ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵏⵏⵓⵕⵥⵎⵏⵜ, ⴰⵙⵙ ⵏ ⵓⵙⵉⵏⴰⵙ ⴳ ⵎⵕⵕⴰⴽⵛ, ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙ 93 ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵍⴱⵓⵍⵉⵙ ⴰⵣⵏⵉⵔ (ⴰⵏⵜⵉⵕⴱⵓⵍ), ⵙ ⵜⴷⵔⴰⵡⵜ ⵏ ⵉⵎⴰⵙⴰⵢⵏ ⵏ ⵓⵙⵡⵉⵔ ⵢⴰⵜⵜⵓⵢⵏ, ⴷ ⵉⵏⵙⵙⵉⵅⴼⵏ ⵏ ⵍⴱⵓⵍⵉⵙ ⵙⴳ ⵉⵡⴰⵏⴽⵏ ⵏ 196 ⵏ ⵓⴳⵎⴰⵎ ⴳ ⵜⵎⴰⴷⴷⴰⵙⵜ.
ⵜⵥⵍⵉ ⵜⵖⵉⵎⵉⵜ ⵏ ⵓⵏⵏⵓⵕⵥⵎ ⵙ ⵙⵏⴰⵜ ⵜⴳⵓⵔⵉⵡⵉⵏ ⵏ ⴽⵓ ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵓⵎⴰⵜⵔ ⵏ ⵓⴱⵔⵉⴷ ⴰⵏⴰⵎⵓⵔ, ⵄⴱⴷⵍⵍⴰⵟⵉⴼ ⵍⵃⵎⵎⵓⵛⵉ, ⴷ ⵓⵏⵙⵙⵉⵅⴼ ⵏ ⵓⵏⵜⵉⵕⴱⵓⵍ, ⴰⵊⵉⵏⵉⵕⴰⵍ ⴰⵃⵎⴰⴷ ⵏⴰⵚⵉⵕ ⵔⵔⵉⵙⵉ.
ⵎⴽⵍⵍⵉ ⵜⵥⵕⴰ ⵜⵉⵍⵉⵜ, ⵙ ⵜⵓⵥⵍⴰⵢⵜ, ⵏ ⵓⵎⴰⵡⵙⴰⵙ ⵏ ⵓⴳⵏⵙⵓ, ⵄⴱⴷⵍⵡⴰⴼⵉ ⵍⴼⵜⵉⵜ, ⴷ ⵓⵏⵙⵙⵉⵅⴼ ⴰⵎⵣⵡⴰⵔⵓ ⵏ ⵜⵙⵏⴱⴹⴰⵢⵜ ⵏ ⵜⵕⵓⵥⵉ ⴰⵏⵙⵙⵉⵅⴼ ⴰⵎⴰⵔⵉ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵓⵏⴱⴰⴹ ⴰⵏⵣⵔⴰⴼ, ⵎⴰⵃⵎⵎⴰⴷ ⵄⴱⴷⵏⵏⴰⴱⴰⵡⵉ, ⴷ ⵓⴳⵏⵙⴰⵙ ⴰⵎⴰⵜⴰⵢ ⵏ ⵓⴳⵍⵍⵉⴷ ⵖⵔ ⵜⵙⵏⴱⴹⴰⵢⵜ ⵏ ⵜⵕⵓⵥⵉ, ⴰⵏⵙⵙⵉⵅⴼ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ, ⵀⵉⵛⴰⵎ ⴱⴰⵍⴰⵡⵉ, ⴷ ⵓⵏⵙⵙⵉⵅⴼ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⴰⴱⵉⵢⵏ ⵣⴷⵖⵏⵉⵏ ⴳ ⵜⵎⵉⵣⴰⵔ ⵏ ⴱⵕⵕⴰ, ⵏⴰⵚⵉⵕ ⴱⵓⵕⵉⵟⴰ, ⴷ ⵓⵎⴰⵡⵙⴰⵙ ⴰⵎⴰⵔⵉ ⵖⵔ ⵜⵎⴰⵡⵙⴰⵙⵜ ⵏ ⵜⴷⵎⵙⴰ ⴷ ⵜⵥⵕⴼⵜ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⴰⵙⵜⵍⵜ, ⴼⴰⵡⵣⵉ ⵍⵇⵊⵄ, ⴷ ⵓⵊⵉⵏⵉⵕⴰⵍ ⴰⵙⵔⴷⴰⵙ ⵎⵓⵃⵎⵎⴰⴷ ⵀⴰⵔⵎⵓ, ⴰⵎⴰⵡⴰⵢ ⵏ ⵜⵊⴹⵕⵎⵜ ⵜⴰⴳⵍⴷⴰⵏⵜ, ⴷ ⵢⴰⵙⵉⵏ ⵍⵎⵏⵚⵓⵕⵉ ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵣⵔⴰⵡⵉⵏ ⴷ ⵓⵏⵜⴰⵎ, ⴷ ⵓⵏⵖⵍⴰⴼ ⴰⵎⴰⵜⴰⵢ ⵏ ⵜⵎⵙⵙⵓⴳⵓⵔⵜ ⵏ ⵉⵙⵖⵣⵓⵜⵏ ⴷ ⵡⴰⵍⴰⵙ ⵏ ⵓⵙⵉⴷⴼ, ⵎⵓⵃⵎⵎⴰⴷ ⵚⴰⵍⵃ ⵜⵜⴰⵎⴽ, ⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵏⵜⵉⵕⴱⵓⵍ, ⴼⴰⵍⴷⵉⵙⵉ ⵓⵔⴽⵉⵣⴰ, ⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ ⵏ ⵓⴳⵏⵙⵓ ⴰⵄⵕⴰⴱⵏ, ⵎⵓⵃⴰⵎⵎⴰⴷ ⴱⵏ ⵄⴰⵍⵉ ⴽⵓⵎⴰⵏ ⴷ ⵄⴱⴷⵍⵎⵊⵉⴷ ⴱⵏ ⵄⴰⴱⴷⵓⵍⵍⴰⵀ ⵍⴱⴰⵏⵢⴰⵏ, ⴰⵏⵙⵙⵉⵅⴼ ⵏ ⵜⵙⴷⴰⵡⵉⵜ ⵏ ⵏⴰⵢⴼ ⵜⴰⵄⵕⴰⴱⵜ ⵉ ⵜⵎⴰⵙⵙⴰⵏⵉⵏ ⵜⵉⵏⴼⵔⵓⵜⵉⵏ.
ⴳ ⵜⵖⵉⵎⵉⵜ ⴰⴷ, ⵉⵜⵜⵓⵙⴽⴰⵔ ⵓⴼⵙⵔ ⵏ ⵢⴰⵏ ⵓⴼⵉⴷⵢⵓ ⵅⴼ ⵜⵣⵣⵉⴳⵣⵜ ⵏ ⵜⵎⵔⵙⵍⵜ ⵏ ⵍⴱⵓⵍⵉⵙ ⵏ ⵍⵎⵖⵔⵉⴱ ⴷ ⵜⵏⵓⴼⴰ ⵏⵏⵙ.
ⵉⴳⴰ ⵓⴳⵔⴰⵡ ⴰⵎⴰⵜⴰⵢ, ⴰⴳⵔⴰⵡ ⴰⵎⵙⵙⵓⴳⵓⵔ ⴰⵏⴰⴼⵍⵍⴰ ⵏ ⵓⵏⵜⵉⵕⴱⵓⵍ ⴷ ⵢⴰⵏ ⵙⴳ ⵉⵏⵎⵓⵇⵇⴰⵔⵏ ⵉⵎⴰⴹⵍⴰⵏⵏ ⵏ ⵉⵙⵍⵡⴰⵢⵏ ⵏ ⵓⵏⴳⵔⴰⵡ ⵏ ⵓⵣⵣⴳⵉⵔ ⵏ ⵓⵙⵍⴳⵏ, ⵢⴰⵜ ⵜⵎⵍⴷⴰ ⵏ ⵉⵡⴰⵏⴽⵏ ⵉⴳⵎⴰⵎⵏ ⵏ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏⵏⵙⵏ ⴷ ⵓⴱⵟⵟⵓ ⵏ ⵜⵎⵓⵣⴰⵢⵉⵏ ⵏⵏⵙⵏ.
ⴰⵔ ⵉⵎⵎⴰⵎ ⵓⵙⵜⴰⵢ ⵏ ⵍⵎⵖⵔⵉⴱ ⵉ ⵓⵙⵏⴱⴳⵉ ⵏ ⵜⵎⵙⴰⵔⵜ ⴰⴷ ⵜⴰⴳⵔⴰⵖⵍⴰⵏⵜ ⴰⵎⴰⵥⴰⵢ, ⴰⴷⵖⴰⵔ ⵢⴰⵜⵜⵓⵢⵏ ⴷ ⵜⵡⵍⴰⴼⵜ ⵉⵥⵍⵉⵏ ⵏⵏⴰ ⵉⵍⵍⴰⵏ ⴷⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ, ⴷⴷⵓ ⵜⵏⴰⵔⴰ ⵜⵉⵎⵉⵖⵉⵙⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ, ⴷ ⵓⵖⵣⴰⵏ ⴷ ⵜⴼⵍⵙⵜ ⵉⵅⴰⵜⵔⵏ ⵏⵏⴰ ⵉⵍⵍⴰⵏ ⴷⴰⵔ ⵜⵎⵔⵙⴰⵍ ⵜⵉⵏⴼⵔⵓⵜⵉⵏ ⵜⵉⵎⵖⵔⴰⴱⵉⵢⵉⵏ ⴷ ⵜⵎⵓⵣⴰⵢⵜ ⵏⵏⵙⵏⵜ ⴳ ⵓⵙⴱⴷⴷⵉ ⵏ ⵓⴱⵔⵙⵉⵡⴷ ⴷ ⵓⴱⴽⴽⵉⴹ ⵉⵏⵎⴰⵍⴰⵏ ⵢⵓⵜⵉⵏ ⵉⵡⵜⵜⴰ.
ⴰⵔ ⵉⵜⵜⵎⴹⴰⴽⴰⵕ ⵓⴳⵔⴰⵡ ⴰⵎⴰⵜⴰⵢ ⵏ ⵓⵏⵜⵉⵕⴱⵓⵍ ⴽⵓ ⴰⵙⴳⴳⵯⴰⵙ ⵅⴼ ⵉⵙⵡⴰⵍⴰⵜⵏ ⵅⴰⵜⵔⵏⵉⵏ ⴳ ⵢⵉⴳⵔ ⵏ ⵓⴱⴽⴽⵉⴹ ⴷ ⵉⵙⴷⵉⴷⴷⵉⵢⵏ ⵉⵏⴼⵔⵓⵜⵏ ⵙⴳ ⵓⵎⴰⴹⴰⵍ. ⵔⴰⴷ ⵜⵔⵣⵓ ⵜⵙⵓⵜⵍⵜ ⴰⴷ ⵅⴼ ⵜⵓⴳⵜⵜ ⵏ ⵜⵎⵙⴰⵔⵉⵏ, ⴳ ⵏⵉⵜ ⵜⵍⵍⴰ ⵜⵓⴽⵣⴰ ⵏ ⵉⵥⴹⵡⴰⵏ ⵏ ⵓⴱⴽⴽⵉⴹ ⵉⵏⵎⴰⵍⴰⵏ ⵢⵓⵜⵉⵏ ⵉⵡⵜⵜⴰ ⴷ ⵓⵙⴼⵔⵓⵔⵉ ⵏⵏⵙ, ⴷ ⵓⵙⴱⴷⴷⵉ ⵏ ⵡⴰⵎⵎⴰⵙⵏ ⵏ ⵓⵖⵏⴷⴼ ⵢⵓⵜⵉⵏ ⵉⵡⵜⵜⴰ, ⴷ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵍⴱⵓⵍⵉⵙ ⴰⵎⴰⴹⵍⴰⵏ ⵏ ⵓⵏⵜⵉⵕⴱⵓⵍ, ⴷ ⵓⵙⴷⵓⵙ ⵏ ⵓⴷⵖⴰⵔ ⵏ ⵜⵎⵖⴰⵔⵜ ⴳ ⵜⵡⵓⵔⵉ ⵏ ⵍⴱⵓⵍⵉⵙ.
ⵎⴽⵍⵍⵉ ⵢⵓⵎⴰ ⵓⵖⴰⵡⴰⵙ ⵏ ⵜⵡⵓⵔⵉ ⵜⴰⵣⵔⴰⵡⵜ ⵏ ⵜⵢⴰⴼⵓⵜⵉⵏ ⵏ ⵓⵙⵖⵏⵓ ⴰⵏⴰⵔⴰⵎ ⵏ » ⵜⵥⵕⵉⴳⵜ ⵏ ⵓⵥⵕⴼ » ⴷ ⵡⴰⵏⵏⴰⵍ ⵏ ⵜⵉⴽⵍⵉ ⵏ ⵓⵙⵖⵣⵏ ⵏ ⵜⵎⵢⴰⵇⵇⴰⵏⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵓⵙⴱⴷⴷⵉ ⵏ ⵓⴱⴽⴽⵉⴹ ⴰⵙⵉⴱⵉⵕⴰⵏⵉ.
ⵉⵣⵎⵔ ⴰⴷ ⵜⵙⵜⵉ ⵜⵙⵓⵜⵍⵜ, ⵏⵏⴰ ⵉⵙⵓⵍⵏ ⴰⵔ 27 ⵏⵓⵡⴰⵏⴱⵉⵔ ⴰⴷ, ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵜⴰⵎⵣⵣⴳⴰⵔⵜ ⵜⴰⵎⴰⵢⵏⵓⵜ, (ⴰⴳⵔⴰⵡ ⵏⵏⴰ ⵉⵥⵍⴰⵢⵏ ⵉⵙⵡⴰⵍⴰⵜⵏ ⵏ ⵜⵎⴰⴷⴷⴰⵙⵜ ⴳⵔ ⵜⵙⵓⵜⴰⵍ), ⴳ ⵏⵉⵜ ⵉⵍⵍⴰ ⵓⵙⵜⴰⵢ ⵏ ⵓⵏⵙⵙⵉⵅⴼ ⴰⵎⴰⵢⵏⵓ ⴹⴰⵕⵜ ⵏ ⵓⵙⵎⴰⴷ ⵏ ⵜⵉⵣⵉ ⵏ ⵜⵡⴽⴰⵍⵜ.
ⴰⵔ ⵉⵜⵜⵡⴰⵍⴰ ⵓⴳⵔⴰⵡ ⴰⵎⴰⵜⴰⵢ ⵉⵎⵉⵥ ⵏ ⵜⵖⵜⴰⵙⵉⵏ ⵜⵉⴷⵙⵍⴰⵏⵉⵏ ⵥⵍⵉⵏⵉⵏ ⵙ ⵜⵙⵔⵜⴰⵢ ⵜⵉⵎⴰⵜⴰⵢⵉⵏ, ⴷ ⵉⵙⵓⴳⴰⵎ ⵉⵜⵜⵓⵥⵍⴰⵢⵏ ⵙ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ, ⴷ ⵜⴱⵔⵉⴷⵉⵏ ⵏ ⵜⵡⵓⵔⵉ, ⴷ ⵜⵥⵕⴼⵜ, ⴷ ⵉⵖⴰⵡⴰⵙⵏ ⵏ ⵉⵎⵓⵙⵙⵓⵜⵏ, ⵓⵢⴰ ⴳ ⵜⵡⵉⵍⴰ ⵏ ⵜⵖⵜⴰⵙⵉⵏ.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ
