ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵓⵙⵢⴰⴼⵓ ⵏ ⵜⵓⵙⵙⵏⴰ

ⵉⵥⵉⵍ ⴱⴰⵀⵔⴰ ⵍⵍⵉⵖ ⵉⵙⵜⵉ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⴷ ⵉⵙⵏⵎⴰⵍⴰ ⵜⵉⵏⴰⵡⵜ ⴰⵙⴳⵓⵎⴰⵏⵜ ⴼ: ⴰⵜⵉⴳ ⵏ ⵓⵙⵢⴰⴼⵓ ⵏ ⵜⵓⵙⵙⵏⴰ ⴳ ⵓⵙⵎⵖⵔ ⵏ ⵜⵎⴰⵣⵉⵖⵜ, ⴳ ⵓⵙⴰⵜⵉ ⵏ ⵓⵖⴰⵡⴰⵙ ⴰⴷⵍⵙⴰⵏ ⴷ ⵓⵎⴰⵙⵙⴰⵏ ⵍⵍⵉ ⵜⵙⵔⵙ ⵜⵎⵔⵙⵍⵜ ⴰⴳ ⵉ ⵓⵙⴼⵓⴳⵍⵓ ⵏ ⵓⴽⵜⵜⵓⵢ ⵡⵉⵙ 24 ⵏ ⵉⵏⴰⵡ ⴰⴳⵍⴷⴰⵏ ⴰⵎⴰⵜⵜⵓⵢ ⵏ ⵓⵊⴷⵉⵔ, ⴳ ⵉⵍⵍⴰ ⵓⵙⵉⵡⴹ ⵏ ⵓⵙⴽⵔ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ. ⴰⵙⴼⵓⴳⴽ ⴰⴷ ⵍⵍⵉ ⴱⴷⴷⴰ ⵜⵙⵏⵎⴰⵍⴰ ⵜⵎⵔⵙⵍⵜ ⴰⴷ ⴳ ⵡⴰⵢⵢⵓⵔ ⵏ ⴽⵟⵓⴱⵕ ⴽⵓ ⴰⵙⴳⴳⵯⴰⵙ.

ⵉⴳⴰ ⵓⵏⵎⵓⵇⵇⴰⵔ ⴰⴷ ⴰⵎⴰⵙⵙⴰⵏ ⴷ ⵓⵎⴰⵙⵙⴰⵏ ⵡⴰⴷ ⵉⵥⵍⵉⵏ, ⵡⴰⴷ ⵉⵙⵜⴰⵡⵀⵎⵎⴰⵏ, ⵡⴰⴷ ⵉⵍⴰⵏ ⴰⵜⵉⴳ ⴰⵅⴰⵜⴰⵔ, ⵙ ⵜⵉⵏⴰⵡⵉⵏ ⵜⵉⵎⴰⵙⵙⴰⵏⵉⵏ ⵍⵍⵉ ⴳⵉⵙ ⵍⵍⴰⵏⵉⵏ, ⵉⵍⵉⵏⵜ ⵅⴼ ⵉⴳⵔⴰⵏ ⵣⴷⵉⵏⵉⵏ ⵙ ⵉⵙⵡⴰⵍⴰⵢⵏ ⵉⵎⴰⵜⴰⵢⵏ ⴼ ⵉⴱⴷⴷ ⵓⴼⴰⵔⵙ ⵏⵖ ⴰⵙⵢⴰⴼⵓ ⵏ ⵜⵓⵙⵙⵏⴰ ⵙ ⵜⵎⴰⵣⵉⵖⵜ ⴷ ⵅⵉⴼⵙ, ⵜⴰⵢⵢⴰⴼⵓⵜ ⵜⴰⵎⴰⵙⵙⴰⵏⵜ ⵉⵣⴷⵉⵏ ⴷ ⵓⵔⵣⵣⵓ ⴰⵎⴰⵙⵙⴰⵏ, ⵜⴰⵎⵓⵟⵟⵓⵏⵜ ⴷ ⵜⴻⵜⵉⴽⵏⵓⵍⵓⵊⵉⵜ, ⵜⵓⵙⵙⵏⴰ ⵉⵣⴷⵉⵏ ⴷ ⵡⴰⵎⵓⵏ ⴷ ⵜⵥⵓⵕⵉ ⴷ ⵜⴷⵍⵙⴰ ⴷ ⵓⴼⴳⴰⵏ, ⴷ ⵜⵉⵢⵢⴰⴼⵓⵜ ⵏ ⵓⵙⵉⵏⴰⴳ ⴳ ⵉⴳⵔ ⵏ ⵜⵥⵕⵉⴳⵜ ⵙ ⵜⵉⵔⵔⴰ, ⴷ ⵉⴳⵔⴰⵏ ⵢⴰⴹⵏⵉⵏ ⴳⴰⵏⵉⵏ ⵉⵎⵏⵏⴰⵡⵏ.

ⵉⴳⴰ ⵍⵃⴰⵍ ⴰⵎ ⵜⵉⵖⵉⵎⵉⵜ ⵜⴰⵎⴰⵙⵙⴰⵏⵜ ⵏ ⵓⵙⵙⴼⵍⴷ, ⴳ ⵉⵍⵍⴰ ⵓⴳⴷⵓⴷ ⵉⵃⴰⴹⵕⵏ ⴷ ⵓⵏⵎⵓⵇⵇⴰⵔ ⵓⵙⵔⵉⴷ ⴰⴽⴷ ⴽⵉⴳⴰⵏ ⵏ ⵉⵎⴰⵙⴰⵢⵏ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴷ ⵉⵏⵎⵀⴰⵍⵏ ⵏ ⵓⵔⵣⵣⵓ ⴳⵉⵙ ⴷ ⵎⴰⵕⵕⴰ ⵉⵎⵔⵣⴰ ⵅⴼ ⵜⵉⵎⴰⵎⴽⵉⵏ ⵏ ⵓⵙⵡⵓⵔⵉ ⵅⴼ ⵓⵙⵢⴰⴼⵓ ⵏ ⵜⵓⵙⵙⵏⴰ ⵙ ⵜⵎⴰⵣⵉⵖⵜ ⴷ ⵅⵉⴼⵙ, ⴳ ⵉⴳⵔⴰⵏ ⴳⴰⵏⵉⵏ ⵉⵎⵏⵏⴰⵡⵏ ⴳ ⵜⵍⵍⴰ ⵜⵙⵏⵉⵍⵙⵜ ⴷ ⵜⵙⴽⵍⴰ ⴷ ⵜⵙⵓⵙⵢⵓⵍⵓⵊⵉⵜ ⴷ ⵜⴰⵏⵟⵕⵓⴱⵓⵍⵓⵊⵉⵜ ⴷ ⵓⵙⴳⵎⵉ ⴷ ⵓⵙⵙⵍⵎⴷ ⴷ ⵜⴱⵉⴷⴰⵖⵓⵊⵉⵜ ⴷ ⵜⴷⵉⴷⴰⴽⵜⵉⴽⵜ ⴷ ⵉⵙⴳⵓⵎⵏ ⵉⵎⵓⵟⵟⵓⵏⵏ ⴷ ⵉⵜⵉⴽⵏⵓⵍⵓⵊⵉⵢⵏ ⴷ ⵡⵉⵢⵢⴰⴹ…ⵜⵉⵏⴼⵓⵍⵉⵏ ⵜⵉⵎⴰⵙⵙⴰⵏⵉⵏ ⵜⵜⴰⵡⵙⵎⵏⴰⴷⵏⵉⵏ ⴳ ⵓⵏⵎⵓⵇⵇⴰⵔ ⴰⴷ ⵔⵡⴰⵙⵏⵜ ⵏⵉⵜ ⵜⵉⴷ ⵍⵍⴰⵏⵉⵏ ⴳ ⵓⵏⵇⵇⵉⵙ ⵏ ⵙⵎⵎⵓⵙⵜ ⵜⵎⵔⴰⵡⵉⵏ ⵏ ⵓⵙⴳⴳⵯⴰⵙ ⵅⴼ ⵜⵏⴼⴰⵍⵉⵜ ⴳ ⵜⵎⴰⵣⵉⵔⵜ ⵏⵏⵖ, ⵍⵍⵉ ⵉⵜⵜⵓⵙⵙⴰⵏⵏ ⴳ ⵜⵎⴰⵣⵉⵔⵜ ⵏⵏⵖ.

ⴳ ⵓⵏⵎⵓⵇⵇⴰⵔ ⴰⴷ, ⵉⵡⵙⵏ ⵜⵓⴳⵜ ⵏ ⵉⵏⵎⵀⴰⵍⵏ ⵏ ⵓⵔⵣⵣⵓ ⴳ ⵓⵙⵉⵏⴰⴳ ⴷ ⵉⵎⵔⵣⵓⵜⵏ ⵏⵏⵙ, ⵍⵍⴰⵏⵜ ⵜⵓⴳⵜ ⵏ ⵜⵏⴼⵓⵍⵉⵏ ⵜⵉⵎⴰⵙⵙⴰⵏⵉⵏ ⴷ ⵜⵉⵏ ⵓⵔⵣⵣⵓ ⵍⵍⵉ ⴱⴰⵀⵔⴰ ⵙⵜⴰⵡⵀⵎⵎⴰⵏⵉⵏ, ⵍⵍⵉ ⴱⴷⴷⵏⵉⵏ ⴼ ⵜⴱⵔⵉⴷⵉⵏ ⴷ ⵜⵎⴰⵎⴽⵉⵏ ⵍⵍⵉ ⵙ ⵉⵙⵡⵓⵔⵉ ⵓⵙⵉⵏⴰⴳ ⴳ ⵢⵉⴳⵔ ⵏ ⵓⵙⵢⴰⴼⵓ ⵏ ⵢⴰⵜ ⵜⵓⵙⵙⵏⴰ ⵉⵖⵣⴰⵏⵏ ⴷ ⵉⵙⵇⵇⵉⵇⵏ ⴷ ⵉⵕⵚⴰⵏ ⵙⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ. ⵉⴳ ⵓⵏⵎⵓⵇⵇⴰⵔ ⵓⵍⴰ ⵜⴰⵎⵍⴷⴰ ⵏ ⵓⵙⵙⵉⵜⴳ ⵏ ⵓⵙⵡⵉⵔ ⵏ ⵜⵓⵙⵙⵏⴰ ⵉⵣⴷⵉⵏ ⴷ ⵜⵎⴰⵣⵉⵖⵜ ⵉⵍⵍⴰⵏ ⴷⴰⵜ ⵏ ⵓⵙⴽⵔ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⵓⵙⴳⴳⵯⴰⵙ ⵏ 2001. ⵙⵍⴰⵡⵏⴰ ⴽⴽⵯ ⴰⵢⵍⵍⵉ ⵉⵜⵜⵓⵙⴽⴰⵔⵏ ⴳ ⵓⵣⵎⵣ ⵏ ⵓⵙⴷⵓⵔⵔⵉ ⴷ ⵉⵙⴳⴳⵯⴰⵙⵏ ⵉⵎⵣⵡⵓⵔⴰ ⵏ ⵜⵙⵉⵎⴰⵏⵜ ⵏ ⵜⵎⴰⵣⵉⵔⵜ ⵏⵏⵖ.

ⵙ ⵜⵓⵜⵍⴰⵢⵜ ⵏ ⵓⵟⵟⵓⵏⵏ, ⵉⵍⴽⵎ ⵓⵏⵛⴽ ⵏ ⵉⴷⵍⵉⵙⵏ ⵍⵍⵉ ⴷ ⵉⵙⵙⴼⵓⵖ ⵓⵙⵉⵏⴰⴳ ⴰⴳⵍⴷⴰⵏ ⵎⴰⴷ ⵉⴳⴰⵏ 500 ⵏ ⵓⴷⵍⵉⵙ, ⴳⵉⵙⵏ 70 ⵏ ⵓⴷⵍⵉⵙ ⵖⴰⵙ ⴼ ⵜⵙⵏⵉⵍⵙⵜ ⵜⴰⵎⴰⵣⵉⵖⵜ. ⵢⵉⵍⵉ ⵓⵙⵏⵎⴰⵍⴰ ⵏ 75 ⵏ ⵓⵏⵎⵓⵇⵇⴰⵔ ⴰⵎⴰⵙⵙⴰⵏ. ⵍⵍⴰⵏ ⵉⴷⵍⵉⵙⵏ ⴰⴷ ⴼ ⵉⴳⵔⴰⵏ ⵏ ⵜⵙⵏⵉⵍⵙⵜ ⵙ ⵜⵡⵓⵔⵉ ⵏ ⵓⵎⵙⴰⵙⴰ ⵏ ⵜⵓⵜⵍⴰⵢⵜ, ⴰⵙⵓⵖⵍ ⴷ ⵜⵙⴽⵍⴰ ⴷ ⵓⵎⵣⵔⵓⵢ ⴷ ⵜⵙⵓⵙⵢⵓⵍⵓⵊⵉⵜ ⴷ ⵜⵏⵟⵕⵓⴱⵓⵍⵓⵊⵉⵜ ⴷ ⵜⵙⴽⵍⴰ ⵏ ⵡⴰⵣⵣⴰⵏ ⴷ ⵉⴷⵍⵉⵙⵏ ⵥⵉⵍⵏⵉⵏ…ⵎⴰ ⴰⴷ ⵉⴳⴰ ⵉⵙⵖⵍⵏ ⵙⵇⵇⵉⵇⵏⵉⵏ ⵎⵎⴰⵍⴰⵏⵉⵏ ⵙ ⵜⵉⴼⴰⵡⵜ ⵉⴼⴰⵡⵏ ⵎⴰⵙ ⵏⵍⵍⴰ ⴷⴰⵜ ⵏ ⵜⵎⵔⵙⵍⵜ ⵉⵏⵏⵓⵕⵥⵎⵏ ⵉⴳⴰⵏ ⵜⴰⵎⵣⵡⴰⵔⵓⵜ ⵉⵜⵜⴰⵡⵙⵏ ⴳ ⵓⴱⵔⵉⴷ ⵏ ⵓⵙⵢⴰⴼⵓ ⴷ ⵓⴼⴰⵔ ⵏ ⵜⵓⵙⵙⵏⴰ ⵙ ⵜⵎⴰⵣⵉⵖⵜ ⴷ ⵅⵉⴼⵙ, ⴷ ⵓⵣⵓⵣⵣⵔ ⵏ ⵓⵙⵉⵙⵙⵏ ⵙⵔⵙ ⴷⴰⵔ ⵓⴳⴷⵓⴷ ⵙ ⵎⴰⵕⵕⴰ ⵜⵉⵥⴹⴰⵕⵉⵏ ⵍⵍⴰⵏⵉⵏ.

ⵕⴰⵛⵉⴷ ⵏⴰⵊⵉⴱ