ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⴳ ⵓⵙⴰⵜⵉ ⵏ ⵓⵙⴼⵓⴳⵍⵓ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵓⵥⴰⵡⴰⵏ, ⴰⵔ ⵉⵙⵏⵓⴱⵓⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵜⴰⵎⴷⴷⵉⵜ ⵏ ⵡⴰⵙⵙ ⵏ ⵓⵙⵉⵎⵡⴰⵙ 19 ⵢⵓⵏⵢⵓ ⴳ ⵜⵙⵔⴰⴳⵜ ⵜⵉⵙ ⴽⵕⴰⴹⵜ ⵏ ⵜⴷⴳⴳⵯⴰⵜ, ⵢⴰⵜ ⵜⵎⴷⴷⵉⵜ ⵜⴰⵏⴰⵥⵓⵕⵜ ⵏⵏⴰ ⵔⴰⴷ ⵜⵙⴽⵔ ⴽⵓⵔⴰⵍ ⵏ « ⵜⴰⵎⵓⵏⵜ », ⴳ ⵢⴰⵏ ⵓⵏⵎⵓⵇⵇⴰⵔ ⴰⴷⵍⵙⴰⵏ ⴷ ⵓⵏⴰⵥⵓⵕ ⵉⵙⴼⵓⴳⵍⵓⵏ ⵙ ⵓⵖⴱⴰ ⵏ ⵜⵎⴰⴳⵉⵜ ⵜⴰⵎⴰⵣⵉⵖⵜ ⵜⴰⵎⵖⵔⵉⴱⵉⵜ, ⴷⴰⵢ ⵉⵔⴰⵔ ⴷ ⴰⵜⵉⴳ ⵉ ⵓⴽⵜⵜⴰⵢ ⵜⵎⵖⴰⵔⵜ ⵏⵏⴰ ⵉⴷⵔⴰⵏ ⴳ ⵜⴰⵙⵓⵜⵉⵏ ⴳ ⵓⵃⵟⵟⵓ ⵏ ⵡⴰⵢⴷⴰ ⴰⵎⵉⵡⴰⵏ ⴷ ⵓⵥⴰⵡⴰⵏ ⵏ ⵍⵎⵖⵔⵉⴱ.
ⵜⴳⴰ ⵜⵔⴰⴱⴱⵓⵜ ⵏ « ⵜⴰⵎⵓⵏⵜ » ⵢⴰⵜ ⵜⴳⵔⵓⵎⵎⴰ ⵜⴰⵎⵖⵔⵉⴱⵉⵜ ⵏ ⵜⵎⵖⴰⵔⵉⵏ ⵏⵏⴰ ⵉⵙⵜⵉⵏ ⴰⴷ ⵜⵙⴽⵔ ⴳ ⵓⵥⴰⵡⴰⵏ ⴰⵎⴰⵣⵉⵖ ⵜⴰⴱⵔⴰⵜ ⵜⴰⴷⵍⵙⴰⵏⵜ ⴷ ⵜⵏⴼⴳⴰⵏⵜ, ⵙ ⵜⵖⴰⵔⴰⵙⵜ ⵏ ⵓⵙⴽⴽⵉⵔ ⵏ ⵜⵣⵍⴰⵜⵉⵏ ⵉⵥⵥⵓⵏ ⴳ ⵜⴽⵜⴰⵢⵜ ⵉⵎⵓⵏⵏ, ⴰⵔ ⴷ ⵜⵙⵙⴽⵯⵜⵉ ⵉⵎⵙⵍⵉⵜⵏ ⵏ ⵜⵎⵖⴰⵔⵉⵏ ⵜⵉⵣⴰⵢⴽⵓⵜⵉⵏ, ⵀⴰ ⴰⵔ ⵜⵙⵙⴰⵡⴰⴹ ⵉⵎⴰⵏ ⵏ ⵡⴰⵢⴷⴰ ⴰⵎⴰⵣⵉⵖ ⴰⵥⵓⵕⴰⵏ ⵉ ⵜⵙⵓⵜⵉⵏ ⵜⵉⵎⴰⵢⵏⵓⵜⵉⵏ ⵙ ⵢⴰⵏ ⵢⵉⵎⴰⵏ ⴰⵜⵔⴰⵔ ⵏⵏⴰ ⵉⵏⵏⵓⵕⵣⵎⵏ.
ⴷⴰⵢ ⵜⵡⴰⵜⵜⵙ ⵜⵙⵏⵜⴰⵢⵜ ⴰⴷ ⵜⴰⵏⴰⵥⵓⵕⵜ ⴰⴷ ⵜⴷⵔⵓ ⴳ ⵓⵃⵟⵟⵓ ⵏ ⵡⴰⵢⴷⴰ ⴰⵥⴰⵡⴰⵏ ⴷ ⵓⵎⵉⵡⴰⵏ ⴰⵎⴰⵣⵉⵖ, ⴷ ⵓⵙⵙⵏⴽⴷ ⵙ ⵜⵓⴳⴳⵜ ⴷ ⵓⵎⵢⴰⵏⴰⵡ ⵏ ⵜⵓⵙⵙⵏⴰ ⵜⴰⵎⵖⵔⵉⴱⵉⵜ, ⴷ ⵓⵙⴼⴰⵡ ⵏ ⵜⵎⵍⴰⵍⵜ ⵜⵏⴰⵎⵎⴰⵙⵜ ⵏ ⵜⵎⵖⴰⵔⵜ ⴳ ⵓⵃⵟⵟⵓ ⵏ ⵡⴰⵢⴷⴰ ⴰⴷⵍⵙⴰⵏ, ⵉⴳ ⵙ ⵓⵎⴷⵢⴰⵣ ⴷ ⵓⵥⴰⵡⴰⵏ, ⵏⵖ ⵙ ⵜⵎⵍⵙⵉⵜ ⵜⴰⵏⵙⴰⵢⵜ ⴷ ⵜⵥⵕⵣⴰⵢ ⴷ ⵉⵏⴰⵡⵏ ⵉⵏⴰⵥⵓⵕⵏ ⵏⵏⴰ ⵉⵙⴽⵔⵏ ⵢⴰⵏ ⵓⴳⵣⵣⵓⵎ ⴳ ⵜⵎⴰⴳⵉⵜ ⵜⴰⵎⵖⵔⵉⴱⵉⵜ ⴳ ⵓⵎⵣⵔⵓⵢ.
ⴰⵔ ⵜⵙⵡⵓⵔⵉ ⵜⵔⴰⴱⴱⵓⵜ ⴰⵡⴷ ⵅⴼ ⵓⵙⴽⴽⵉⵔ ⴷ ⵓⵙⵙⵉⴷⴼ ⵏ ⵉⵥⵓⵕⴰⵏ ⵏ ⵉⵕⵕⵡⴰⵢⵙ ⴷ ⵜⵕⵕⴰⵢⵙⴰⵜⵉⵏ, ⴷ ⵓⵍⵎⵎⵓⴷ ⵏ ⵓⴽⵯⵢⴰⵎ ⵅⴼ ⵉⵎⵉⵙⵙ ⵏ ⵔⵔⵉⴱⴰⴱ ⵏⵏⴰ ⵉⴳⴰⵏ ⵓⵍ ⵉⵏⵜⵜⵉⵏ ⵏ ⵓⵥⴰⵡⴰⵏ ⴰⵎⴰⵣⵉⵖ, ⴷ ⵓⵙⵙⵉⵔⵡ ⵏ ⵓⵍⵎⵎⵓⴷ ⵏ ⵜⵉⵔⵔⴰ ⵙ ⵓⵙⴽⴽⵉⵍ ⵏ ⵜⴼⵉⵏⴰⵖ ⴷ ⵓⵙⵏⴼⵍⵓⵍ ⵏ ⵢⴰⵏ ⵓⵙⴰⵢⵔⴰⵔ ⵏ ⵓⵏⵎⵓⵇⵇⴰⵔ ⴳⵔ ⵜⵏⴰⵥⵓⵕⵉⵏ ⴷ ⵜⵎⴷⵢⴰⵣⵉⵏ ⴷ ⵜⵎⴰⴹⴰⵙⵉⵏ ⵏ ⵜⴽⵜⴰⵢⵜ ⵉⵎⵓⵏⵏ.
ⴰⵔ ⴷ ⵜⵜⴰⵛⴽⴰ ⵜⵎⴷⴷⵉⵜ ⴰⴷ ⵜⴰⵏⴰⵥⵓⵕⵜ ⴳ ⵓⵙⴰⵜⵉ ⵏ ⵜⴷⵉⵏⴰⵎⵉⵜ ⵜⴰⴷⵍⵙⴰⵏⵜ ⵏⵏⴰ ⵜⵙⵙⵏ ⵜⵔⴰⴱⴱⵓⵜ ⵏ « ⵜⴰⵎⵓⵏⵜ », ⵏⵏⴰ ⵉⵥⴹⴰⵕⵏ ⴳ ⵢⴰⵜ ⵜⵉⵣⵉ ⵉⴳⵣⵣⵓⵍⵏ ⴰⴷ ⵜⵙⵙⵉⴷⵔ ⵜⵉⵍⵉⵜ ⵏⵏⵙ ⴰⵎ ⵢⴰⵏ ⵓⵙⴰⵢⵔⴰⵔ ⴰⵏⴰⵥⵓⵕ ⵉⵔⴰⵏ ⴰⴷ ⵉⵙⵎⵓⵏ ⴳⵔ ⵡⴰⵢⴷⴰ ⴰⵎⴰⵣⵉⵖ ⴰⵥⵓⵕⴰⵏ ⴷ ⵜⵡⵏⵏⵉⵜⵉⵏ ⵜⵉⵏⴰⵥⵓⵕⵉⵏ ⵜⵉⵜⵔⴰⵔⵉⵏ, ⴷ ⵜⴷⵔⴰⵡⵜ ⴳ ⵓⵙⵙⵉⴷⵔ ⵏ ⵜⴽⵜⴰⵢⵜ ⵜⴰⵎⵖⵔⵉⴱⵉⵜ ⵉⵎⵓⵏⵏ ⵙ ⵜⵖⴰⵔⴰⵙⵜ ⵏ ⵜⵥⵓⵕⵉ ⴷ ⵓⵥⴰⵡⴰⵏ.
ⴰⵔ ⵜⴳⴳⴰ ⵜⵎⵙⴽⴰⵔⵜ ⴰⴷ ⴰⵡⴷ ⵢⴰⵜ ⵜⵎⵍⴷⴰ ⵏ ⵓⵙⴼⵓⴳⵍⵓ ⵙ ⵓⵥⴰⵡⴰⵏ ⴰⵎ ⵢⴰⵜ ⵜⵓⵜⵍⴰⵢⵜ ⵜⴰⵏⴼⴳⴰⵏⵜ ⵉⵎⵓⵏⵏ, ⴷ ⵢⴰⵏ ⵜⵉⵍⴳⴳⵯⵉⵜ ⵏ ⵓⵎⵙⴰⵡⴰⴹ ⵉⵏⴳⵔ ⵜⴷⵍⵙⵉⵡⵉⵏ, ⴷ ⵢⴰⵏ ⵉⵎⵉⵙⵙ ⵏ ⵓⵃⵟⵟⵓ ⵅⴼ ⵡⴰⵢⴷⴰ ⴰⵖⵔⵎⴰⵏ ⴰⵎⵖⵔⵉⴱⵉ ⵙ ⵓⵎⵢⴰⵏⴰⵡⵏ ⵏⵏⵙ, ⴳ ⵓⵎⵙⴰⵙⴰ ⴷ ⵜⴱⵔⴰⵜ ⵜⴰⴷⵍⵙⴰⵏⵜ ⵏⵏⴰ ⵉⵙⴽⴰⵔ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵣⴳ ⵉⵙⴳⴳⵯⴰⵙⵏ ⴳ ⵡⴰⵏⵏⴰⵍ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵓⵙⵙⵉⵔⵡ ⵏ ⵜⵙⵏⵜⴰⵢⵉⵏ ⵜⵉⵏⴰⵥⵓⵕⵉⵏ, ⵏⵏⴰ ⵉⵔⴰⵏ ⴰⴷ ⵜⵏⵜ ⵙⵙⵕⵇⴱⵏ, ⵀⴰ ⴰⴷ ⵜⵏⵜ ⵙⴼⴰⵡⵏ ⴳ ⵊⴰⵊ ⵏ ⵜⵎⵓⵔⵜ ⴷ ⴱⵕⵕⴰ ⵏⵏⵙ.
