ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵜⵜⵢⴰⵡⵙⴽⴰⵔ ⴳ ⵡⴰⵏⵙⴰ ⴰⴳⴰⵎⴰⵏ ⵜⴰⵎⴷⴰ ⵏ ⵄⵓⵡⵡⴰ ⴷⵉ ⵜⵎⵏⴰⴹⵜ ⵏ ⵉⴼⵔⴰⵏ, ⵜⵉⴳⵉⵔⴰ ⵏ ⵉⵎⴰⵍⴰⵙⵙ ⴰ, ⵢⴰⵏ ⵓⵎⵓⵙⵙⵓ ⴰⴷⵍⵙⴰⵏ ⴷ ⵡⵉⵏ ⵜⵥⵓⵕⵉ ⵙⴼⵓⴳⵍⴰⵏ ⴳⵉⵙ ⵙ ⵡⴰⵢⴷⴰ ⴰⵎⴰⵣⵉⵖ ⴰⵇⴱⵓⵔ, ⵜⵜⵓⵔⴰⵔⵏ ⴳⵉⵙ ⵉⵖⵏⵏⵉⵊⵏ ⴷ ⵉⵣⵍⴰⵏ ⵉⵇⴱⵓⵔⵏ ⵏ ⵡⴰⵟⵍⴰⵚ ⴰⵏⴰⵎⵎⴰⵙ.
ⴷⵔⴰⵏⵜ ⵜⵓⴳⵜ ⵏ ⵜⵔⵓⴱⴱⴰ ⵜⵉⴷⵖⵔⴰⵏⵉⵏ ⵏ ⵜⵥⵓⵕⵉ ⴳ ⵓⵎⵓⵙⵙⵓ ⴰⴷ ⴰⵙⴳⴳⵯⵙⴰⵏ, ⵉⵏⵎⴰⵍⴰⵏ ⵙ ⵜⵙⵏⵜⴰⵢⵜ ⵏ ⵜⵎⵙⵎⵓⵏⵜ ⵏ « ⵉⵙⴰⴼⴼⵏ ⵏ ⵓⴷⵔⴰⵔ ⵉ ⵜⴷⵍⵙⴰ ⴷ ⵜⴳⵎⵉ » ⴷⴷⴰⵡ ⵜⵎⴰⵜⴰⵔⵜ ⵏ » ⵉⵖⵏⵏⵉⵊⵏ ⴷ ⵡⴰⵏⵢⴰⵜⵏ ⵣⴳ ⵓⴳⵯⵎⵎⴰⴹ ⵏⵏⵖ », ⵓⵙⴰⵏⵜ ⴷ ⵃⵎⴰ ⴰⴷ ⴷ ⵙⵙⴰⴳⴳⵯⵏⵜ ⵜⴰⵢⴰⵡⴰⵏⵜ ⴷ ⵓⵎⵢⴰⵏⴰⵡ ⵏ ⵡⴰⵢⴷⴰ ⵏ ⵓⵥⴰⵡⴰⵏ ⴰⵎⴰⵣⵉⵖ.
ⵢⵓⵎⴰ ⵓⵖⴰⵡⴰⵙ ⵉⴼⵙⴰⵔⵏ ⵎⵢⴰⵏⴰⵡⵏⵉⵏ ⵏ ⵜⵥⵓⵕⵉ ⵙⵙⵎⵏⵉⴷⵏⵜ ⵜⵏ ⵜⵔⵓⴱⴱⴰ ⵏ « ⴰⵢⵜ ⴱⵓⵢⵊⴳⵔⴰ » ⴷ « ⵉⵊⴷⴻⴷⴷⴰⵏ » ⴷ « ⵍⵀⴱⴰⵍ ⵉⴼⵔⴰⵏ », ⴷ « ⵃⴷⴷⵓ ⴷ ⵄⵓⵎⴰⵕ », ⵙⵎⵓⵏⵏ ⴳⵉⵙ ⴳ ⵢⴰⵜ ⵜⵎⵥⵕⵉⵜ ⵏ ⵜⵥⵓⵕⵉ ⴳⵔ ⵓⵃⵉⴷⵓⵙ ⴷ ⵓⵎⴰⵔⴳ ⴰⵎⴰⵣⵉⵖ, ⴷ ⵡⴰⵏⵢⴰⵜⵏ ⵉⵇⴱⵓⵔⵏ ⵏ ⵖⴰⴷ ⵉⵣⵔⵉⵏ.
ⵖⵉⴽⵍⵍⵉ ⵏⵏⴰⵏ ⵉⵎⵙⵓⴷⴰⵙ ⵏ ⵓⵍⵎⵓⵇⴰⵔ ⴰⴷ, ⵎⴰⵙ ⵉⴳⴰ ⵓⵎⵓⵙⵙⵓ ⴰⴷ ⵢⴰⵏ ⵓⵙⴰⵢⵔⴰⵔ ⴰⴼⴰⴷ ⴰⴷ ⵢⵉⵍⵉ ⵡⴰⵜⵉⴳ ⵉ ⵡⴰⵢⴷⴰ ⴰⵔⴽⵎⴰⵎ, ⴷ ⵢⴰⵏ ⵓⵣⵎⵣⵣⵓ ⴰⴼⴰⴷ ⴰⴷ ⵢⵉⵍⵉ ⵓⵙⴷⵓⵙ ⵏ ⵓⵣⴷⴷⵓⵢ ⵙ ⵜⵎⴰⴳⵉⵜ ⵜⴰⴷⵍⵙⴰⵏⵜ ⵜⴰⵎⴰⵣⵉⵖⵜ, ⴷ ⴰⴷ ⵜⴳ ⵜⵎⴷⴰ ⵏ ⵄⵓⵡⵡⴰ ⵢⴰⵏ ⵓⵙⴰⵢⵔⴰⵔ ⵏ ⵓⵎⵏⵓⵇⵇⴰⵔ ⴷ ⵓⴱⵟⵟⵓ ⴷ ⵓⵄⵔⴰⵎ ⴰⵎⴳⵔⵓ.
ⴳ ⵢⴰⵜ ⵜⵙⴳⵓⵔⵉ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ, ⵉⵙⵙⴼⴰⵡ ⵓⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵜⴰⵎⵙⵓⴷⵙⵜ, ⴷⵔⵉⵙ ⴱⵓⵊⵔⴰⵄ, ⵎⴰⵙ ⴷ ⵜⴰⵙⵏⵜⴰⵢⵜ ⴰⴷ ⵜⵡⴰⵜⵜⵙ ⴰⴷ ⵜⵙⵙⴼⴰⵡ ⵜⴰⵎⴰⴳⵉⵜ ⵜⴰⵎⴰⵣⵉⵖⵜ ⵊⴰⵊ ⵏ ⵓⴷⵖⴰⵔ ⵏⵏⵙ ⴰⴳⴰⵎⴰⵏ, ⴷ ⵓⵙⴷⵓⵙ ⵏ ⵜⵓⴳⴳⴰⵙ ⵏ ⵓⵃⵟⵟⵓ ⵏ ⵡⴰⵢⴷⴰ ⴷ ⵓⴽⴽⵓⵙⵙⵓ ⵏⵏⵙ ⵉ ⵜⵙⵓⵜⵉⵏ ⴷ ⵉⴷⴷⴰⵏ.
ⵉⵏⵏⴰ ⴷⴰⵖ ⵎⴰⵙ ⴷ ⴰⵙⵏⵎⴰⵍⴰ ⵏ ⵓⵏⵎⵓⵇⵇⴰⵔ ⴳ ⵜⵎⵏⴰⴹⵜ ⴰⴷ ⵉⴳⴰⵏ ⵜⵉⵏ ⵓⵎⴰⵔⴳ ⴷ ⵡⴰⵢⴷⴰ, ⴰⵡⵜⵜⴰⵙ ⵏⵏⵙ ⵉⴳⴰ ⵜ ⴰⵙⵉⵜⴳ ⵏ ⵜⵎⴰⴳⵉⵜ ⵜⴰⵎⴰⵣⵉⵖⵜ ⵊⴰⵊ ⵏ ⵓⴷⵖⴰⵔ ⵏⵏⵙ ⴰⴳⴰⵎⴰⵏ ⴷ ⵓⴷⵍⵙⴰⵏ.
ⵖⵉⴽⵍⵍⵉ ⵙⴷⴷⵉⴷⵏ ⵉⵎⵙⵓⴷⴰⵙ ⵅⴼ ⵓⵕⵚⵚⴰ ⵏ ⵜⴷⵉⵏⴰⵎⵉⵜ ⴰⴷ ⵜⴰⴷⵍⵙⴰⵏⵜ ⴳ ⵜⵙⴳⴰ ⵏ ⵡⴰⵟⵍⴰⵚ ⴰⵏⴰⵎⵎⴰⵙ, ⵜⵜⵔⵏ ⵉⵎⴷⵔⵓⵜⵏ ⴰⴷ ⴹⴼⴰⵕⵏ ⵜⴰⵙⵏⵜⴰⵢⵜ ⴰⴷ ⴳⵏ ⴰⵙ ⴰⵏⵏⴰⵍ.
ⵉⴽⵛⵎ ⵓⵎⵓⵙⵙⵓ ⴰⴷ ⴳ ⵢⴰⵜ ⵜⵎⵢⴰⴷⴰⵙⵜ ⵉⵡⴰⵜⵜⵙⵏ ⴰⵙⵉⵜⴳ ⵏ ⵡⴰⵢⴷⴰ ⴰⴷⵍⵙⴰⵏ ⴰⵔⴽⵎⴰⵎ, ⴷ ⵓⵙⵎⵓⵙⵙⵓ ⵏ ⵜⵎⵉⵥⵉⵕⵜ ⵜⴰⴷⵍⵙⴰⵏⵜ ⵜⴰⴷⵖⵔⴰⵏⵜ, ⴷ ⵓⵙⴼⴰⵡ ⵏ ⵜⴱⵖⵓⵔⵉⵏ ⵜⵉⴳⴰⵎⴰⵏⵉⵏ ⴷ ⵜⵉⵏ ⵜⵎⴰⵍⵍⴰⵢⵜ ⵏⵏⴰ ⵙ ⵜⴱⵖⵔ ⵜⵎⴷⴰ ⵏ ⵄⵓⵡⵡⴰ ⴷ ⵜⵙⴳⴰ ⵏ ⵉⴼⵔⴰⵏ.
