ⴰⵢⴷⴰ ⴰⴷⵍⵙⴰⵏ ⴰⵎⵖⵔⵉⴱⵉ ⴳ ⵡⴰⵎⵎⴰⵙ ⵏ ⵓⵎⵙⴳⴷⴰⵍ ⴰⴳⵔⴰⵖⵍⴰⵏ ⴳ ⴼⴰⵙ: ⵖⵔ ⵉⴷⵉⵔⵏ ⵉⵎⴰⵢⵏⵓⵜⵏ ⵉ ⵓⵙⴱⵓⵖⵍⵓ ⴰⴷⵎⵙⴰⵏ ⴷ ⵓⵥⵥⵏⵥⵕ ⴰⴷⵉⴱⵍⵓⵎⴰⵙⵉ
ⵜⵜⵡⴰⴳⴳⵏⵜ ⴳ ⵜⴷⴰⵍⴰ ⵏ ⵉⵙⵎⵓⵜⵜⴳⵏ ⴷ ⵜⵉⵏⴰⵡⵉⵏ ⵉⴹⴼⵕⵏ ⵉ ⵜⵙⴷⴰⵡⵉⵜ ⵏ ⵙⵉⴷⵉ ⵎⵓⵃⵎⵎⴷ ⴱⵏ ⵄⴱⴷⵍⵍⴰⵀ ⴳ ⴼⴰⵙ, ⵓⵙⵙⴰⵏ ⵏ 19 ⴷ 20 ⵏⵓⵡⴰⵏⴱⵉⵔ 2026, ⵜⵡⵓⵔⵉⵡⵉⵏ ⵏ ⵓⴱⵔⴳⵔⴰⵡ ⴰⵎⴰⵙⵙⴰⵏ ⴰⴳⵔⴰⵖⵍⴰⵏ ⵅⴼ ⵓⵙⵏⵜⵍ “ⴰⵢⴷⴰ ⴰⴷⵍⵙⴰⵏ ⴰⵎⵖⵔⵉⴱⵉ: ⴰⴱⵓⵖⵍⵓ ⴰⴷⵎⵙⴰⵏ ⴷ ⵉⵎⵙⵓⵔⴰⵙ ⵉⵊⵢⵓⵙⵔⵜⴰⵏⵏ ⴷ ⵉⵊⵢⵓⵙⵜⵔⴰⵜⵉⵊⵉⵢⵏ ⴷ ⵜⴷⵉⴱⵍⵓⵎⴰⵙⵉⵜ”.
ⴷⴰ ⵜⵙⵏⵎⴰⵍⴰ ⵜⵙⴷⴰⵡⵉⵜ ⵏ ⵙⵉⴷⵉ ⵎⵓⵃⵎⵎⴷ ⴱⵏ ⵄⴱⴷⵍⵍⴰⵀ, ⵜⴰⵖⵉⵡⴰⵏⵜ ⵏ ⵜⵙⴽⵍⵉⵡⵉⵏ ⴷ ⵜⵎⴰⵙⵙⴰⵏⵉⵏ ⵜⵉⵏⴼⴳⴰⵏⵉⵏ ⵙⴰⵢⵙ ⴰⵙⴰⵔⵎ ⵏ ⵉⵔⵣⵣⵓⵜⵏ ⴷ ⵜⵣⵔⴰⵡⵉⵏ ⵜⵉⴷⵍⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴷ ⵓⵎⴰⵙⵜⵔ ⵏ ⵉⵙⵎⵓⵜⵜⴳⵏ ⴷ ⵉⵙⵍⵍⵡⵉⵜⵏ ⴳ ⵜⴷⵉⴷⴰⴽⵜⵉⵜ ⵏ ⵜⵎⴰⵣⵉⵖⵜ. ⴰⵎⵓⵏ ⴳ ⵜⵎⵖⵔⴰ ⴰⴷ ⵜⴰⴽⴰⴷⵉⵎⵉⵜ ⵜⵓⴳⴷⵜ ⵏ ⵉⵎⵓⵙⵏⴰⵡⵏ ⵉⵅⴰⵜⴰⵔⵏ ⴰⵎ: ⴰⴷⵓⴽⵜⵓⵔ ⵍⵃⵙⵏ ⵓⵍⵃⴰⵊ ⴷ ⵓⴷⵓⴽⵜⵓⵔ ⴷⵔⵉⵙ ⵅⵔⵓⵣ. ⴷ ⵜⵓⴼⵓⵜ ⵏ ⵉⵙⵍⵎⴰⴷⵏ ⵉⵎⵙⴷⴰⵡⵏ ⴷ ⵉⵎⵔⵣⵓⵜⵏ ⴷ ⵉⵎⵓⵣⴰⵢⵏ, ⴰⵡⴷ ⵜⵓⴳⴷⵜ ⵏ ⵉⵎⵃⴹⴰⵕⵏ ⴷ ⵉⵎⵣⵔⴰⵡⵏ ⴳ ⵢⵉⴳⵔ ⵏ ⵡⴰⵢⴷⴰ ⴰⴷⵍⵙⴰⵏ ⴳ ⵙⵉⵏ ⵏ ⵉⵙⵡⵉⵔⵏ: ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ.
ⵉⴳⴰ ⵓⵏⵎⵓⵇⵇⴰⵔ ⴰⴷ ⵢⴰⵜ ⵜⵎⵍⴷⴰ ⵉ ⵓⵎⵙⴳⴷⴰⵍ ⵏ ⵉⵎⵏⴰⴷⵏ ⵉⴷⵎⵙⴰⵏⵏ ⴷ ⵉⵙⵜⵔⴰⵜⵉⵊⵉⵢⵏ ⵏ ⵡⴰⵢⴷⴰ ⴰⴷⵍⵙⴰⵏ ⴰⵎⵖⵔⵉⴱⵉ, ⴷ ⵜⵓⴽⵣⴰ ⵏ ⵜⵣⵎⵎⴰⵔ ⵏⵏⵙ ⴳ ⵡⴰⵏⵏⴰⵍ ⵏⵜⴳⵎⵉ ⴷ ⵓⵙⴷⵓⵙ ⵏ ⵜⵏⵏⵓⵣⵖⴰ ⵏ ⵉⴳⵔⴰⵏ ⵉⴷⵖⵔⴰⵏⵏ, ⴰⵡⴷ ⴰⵙⵉⵙⴼⵉⵡ ⵏ ⵜⵉⵍⴰⵍⵜ ⵏⵏⵙ ⴳ ⵓⵕⵛⴰⵎ ⵏ ⵜⵎⴰⴳⵉⵜ ⵜⴰⵏⴰⵎⵓⵔⵜ ⴷ ⵓⵙⴷⵓⵙ ⵏ ⵜⵉⵍⵉⵜ ⵜⴰⴷⵍⵙⴰⵏⵜ ⵏ ⵜⴳⵍⴷⵉⵜ ⴳ ⵙⵉⵏ ⵏ ⵉⵙⵡⵉⵔⵏ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ.
ⴷ ⵉⵡⵉⵏⵜ ⴷ ⵜⴽⵛⵛⵓⵎⵉⵏ ⵏ ⵓⵏⵎⵓⵇⵇⴰⵕ ⴰⴷ ⴰⵎⴰⵙⵙⴰⵏ ⵏⵏⴰ ⵉⴱⴹⴰⵏ ⵅⴼ ⵚⴹⵉⵚⵜ ⵏ ⵜⵖⵉⵎⴰ, ⵜⵉⴱⵔⵉⴷⵉⵏ ⵏ ⵓⵙⵓⵜⵜⴳ ⵏ ⵡⴰⵢⴷⴰ ⴰⴷⵍⵙⴰⵏ ⴷ ⵓⵙⵙⵎⵔⵙ ⵏⵏⵙ ⴰⵎ ⵜⴰⵎⵙⵙⵉⵍⵉⵜ ⵏ ⵓⴱⵓⵖⵍⵓ ⴰⴷⵎⵙⴰⵏ, ⴰⵡⴷ ⴰⵎⵙⴳⴷⴰⵍ ⵏ ⵉⵎⵙⵓⵔⴰⵙ ⵉⵊⵢⵓⵙⵔⵜⴰⵏⵏ ⴷ ⵉⵊⵢⵓⵙⵜⵔⴰⵜⵉⵊⵉⵏ ⴷ ⵜⵉⵍⴰⵍⵜ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴷⵍⵙⴰⵏⵜ ⴳ ⵓⵙⴷⵓⵙ ⵏ ⵜⵡⵍⴰⴼⵜⵏ ⵍⵎⵖⵔⵉⴱ ⴷ ⵓⵙⵙⵉⵔⵉⵡ ⵏ ⵓⵥⵥⵏⵥⵕ ⵏⵏⵙ ⴰⴳⵔⴰⵖⵍⴰⵏ, ⵙⵍⴰⵡⴰⵏ ⴰⴽⴽⵯ ⴷⴷⴰⵡ ⵏ ⵉⵙⵏⴼⵍⵏ ⴷ ⵉⵎⵃⵉⵣⵡⵔⵏ ⵏⵏⴰ ⵉⵜⵜⴷⴷⵔ ⵢⵉⴳⵔ ⴰⴷⵍⵙⴰⵏ ⴳ ⵓⵙⵡⵉⵔ ⴰⵎⴰⴹⵍⴰⵏ.
ⵎⴽⵍⵍⵉ ⵍⵍⴰⵏ ⴳ ⵜⵖⵉⵎⴰ ⵏ ⵓⴱⵔⴳⵔⴰⵡ ⵜⵓⴳⴷⵜ ⵏ ⵉⵎⵙⴳⴷⴰⵍⵏ ⵉⴽⴰⴷⵉⵎⵉⵢⵏ ⵏⵏⴰ ⵢⵉⵡⵙⵏ ⴳ ⵓⵙⴱⵓⵖⵍⵓ ⵏ ⵉⵙⴳⵓⵎⵏ ⵏⵏⵙ, ⴷ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴷ ⵜⴰⵏⵏⴰⵢⵉⵏ ⵉⵣⴷⵉⵏ ⴷ ⵓⵃⵟⵟⵓ ⵏ ⵡⴰⵢⴷⴰ ⴰⵏⴰⵎⵓⵔ ⴷ ⵓⵙⵓⵜⵜⴳ ⵏⵏⵙ, ⴷ ⵓⵙⴷⵓⵙ ⵏ ⵜⴷⵔⴰⵡⵜ ⵏ ⵜⵙⴷⴰⵡⵉⵜ ⴷ ⵓⵔⵣⵣⵓ ⴰⵎⴰⵙⵙⴰⵏ ⴳ ⵓⴹⴼⴰⵕ ⵏ ⵜⵎⵙⴰⵔ ⵙⵉⵙ ⵉⵥⵍⵉⵏ.
ⴳ ⵓⵎⴳⴳⴰⵔⵓ ⵏⵜⴼⵓⴳⵍⴰ ⴰⴷ ⵜⴰⵎⴰⵙⵙⴰⵏⵜ, ⵉⵖⵔⴰ ⵓⵏⵙⵙⵉⵅⴼ ⵏ ⵓⴱⵔⴳⵔⴰⵡ ⴰⴷⵓⴽⵜⵓⵔ ⵍⵎⵓⵚⵟⴰⴼⴰ ⴰⵄⵡⵉⵏ ⵜⴰⵏⴰⴹⵜ ⵜⴰⵙⵎⵓⵔⴰⵏⵜ ⵏⵏⴰ ⴷ ⵢⵉⵡⵉⵏ ⵎⴰⵕⵕⴰ ⵉⵙⵖⵍⴰⴼ ⵏ ⵜⵖⵉⵎⴰ ⵏⵏⴰ ⵉⵙⵙⵉⴷⴻⴷⵏ ⵅⴼ ⵡⵓⵛⵛⵉⵍ ⵏ ⵓⴹⴼⴰⵕ ⵏ ⵜⵎⵢⴰⴷⴰⵙⵜ ⵜⴰⵎⵙⵎⴰⴷⵜ ⵉ ⵓⴼⵔⴰⴳ ⵏ ⵡⴰⵢⴷⴰ ⴰⴷⵍⵙⴰⵏ ⴰⵎⵖⵔⵉⴱⵉ ⴷ ⵓⵙⵓⵜⵜⴳ ⵏⵏⵙ, ⴷ ⵓⵙⵓⴷⵙ ⵏ ⵓⵙⵖⵍⵍⴰ ⵏⵏⵙ ⴳ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵎⴰⵍⵍⴰⵢⵜ, ⴷ ⵡⴰⵏⵏⴰⵍ ⵏ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵓⵜⵜⴳ ⴰⵎⵥⵍⴰⵢ, ⴰⵡⴷ ⴰⵙⵓⴷⵙ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴷⵎⵙⴰⵏⵜ ⴷ ⵓⵙⴱⵓⵖⵍⵓ ⵏ ⵉⴷⵔⴰⵡⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ, ⴷ ⵓⵏⵏⵓⵕⵥⵎ ⵅⴼ ⵜⵉⵔⵎⵉⵜⵉⵏ ⵜⵉⵜⵔⴰⵔⵉⵏ, ⴷ ⵓⵙⵙⵎⵔⵙ ⴰⵎⵓⴼⴰⵢ ⵏ ⵉⵎⴰⵙⵙⵏ ⴷ ⵜⵉⵜⵉⵇⵏⵉⵢⵉⵏ ⵜⵉⵎⵙⵍⵍⵡⵉⵜⵉⵏ ⴰⵎ ⵜⵉⵖⵉⵙⵜ ⵜⴰⵎⴳⵓⵔⴰⵏⵜ ⵉ ⵓⵃⵟⵟⵓ ⵏ ⵡⴰⵢⴷⴰ ⴰⵏⴰⵎⵓⵔ ⴷ ⵜⵙⵎⵓⵟⵟⵓⵏⵜ ⵏⵏⵙ ⴷ ⵓⵏⵜⴰⵎ ⵏⵏⵙ ⵙ ⵜⴱⵔⵉⴷⵜ ⵏⵏⴰ ⵔⴰⴷ ⵢⴰⵡⵙ ⴳ ⵜⵙⵓⵍⴰⵏⵜ ⵏ ⵜⵏⴰⵟⵟⵓⴼⵜ ⴰⴷ ⵜⴰⵖⵔⵎⴰⵏⵜ ⴷ ⵓⵙⴷⵓⵙ ⵏ ⵓⵥⵥⵏⵥⵕ ⵏⵏⵙ ⴳ ⵙⵉⵏ ⵏ ⵉⵙⵡⵉⵔⵏ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ.



