ⴰⴱⵔⵍⴰⵎⴰⵏ ⵏ ⴷⵣⴰⵢⵢⵔ ⵢⵓⴳⵉ ⴰⵙⵓⵎⵔ ⵏ “ⵓⵎⵓⵙⵙⵓ ⵉⵙⵍⴰⵎⵉ ⴷ ⵓⵎⵓⵔⴰⵏ” ⵉ ⵡⴰⵏⵏⴰⵍ ⵏ ⵓⵛⵏⵢⴰⵍ ⴰⵎⴰⵣⵉⵖ

ⵉⵙⵜⵉ ⵓⵙⵇⵇⵉⵎ ⴰⵖⵔⴼⴰⵏ ⴰⵏⴰⵎⵓⵔ ⴳ ⴷⵣⴰⵢⵔ ⵙ ⵓⵡⴰⵍⵎⵓⵏ ⵖⴼ ⵓⵙⵏⵜⵉ ⵏ ⵓⵙⵏⴼⴰⵔ ⴰⵎⴰⵢⵏⵓ ⵏ ⵓⵙⵍⴳⵏ ⴰⵏⴳⵎⴰⵎ ⵏⵏⴰ ⵉⵣⴷⵉⵏ ⴷ ⵉⴽⴰⴱⴰⵕⵏ ⵉⵙⵔⵜⴰⵏⵏ, ⴹⴰⵕⵜ ⵏ ⵎⵏⵏⴰⵡ ⵉⵎⴰⵍⴰⵙⵙⵏ ⵏ ⵓⵎⵙⴳⴷⴰⵍ ⴰⵙⵔⵜⴰⵏ ⵏⵏⴰ ⵉⴹⴼⵕⵏ ⴽⵔⴰ ⵏ ⵉⵎⵏⵏⵉⵜⵏ ⵏⵏⵙ, ⵙⵍⴰⵡⴰⵏ ⴰⴽⴽⵯ ⵡⵉⵍⵍⵉ ⵉⵇⵇⵏⵏ ⵖⵔ .ⵓⵙⵎⵔⵙ ⵏ ⵜⵎⴰⵜⴰⵔⵉⵏ ⴷ ⵉⵛⵏⵢⴰⵍⵏ ⴳ ⵉⵎⵓⵙⵙⵓⵜⵏ ⵏ ⵉⴽⴰⴱⴰⵕⵏ.

ⴳ ⵜⵉⵣⵉ ⵏ ⵓⵎⵙⴳⴷⴰⵍ ⵏ ⵉⵙⵏⴼⵍⵏ ⵉⵜⵜⵓⵙⵓⵎⵔⵏ, ⵜⵓⴳⵉ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵜⵓⵍⴳⵉⵏⵉⵏ ⴷ ⵜⵎⵙⵙⵓⴳⵓⵔⵉⵏ ⴷ ⵜⵍⴻⵍⵍⵉⵢⵉⵏ ⴳ ⵓⵙⵇⵇⵉⵎ, ⵎⴽⵍⵍⵉ ⵙ ⵏⵏⴰⵏ ⵉⵙⵓⴳⴰⵎ ⵏ ⵓⵙⵏⵖⵎⵙ ⵏ ⴷⵣⴰⵢⵔ, ⴽⵉⴳⴰⵏ ⵏ ⵜⵙⵓⵎⴰⵔ, ⵙⴳⵉⵙⵏⵜ ⵢⴰⵏ ⵓⵙⵏⵎ ⵖⴼ ⵓⵎⵏⵏⵉ ⵡⵉⵙ ⵚⴹⵉⵚ ⵏⵏⴰ ⵜ ⵉⵏⵏ ⴷⴰ ⴳⴷⴷⵍ ⵉⴽⴰⴱⴰⵕⵏ ⴰⴷ ⴰⵍⵍⵏ ⴽⵔⴰ ⵏ ⵓⵛⵏⵢⴰⵍ ⵓⵔ ⵉⴳⵉⵏ ⵡⵉⵏ ⵡⴰⵎⵓⵔ ⴳ ⵓⴳⵏⵙⵓ ⵏ .ⵉⵎⵓⵙⵙⵓⵜⵏ ⵏⵏⵙⵏ ⵉⵙⵔⵜⴰⵏⵏ.

ⵉⵙⵙⵓⵎⵔ ⵓⵎⴰⵔⵉ ⵄⴱⴷⵍⵕⵕⵃⵎⴰⵏ ⵚⴰⵍⵃⵉ ⵙⴳ ⵓⴽⴰⴱⴰⵕ ⵏ « ⴰⵎⵓⵍ ⵏ ⵢⵉⵎⴰⵍ » ⴰⵙⵏⵎ ⴰⴷ, ⵍⵍⵉⴳ ⵉⵏⵏⴰ ⵎⴰⵙ ⴷ « ⵉⵇⵇⴰⵏ ⴷ ⵓⵙⴷⵓⵙ ⵏ ⵜⴰⵢⴰⵏⵜ ⵜⴰⵏⴰⵎⵓⵔⵜ ⴷ ⵓⴳⴷⴷⵓⵍ ⵏ ⵓⵙⵎⵔⵙ ⵏ ⵜⵎⴰⵜⴰⵔⵉⵏ ⵍⵍⵉ ⵉⵣⵎⵔⵏ ⴰⴷ ⵇⵇⵏⵏ ⵖⵔ ⵉⵏⴰⵡⵏ ⵏ ⵜⵎⴰⴳⵉⵜ ⵏⵖ ⵜⵎⵏⴰⴹⵜ ». ⵎⴰⵛⴰ ⵜⵥⵕⴰ ⵜⵙⵇⵇⵉⵎⵜ ⵎⴰⵙ ⴷ ⵜⴰⵙⵓⵎⵔⵜ ⴰⴷ ⵜⴳⴰ ⵢⴰⵏ ⵓⵙⵉⵔⵉⵡ (ⴰⵙⵉⵖⵣⴼ) ⴰⵔⵓⵙⴼⴽⵍ ⴳ ⵉⵙⴽⵔⴰⴼ ⵍⵍⵉ ⵉⵜⵜⵣⵓⵛⵛⵍⵏ (ⵉⵜⵜⵓⵙⵔⴰⵙⵏ) ⵖⴼ ⵉⴽⴰⴱⴰⵕⵏ, ⴷⴰⵜ ⴰⴷ ⵉⵖⵜⵙ ⴱⴰⴱ ⵏ ⵏⵏⵙ .ⴰⴷ ⵜ ⵉⴽⴽⵙ ⴹⴰⵕⵜ ⵓⵎⵙⴳⴷⴰⵍ ⴳ ⵓⴳⵏⵙⵓ ⵏ ⵜⵙⵇⵇⵉⵎⵜ.

ⵉⵙⵙⵏⴽⵔ ⵓⵙⵓⵎⵔ ⴰⴷ ⵢⴰⵏ ⵓⵎⵙⴳⴷⴰⵍ ⴰⴱⴰⵔⴰⵡ ⴳ ⵜⵥⴰⵢⵕⵉⵏ (ⴰⵎⵎⴰⵙⵏ) ⵜⵉⵙⵔⵜⴰⵏⵉⵏ ⵏ ⴷⵣⴰⵢⵔ, ⵍⵍⵉⴳ ⵜ ⵙⵡⴰⵍⴰⵏ ⴽⵔⴰ ⵏ ⵉⵎⴰⵥⴰⵎⵏ ⵙ ⵢⴰⵏ ⵡⵓⴷⵎ ⴰⵔⵓⵙⵔⵉⴷ ⵖⵔ ⵓⴽⴰⴱⴰⵕ ⵏ « ⴰⴳⵔⴰⵡ ⵉ ⵜⴷⵍⵙⴰ ⴷ ⵜⴷⵉⵎⵓⵇⵕⴰⵟⵉⵜ » (RCD), ⵍⵍⵉ ⵉⵜⵜⵡⴰⵙⵙⵏⵏ ⵙ ⵓⵙⵙⴰⵍⵉ ⵏ ⵓⵛⵏⵢⴰⵍ ⴰⵎⴰⵣⵉⵖ ⵜⴰⵎⴰ ⵏ ⵓⵛⵏⵢⴰⵍ ⴰⵏⴰⵎⵓⵔ ⴳ ⴽⵔⴰ ⵏ ⵉⵎⵓⵙⵙⵓⵜⵏ ⵏⵏⵙ ⵉⵙⵔⵜⴰⵏⵏ, ⴰⵎ ⵢⴰⵏ ⵓⵙⵏⴼⴰⵍⵉ .ⴰⵎⴰⵜⵔⴰⵏ ⵖⴼ ⵢⴰⵏ ⵙⴳ ⵉⴼⵔⴷⵉⵙⵏ ⵉⴷⵙⵍⴰⵏⵏⵏ ⵜⴷⵍⵙⴰ ⵜⴰⵏⴷⵣⴰⵢⵔⵜ.

ⴳ ⵜⵙⴳⴰ ⵢⴰⴹⵏ, ⵏⵏⴰⵍⵏ ⴽⵔⴰ ⵏ ⵉⵎⴰⵔⴰⵏ, ⵙⵍⴰⵡⴰⵏ ⴰⴽⴽⵯ ⵙⴳ ⵓⵎⵣⴰⵣ ⴰⵏⵙⵍⵎ ⴷ ⵡⵉⵏ ⵉⵎⵓⵔⴰⵏⵏ, ⵜⴰⵡⵏⴳⵉⵎⵜ ⵏ ⵓⵙⵡⵓⵜⵜⵓ ⵏ ⵓⵙⵎⵔⵙ ⵏ ⵜⵎⴰⵜⴰⵔⵉⵏ ⴳ ⵓⵛⵏⵢⴰⵍ ⴰⵏⴰⵎⵓⵔ ⵡⴰⵀⴰ. ⵉⵏⵏⴰ ⵓⵎⴰⵔⵉ ⵄⵣⴷⴷⵉⵏ ⵣⵃⵓⴼ ⵙⴳ « ⵓⵎⵓⵙⵙⵓ ⵏ ⵡⴰⵎⵓⵏ ⵏ ⵓⴼⵔⴰ » ⵎⴰⵙ ⴷ ⴰⵡⵇⵇⵔ ⵏ ⵓⵛⵏⵢⴰⵍ ⴰⵏⴰⵎⵓⵔ ⵉⵍⵍⴰ ⴷⴳ ⵓⵙⴰⵜⴰⵍ ⵏ ⵓⵃⵟⵟⵓ ⵏ ⵓⵎⵢⴰⵎⴰⵥ ⴰⵏⴰⵎⵓⵔ ⴷ ⵡⴰⵔⴰⵢ ⵙⴳ ⴽⵔⴰⵢⴳⴰⵜⵜ ⴰⵎⵎⵔⴽⵙ .ⵍⵍⵉ ⵉⵥⴹⴰⵕⵏ ⴰⴷ ⵜ ⵙⵏⵓⵍⴼⵓⵏⵜ ⵜⵎⴰⵜⴰⵔⵉⵏ ⵏⵏⴰ ⵉⵍⴰⵏ ⵉⵎⵏⵉⴷⵏ ⵏ ⵜⵎⴰⴳⵉⵜ ⵏⵖ ⵏ ⵜⵎⵏⴰⴹⵜ.

ⴷⴰ ⵥⵕⵕⴰⵏ ⵉⵏⵎⴳⴰⵍⵏ ⵏ ⵓⵙⵓⵎⵔ ⴰⴷ ⵎⴰⵙ ⴷ ⴰⴳⴷⴷⵓⵍ ⵏ ⵓⵙⵎⵔⵙ ⵏ ⵜⵎⴰⵜⴰⵔⵉⵏ ⵜⵉⴷⵍⵙⴰⵏⵉⵏ, ⵣⵓⵏ ⴷ ⴰⵛⵏⵢⴰⵍ ⴰⵎⴰⵣⵉⵖ, ⴷⴰ ⵉⵜⵜⵎⴳⴰⵍ ⴰⴽⴷ ⵜⵍⴽⴽⴰⵡⵜ ⵜⴰⴷⵙⵜⴰⵔⵜ ⵙ ⵜⵎⴰⴳⵓⵜ ⵜⴰⴷⵍⵙⴰⵏⵜ ⴳ ⴷⵣⴰⵢⵔ, ⵍⵍⵉⴳ ⵜⴳⴰ ⵜⵎⴰⵣⵉⵖⵜ ⵢⴰⵏ ⵙⴳ ⵡⴰⵢⵢⴰⵡⵏ ⵏ ⵜⵎⴰⴳⵉⵜ ⵜⴰⵏⴰⵎⵓⵔⵜ .ⵜⴰⵎⴰ ⵏ ⵉⴳⵍⴰⵏ ⵏ ⵓⵄⵕⴰⴱ ⴷ ⵓⵏⵙⵍⵎ.

ⴳ ⵓⵙⴰⵜⴰⵍ ⴰⴷ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⴽⴰⴱⴰⵕ ⵏ « ⵓⴳⵔⴰⵡ ⵉ ⵜⴷⵍⵙⴰ ⴷ ⵜⴷⵉⵎⵓⵇⵕⴰⵟⵉⵜ » ⵄⵓⵜⵎⴰⵏ ⵎⵄⵣⵓⵣ ⵎⴰⵙ ⴷ ⵜⴰⵢⴰⵏⵜ ⵜⴰⵏⴰⵎⵓⵔⵜ ⵓⵔ ⴷⴰ ⵜⴻⵜⵜⵓⵥⴽⴰ ⵙ ⵓⴳⴷⴷⵓⵍ ⵏ ⵜⵎⴰⵜⴰⵔⵉⵏ ⵜⵉⴷⵍⵙⴰⵏⵉⵏ, ⵎⴰⵛⴰ ⵙ ⵜⵍⴽⴽⴰⵡⵜ ⵙ ⵓⵎⵢⴰⵏⴰⵡ ⵏⵏⴰ ⵉⵙⵙⵉⵍⵉⵖⵏ ⴰⵎⵓⵏ ⴰⵏⴷⵣⴰⵢⵔ, ⵉⵙⵙⵖⴹⴼ ⵖⴼ ⵎⴰⵙ ⴷ ⵉⴽⴰⴱⴰⵕⵏ ⵉⵙⵔⵜⴰⵏⵏ ⴳⴰⵏ ⵉⵙⴰⵢⵔⴰⵔⵏ ⵉ .ⵓⵙⵏⴼⴰⵍⵉ ⴰⵙⵔⵜⴰⵏ ⴷ ⵓⴷⵍⵙⴰⵏ ⴷ ⵓⵔ ⴳⵉⵏ ⵖⴰⵙ ⵉⵎⴰⵙⵙⵏ ⵉⵎⵙⵜⴰⵢⵏ.

ⴷⴰ ⵥⵕⵕⴰⵏ ⴽⵔⴰ ⵏ ⵉⵏⴹⴼⴰⵕⵏ ⵎⴰⵙ ⴷ ⴰⵎⵙⴳⴷⴰⵍ ⵖⴼ ⵓⵎⵏⵏⵉ ⴰⴷ ⴷⴰ ⵉⵎⵎⴰⵍ ⵜⴰⵙⵓⵍⵜ ⵏ ⵓⵎⵙⴳⴷⴰⵍ ⴰⵙⵔⵜⴰⵏ ⴳ ⴷⵣⴰⵢⵔ ⴳⵔ ⵢⴰⵏ ⵓⵙⵡⴰⵍⴰ ⵉⵇⵇⴰⵔⵏ ⵉ ⵢⴰⵜ ⵜⴰⵏⵏⴰⵢⵜ ⵜⴰⵎⵙⵢⵉⵡⵏⵜ ⵉ ⵜⵎⴰⴳⵉⵜ ⵜⴰⵏⴰⵎⵓⵔⵜ, ⴷ ⵡⴰⵢⵢⴰⴹ ⵏⵏⴰ ⵉⵙⴷⴷⵉⴷⵏ ⵖⴼ ⵓⵣⵓⵛⵛⵍ ⵏ ⵜⵍⴽⴽⴰⵡⵜ ⵙ ⵜⵎⴰⴳⵓⵜ .ⵜⴰⴷⵍⵙⴰⵏⵜ ⴷ ⵜⵎⵣⵔⵓⵢⴰⵏⵜ ⴳ ⵓⴳⵏⵙⵓ ⵏ ⵡⴰⵎⵓⵏ ⴰⵏⴷⵣⴰⵢⵔ.

ⵉⵙⵓⵖⵍ ⵜ: ⴰⵏⴰⵙ ⵓⵍⵃⵍⵓ