ ⵓⵙⴷⵓⵙ ⵏ ⵡⴰⵏⵙⴰ ⵏⵏⵙ ⴳ ⵓⴳⵏⵙⵓ ⵏ ⵓⵏⴰⴳⵔⴰⵡ ⴰⵙⴳⵎⴰⵏ ⴰⵏⴰⵎⵓⵔ.
