ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵙⴼⵓⴳⵍⵓ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵙⵙ ⵏ ⵓⴽⵕⴰⵙ ⴳ ⵕⵕⴱⴰⵟ, ⴰⵙⴽⵜⵉ ⵡⵉⵙⵙ 22 ⵜⵓⴽⵣⵏⵜ ⵏ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ (ⵉⵥⵓ)ⵙ ⵓⵙⴽⴽⵉⵍ ⵏ ⵜⴼⵉⵏⴰⵖ, ⵙ ⵜⵉⵍⵉⵜ ⵏ ⴽⵔⴰ ⵏ ⵉⵎⵔⵣⵓⵜⵏ ⴷ ⵉⵎⵙⵜⴳⴳⴰⵔⵏ ⵏ ⵜⴷⵍⵙⴰ ⵜⴰⵎⴰⵣⵉⵖⵜ.
ⵉⴳⴰ ⵓⵏⵎⵓⵇⵇⴰⵔ ⴰⴷ, ⵏⵏⴰ ⵉⵙⵏⵎⴰⵍⴰ ⵡⴰⵎⵎⴰⵙ ⵏ ⵜⵖⵓⵔⵉⵡⵉⵏ ⵜⵉⵙⵏⵎⴰⵍⴰⵢⵉⵏ ⴷ ⵉⵏⴳⵔⴰⵡⵏ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ ⵏ ⵓⵙⵉⵏⴰⴳ ⵜⴰⵢ ⵜⵎⵍⴷⴰ ⵏ ⵓⵙⴽⵜⵉ ⵙ ⵓⴱⵔⵉⴷ ⵏⵣⵣⵉ ⵜⴽⴽⴰ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ ⴳ ⵓⵙⵡⵉⵔ ⵏ ⵓⵙⵙⴽⵛⵎ ⴳ ⵜⵉⵜⵉⵇⵏⵉⵜⵉⵏ ⵜⵉⵎⴰⵢⵏⵓⵜⵉⵏ ⵏ ⵓⵎⵢⴰⵡⴰⴹ ⴷ ⵡⵉⵢⵢⴰⴹ.
ⵉⵙⴷⴷⵉⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵎⴰⵙⵙ ⵍⵃⵓⵙⵉⵏ ⵍⵎⵓⵊⴰⵀⵉⴷ,ⵍⵍⵉⵖ ⵉⵙⴰⵡⴰⵍ ⴷⵉ ⵜⵎⵍⴷⴰ ⴰⴷ , ⵎⴰⵙ ⴰⵙⴼⵓⴳⵍⵓ ⵙ ⵓⵙⴽⵜⵉ ⴰⴷ, ⵍⵍⵉ ⵉⵜⵜⵓⵙⴽⵔⵏ ⴰⵙⵙ ⵏ 24 ⵢⵓⵏⵢⵓ ⵏ ⴽⵓ ⴰⵙⴳⴳⵯⴰⵙ, ⵉⴳⴰ ⵓⵙⵎⵖⵔ ⵏ ⵓⵎⵓⵔⵙ ⴰⵎⵣⵔⴰⵢ ⴳ ⵓⴱⵔⵉⴷ ⵏ ⵓⵙⴱⵓⵖⵍⵓ ⵏ ⵜⵎⴰⵣⵉⵖⵜ ⴷ ⵓⵙⴷⵓⵙ ⵏⵏⵙ ⴳ ⵓⵙⵡⵉⵔ ⴰⴷⵖⵔⴰⵏ ⴷ ⴰⵏⵎⵏⴰⴹ ⴷ ⴰⵖⵣⵓⵔⴰⵏ, ⴷ ⵓⵙⵎⵓⵏ ⵏ ⵜⵓⵜⵍⴰⵢⵜ ⴰⴷ ⴷ ⵓⵙⴽⴽⵉⵍ ⵏ ⵜⴼⵉⵏⴰⵖ ⴳ ⵢⵉⴳⵔ ⴰⵎⵓⵟⵟⵓⵏ.
ⵉⵙⵎⵜⵔ ⵎⴰⵙⵙ ⵍⵎⵓⵊⴰⵀⵉⴷ ⴳ ⵓⵎⵏⴰⴹ ⴰⴷ , ⵉⵙ ⴷ ⵜⴳⴰ ⵜⵢⴰⴼⵓⵜ ⴳ ⵢⵉⴳⵔ ⵏ ⵜⵙⵎⵓⵟⵟⵓⵏⵜ ⵜⴰⵎⴰⵣⵉⵖⵜ » ⵜⵖⵓⴷⴰ » , ⵉⵙⴼⴰⵡ ⵉⵙ ⴷ ⴳ ⵙⵉⵏ ⵏ ⵉⵙⴳⴳⵯⴰⵙⵏ ⵉⵣⵔⵉⵏ ⵉⵜⵜⵓⵙⴽⵔ ⵙⵍⴰⵡⴰⵏ ⴰⴽⴽⵯ ⵢⴰⵏ ⵓⵙⵎⵓⵜⵜⴳ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵓⵙⴽⴽⵉⵍ ⵏ ⵜⴼⵉⵏⴰⵖ, ⵓⵍⴰ ⵢⴰⵜ ⵜⵔⴰⴱⴱⵓⵜ ⵏ ⵉⴼⴰⵔⵙⵏ ⵉⵎⵓⵟⵟⵓⵏ ⵉ ⵓⵙⵍⵎⴷ ⵏ ⵜⵓⵜⵍⴰⵢⵜ ⴰⴷ ⴷ ⵓⵙⴰⵙⴼⵔ ⵏⵏⵙ ⵙ ⵉⵎⵉⵙⵏ, ⵓⵍⴰ ⵉⵙⵎⵓⵜⵜⴳⵏ ⵉⵅⵚⵚⴰⵏ ⴰⴷ ⵜⵜⵓⵙⴽⴰⵔⵏ ⴳ ⵉⴳⵔ ⵏ ⵓⵙⵙⵍⵎⴷ ⴷ ⵜⵎⵔⵙⴰⵍⵉⵏ ⵜⵉⴳⴷⵓⴷⴰⵏⵉⵏ ⴷ ⵜⴼⵉⵍⵉⵏ ⵏ ⵓⴱⵔⵉⴷ.
ⴳ ⵜⵙⴳⴰ ⵏⵏⵙ, ⵜⵏⵏⴰ ⵜⵏⵎⵀⴰⵍⵜ ⵏ ⵡⴰⵎⵎⴰⵙ ⵏ ⵜⵖⵓⵔⵉⵡⵉⵏ ⵏ ⵜⵉⵙⵏⵎⴰⵍⴰⵢⵉⵏ ⴷ ⵉⵏⴳⵔⴰⵡⵏ ⵏ ⵜⵏⵖⵎⴰⵙⵜ ⴷ ⵓⵎⵢⴰⵡⴰⴹ, ⵙⵉⵀⴰⵎ ⴱⵓⵍⵇⵏⴰⴷⵍ, ⵎⴰⵙ ⵉⴳⴰ ⵓⵙⵎⵖⵔ ⵏ « ⵉⵥⵓ » ⵙ ⵓⵙⴽⴽⵉⵍ ⵏ ⵜⴼⵉⵏⴰⵖ ⵢⴰⵏ ⵓⵎⵓⵙⵙⵓ ⴰⵅⴰⵜⴰⵔ ⴳ ⵓⵙⴽⵛⵎ ⵏ ⵜⵎⴰⵣⵉⵖⵜ ⴳ ⵉⴳⵔ ⴰⵎⵓⵟⵟⵓⵏ, ⵜⵙⵓⵍ ⵜⵏⵏⴰ ⵎⴰⵙ ⵜⵍⵍⴰ ⵜⵓⵜⵍⴰⵢⵜ ⴰⴷ ⴷ ⵉⵇⵇⴰⵏ ⴰⴷ ⵜⴹⴼⵕ ⵉⵙⵏⴼⵍⵏ ⵍⵍⵉ ⵢⵍⵍⴰⵏ ⴳ ⵉⴳⵔ ⴰⴷ, ⵙⵍⴰⵡⴰⵏ ⴰⴽⴽⵯ ⴳ ⵎⴰⴷ ⵉⵥⵍⵉⵏ ⵙ ⵉⵙⵎⴰⵢⵏⵓⵜⵏ ⵏ ⵜⵖⵉⵙⵜ ⵜⴰⵙⵎⴳⵓⵔⵜ.
ⵜⵏⵏⴰ ⴱⵓⵍⵇⵏⴰⴷⵍ ⵎⴰⵙ ⵓⵙⵉⵏⴰⴳ ⵢⵓⴷⴼ ⴳ ⵉⵙⵏⵜⴰⵢⵏ ⴳ ⵓⵙⴰⵜⵉ ⴰⴷ ⵜⴰⴼ ⴰⴷ ⵢⵉⵍⵉ ⵓⵙⵏⴼⵍ ⵏ ⵜⵉⵔⵔⴰ ⵖⵔ ⵉⵎⵙⵍⵉ ⴷ ⵓⵙⵍⵎⴷ ⴷ ⵓⵍⵎⵎⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵡⵉⵢⵢⴰⴹ.
ⵉⵖⵓⴷⴰ ⵓⵙⴼⵓⴳⵍⵓ ⴰⴷ ⵙ ⵜⴽⵛⵛⵓⵎⵜ ⵉ ⵎⵓⵃⵎⵎⴷ ⵅⴰⵍⵉⵍ, ⵎⴰⵙⵙ ⴳ ⵜⵙⴷⴷⴰⵡⵉⵜ ⵏ ⵜⵉⵎⴰⵙⵙⴰⵏⵉⵏ ⴷ ⵜⵉⵜⵉⵇⵏⵉⵜⵉⵏ ⵉⴹⴼⵓⵕⵏ ⵉ ⵜⵙⴷⴷⴰⵡⵉⵜ ⵏ ⵍⵃⴰⵙⴰⵏ ⵡⵉⵙⵙ ⵙⵉⵏ ⵅⴼ ⵜⵖⵉⵙⵜ ⵜⴰⵙⵎⴳⵓⵔⵜ ⴷ ⵜⵎⴰⵎⴽⵉⵏ ⵏ ⵓⵙⵎⵔⵙ ⵏⵏⵙ ⵉ ⵓⵙⴱⵓⵖⵍⵓ ⵏ ⵜⵏⵓⴼⴰ ⵜⵉⵎⵓⵟⵟⵓⵏⵉⵏ ⴷ ⴰⵔⵣⵣⵓ ⴰⵎⴰⵙⵙⴰⵏ.
ⴰⵙⴼⵓⴳⵍⵓ ⵏ ⵓⵙⴽⵜⵉ ⴰⴷ, ⵢⵓⴷⴼ ⴳ ⵓⵙⵓⵜⵍ ⵉⵙⵙⵉⴷⴻⴷⵏ ⵉⴷ ⴰⵚⴽⵓ ⵏ ⵉⵏⴳⵔⴰⵡⵏ ⵉⵎⵉⵖⵉⵙⵏⵉⵜⵔⴰⵔⵏ, ⵓⵔ ⴷⴰ ⵉⴱⵟⵟⵓ ⴷ ⵜⵉⵔⵙⴰⵍ ⵏ ⵓⵙⵎⵓⵏ ⵏⵏⴰ ⵅⴼ ⴱⴷⴷⴰⵏⵜ ⵜⵓⵜⵍⴰⵢⵉⵏ ⵉⵜⵜⵢⴰⵔⴰⵏ ⴷ ⴰⵙⵉⵍⵢ ⵏ ⵉⵎⴰⵍ ⴳ ⵉⴳⵔ ⵏ ⵜⵉⵖⵉⵙⵜ ⵜⴰⵙⵎⴳⵓⵔⵜ, ⵉⵜⵜⵡⴰⴽⵔⴼ ⵙ ⵜⴷⵓⵙⵉ ⵏ ⵜⵓⵚⴽⵉⵡⵜ ⵜⵉⵎⵓⵟⵟⵓⵏⵉⵏ ⵏⵏⴰ ⵉⵖⵎⵙⵏ ⵉ ⵓⵎⵢⴰⵏⴰⵡ ⴰⵙⵏⵉⵍⵙ, ⵏⵏⴰ ⵜ ⵉⵙⵙⵉⴷⵉⴼⵏ ⴳ ⵉⵏⴳⵔⴰⵡⵏ ⵉⴳⵔⴰⵖⵍⴰⵏⵏ ⵉⵜⵉⵇⵏⵉⵜⵏ.
