ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵉⵣⵣⵔⵉ ⵜⵉⴳⴰⵔⵉⵡⵉⵏ ⴰⴷ ⵓⵢⵓⵜⵓⴱⵔⵣ ⴰⵎⴰⵣⵉⵖ ⴰⵄⵔⵔⵉⵎ ⵎⵓⵄⴰⴷ ⵉⴷⴱⴰⵀⴰ ⵢⴰⵏ ⵓⴱⵓⴷⴽⴰⵙⵜ ⴳ ⵉⵙⵏⵓⴱⴳ ⴰⵄⵔⵔⵉⵎ ⴰⵎⴰⵣⵉⵖ ⵉⵜⵜⵓⵙⵙⴰⵏⵏ ⵙ ⴷⴷⴰ ⵎⵓⵃ, ⵍⵍⵉ ⵉⴳⴰⵏ ⴰⵎⵜⵡⴰⵍ ⵙⴳ ⵜⵙⴳⴰ ⵏ ⵙⵓⵙ ⵉⵥⵍⵉⵏ ⵖ ⵜⵙⵏⵎⴰⵍⴰⵢⵜ ⴷ ⵜⵖⵉⵙⵜ ⵜⵉⵎⵍⵥⵉⵜ. ⴰⵏⵎⵓⵇⵇⴰⵔ ⵍⵍⵉ ⴼ ⵙⴰⵡⵍⵏ ⴽⵉⴳⴰⵏ ⴰⵔⴰⵏ ⴼⵍⵍⴰⵙ ⵓⵍⴰ ⴽⵉⴳⴰⵏ ⵙⵍⴰⵡⵏ ⴰⴽⴽⵯ ⴳ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ.
ⴰⵡⴷ ⵏⴽⴽⵏⵉ ⵔⴰⴷ ⵏⵥⵍⵉ ⵜⵉⵖⵎⵔⵜ ⴰⴷ ⵉ ⵓⵎⴹⴰⴽⴰⵕ ⴷ ⴰⵢⵜⵎⴰⵜⵏⵖ ⵎⴰⵙⵙ ⵎⵓⵄⴰⴷ ⴷ ⵎⴰⵙⵙ ⴷⴷⴰ ⵎⵓⵃ, ⴰⵛⴽⵓ ⵜⵜⵓⴼⴽⴰⵏⵜ ⴽⵉⴳⴰⵏ ⵏ ⵜⴰⵏⵏⴰⵢⵢⵉⵏ ⵥⵍⵉⵏⵉⵏ ⵙ ⵓⵙⵓⵔⵙ ⵏ ⵜⵎⴰⵣⵉⵖⵜ ⴷ ⵡⴰⴷⴷⴰⴷⵏ ⵏ ⵉⵎⵏⵄⴰⵔⵏ ⵏⵏⵙ. ⵙⵍⴰⵡⵏ ⴰⴽⴽⵯ ⵍⵍⵉⵖ ⴹⴼⵕⵏ ⴽⵉⴳⴰⵏ ⵏ ⵎⵉⴷⴷⵏ ⴰⵏⵏ ⵜⴰⵙⴷⴷⵉⵜ ⴰⵏⵏ.
ⵜⵉⵣⵡⵉⵔⵉ ⵉⴳⴰ ⵜⵜ ⵍⵍⵉⵖ ⴼⴽⵏ ⴰⵢⵜⵎⴰⵜⵏⵖ ⴰⴷ ⵙ ⵡⴰⵜⵉⴷ ⵏ ⵓⵎⵙⴰⵡⴰⵍ ⴷ ⵓⵎⴹⴰⴽⴰⵕ, ⵙⵍⴰⵡⵏ ⴰⴽⴽⵯ ⵍⵍⵉⵖ ⵉⵙⴰⵡⵍ ⴷⴷⴰ ⵎⵓⵃ ⴼ “ⵜⵎⴰⴳⵉⵜ ⵏ ⵜⵖⴰⵔⵉⵡⵉⵏ”, ⴰⵢⵍⵍⵉ ⵉⵎⵎⴰⵍⴰⵏ ⵎⴰⵙ ⵓⵔ ⴰⵔ ⵉⵜⵜⴰⴳⵯⵉ ⵡⵉⵢⵢⴰⴹ ⴷ ⵓⵔ ⴰⵔ ⵉⵙⵙⵀⵔⴰⵛ ⵜⵓⴳⴳⵯⴰⵙ ⵍⵍⵉ ⵙⴽⴰⵔⵏ ⵡⵉⵢⵢⴰⴹ, ⴷ ⵍⵍⵉⵖ ⴷⴰⵔⵙ ⵢⴰⵏ ⵓⵙⵡⵉⵏⴳⵎ ⴷ ⵢⴰⵜ ⵜⴷⵍⵙⴰ ⵉⵜⵜⴰⵡⵙⵏ ⴳ ⵓⵎⵙⴰⵡⴰⵍ ⴷ ⵓⵎⵔⴰⵔⴰ ⵏ ⵡⴰⵡⴰⵍ. ⴰⵔ ⵜ ⵏⵏ ⵏⵜⵜⴰⴼⵉ ⵓⵍⴰ ⴰⵔ ⵢⴰⴷⴷⵔⴰ ⵜⵓⴳⵜ ⵏ ⵉⴼⵍⵙⴰⴼⵏ ⴷ ⵉⴷ ⴱⴰⴱ ⵏ ⵓⵙⵡⵉⵏⴳⵎ ⴷ ⵜⵓⵙⵙⵏⴰ, ⵣⵓⵏ ⴷ ⵍⵍⵉⵖ ⵉⴱⴷⵔ ⵙ ⵓⵎⴷⵢⴰ ⵏⵉⵜⵛ.
ⵜⴰⵖⴰⵡⵙⴰ ⵜⵉⵙ ⵙⵏⴰⵜ, ⵏⴽⴽⵉⵏ ⴰⵔ ⵏⵙⵓⵜⴳ ⴷ ⴰⵔ ⵏⵙⵙⵉⵎⵖⵓⵔ ⴱⴰⵀⵔⴰ ⵜⵓⴳⴳⵯⴰⵙ ⵍⵍⵉ ⵏⵏ ⵉⵜⵜⴳⴳⴰ ⵎⴰⵙⵙ ⵎⵓⵄⴰⴷ ⵓⵍⴰ ⵎⴰⵙⵙ ⴷⴷⴰ ⵎⵓⵃ ⴰⴼⴰⴷ ⴰⴷ ⵜⵟⵟⴼ ⵜⴷⵍⵙⴰ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⴷⵖⴰⵔ ⵏⵏⵙ ⴷ ⵢⵓⵙⴰⵏ ⴳ ⵓⵙⵡⵉⵔ ⵏ ⵢⵓⵜⵉⴱ ⴷ ⵎⴰⵕⵕⴰ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ. ⴰⵛⴽⵓ ⵜⴰⵎⴰⵣⵉⵖⵜ ⴰⵡⴷ ⵏⵜⵜⴰⵜ ⵜⵙⵖⴰⵡⵙⴰ ⵖⵉⵍⴰⴷ ⵓⴳⴳⴰⵔ ⵏ ⵎⴰⴷ ⵉⵣⵔⵉⵏ ⵙ ⵎⴰⴷ ⴼⵍⵍⴰⵙ ⵉⵙⴰⵡⴰⵍⵏ, ⴼ ⵓⵎⵣⵔⵓⵢ ⵏⵏⵙ ⴷ ⵜⵉⵍⴰⵡⵜ ⵏⵏⵙ ⴷ ⵉⵎⴰⵍ ⵏⵏⵙ, ⴰⴼⴰⴷ ⴰⴷ ⵓⵔ ⵜⴷⴷⵓ ⵉ ⵉⵅⴼ ⵏⵏⵙ ⵓⵍⴰ ⵜⴰⴼⴳⴰⵏⵉⵜ ⴰⴽⴽⵯ.
ⵖⵎⴽⵍⵍⵉ ⵏⵙⵙⵉⵎⵖⵓⵔ ⵜⵓⴳⴳⵯⴰⵙ ⵍⵍⵉ ⵢⴰⴽⴽⴰ ⴷⴷⴰ ⵎⵓⵃ ⵉ ⵜⵥⵓⵕⵉ ⵏ ⵓⵃⵡⴰⵛ, ⴰⵔ ⵉⵎⵎⴰⵍ ⵉⵏⴱⴷⴰⴷ ⵏⵏⵙ, ⵉⵍⵎⴷ ⵜⵓⴳⵜ ⵏ ⵜⵖⴰⵡⵙⵉⵡⵉⵏ ⵙⵔⵙ ⵉⵥⵍⵉⵏ ⴷ ⵉⵎⴰⵙⵙⵏ ⵏⵏⵙ ⵣⵓⵏ ⴷ ⵜⴰⵍⵍⵓⵏⵜ, ⵙ ⵓⵎⴷⵢⴰ ⵉⵎⵙⴰⵡⴰⵍⵏ ⵍⵍⵉ ⵉⵙⴽⵔ ⴷ ⵉⵏⵎⵖⵓⵔⵏ ⵏ ⵓⵃⵡⴰⵛ ⴳ ⵙⵓⵙ: ⴰⵊⵎⵎⴰⵄ, ⴱⵓⴷⴷⵀⴱ, ⵎⵓⵍⴰⵢ ⵄⵍⴰ ⵛⵓⵀⴰⴷ…ⵖⵎⴽ ⵍⵍⵉ ⵏⵙⵙⵉⵎⵖⵓⵔ ⴰⵏⵎⵓⵇⵇⴰⵔ ⵉⵙⵜⴰⵡⵀⵎⵎⴰⵏ ⵍⵍⵉ ⵉⵙⴽⵔ ⴷ ⵓⵎⴰⵙⵙⴰⵏ ⵙⵉⴷⵉ ⵎⵓⵍⵓⴷ ⵙⵙⴰⵔⵉⵔⵉ.
ⵓⵔ ⴱⴰⵀⵔⴰ ⵉⵔⵉ ⴷⴷⴰ ⵎⵓⵃ ⴰⵙⵓⵖⵍ ⵉⵜⵜⵓⵙⴽⴰⵔⵏ ⵉ ⵜⵡⵓⵔⵉⵡⵉⵏ ⵜⵉⵎⴰⴹⵍⴰⵏⵉⵏ (ⴰⵎ ⵜⴰⵙⴽⵍⴰ ⵏ ⴽⴰⴼⴽⴰ) ⵙⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ. ⴰⴷ ⵓⵔ ⵏⵜⵜⵓ ⵎⴰⵙ ⵉⵟⵟⴰⴼ ⵓⵙⵉⵏⴰⴳ ⵢⴰⵏ ⵡⴰⵎⵎⴰⵙ ⵏ ⵓⵔⵣⵣⵓ ⵉⵥⵍⵉⵏ ⵖⴰⵙ ⵉ ⵓⵙⵓⵖⵍ ⵉⵟⵟⴼ ⵉⵎⵔⵣⵓⵜⵏ ⵏⵏⵙ ⴷ ⵓⵖⴰⵡⴰⵙ ⵏⵏⵙ ⵏ ⵜⵡⵓⵔⵉ. ⵖ ⵓⵎⵏⵉⴷ ⴰⴷ, ⴰⵙⵓⵖⵍ ⵉⴳⴰ ⵢⴰⵜ ⵜⵖⴰⵔⴰⵙⵜ ⵏ ⵓⵙⴱⵓⵖⵍⵓ ⵏ ⵜⵓⵜⵍⴰⵢⵜ. ⵏⵙⵖⴰⵡⵙ ⵙ ⵓⵙⵓⵖⵍ ⵏ ⵎⴰⵕⵕⴰ ⵜⵉⵡⵓⵔⵉⵡⵉⵏ ⴳ ⵉⴳⵔⴰⵏ ⵏ ⵜⵙⴽⵍⴰ ⴷ ⵜⴼⵍⵙⴰⴼⵜ ⴷ ⵓⵙⵡⵉⵏⴳⵎ ⴷ ⵓⵎⵣⵔⵓⵢ ⴷ ⵜⵥⵓⵕⵉ. ⵉ ⵓⵙⴱⵓⵖⵍⵓ ⵏ ⵡⴰⵢⴷⴰ ⴰⵎⵉⵔⴰⵢ ⵏ ⵜⵓⵜⵍⴰⵢⵜ ⴰⴷ ⴷ ⵓⵙⵙⴰⵔⵓ ⵏⵏⵙ ⴳ ⵓⵙⵙⵍⵎⴷ ⴷⴼⴼⵉⵔ ⵏ ⵓⵙⵉⴷⴼ ⵏ ⵜⵎⴰⵣⵉⵖⵜ. ⴰⵔ ⵉⵜⵜⵉⵍⵉ ⵓⵙⵎⵔⵙ ⵏ ⵜⵡⵓⵔⵉⵡⵉⵏ ⴳ ⵓⵔⵣⵣⵓ ⴷ ⵓⵙⵙⵍⵎⴷ ⴷ ⵓⵙⵎⵓⵜⵜⴳ, ⵖⵎⴽ ⴰⵏⵏ ⵓⵍⴰ ⴰⵢⵍⵍⵉ ⵏⵉⵜ ⵓⵔⴰⵏ ⵉⵎⴰⵣⵉⵖⵏ ⵙ ⵉⵅⴼⴰⵡ ⵏⵏⵙⵏ ⴳ ⵜⵙⴽⵍⴰ ⵉⴷⵔⴰⵏ, ⴷ ⵎⴰⴷ ⵉⵍⵍⴰⵏ ⵏⵉⵜ ⵓⵍⴰ ⴳ ⵜⵙⴽⵍⴰ ⵜⴰⵎⵉⵡⴰⵏⵜ ⵖ ⵏⵉⵜ ⵍⵍⴰⵏⵜ ⵜⵏⴹⴹⴰⵎⵉⵏ ⵏ ⵓⵃⵡⴰⵛ ⴷ ⵉⵙⵓⵢⴰⵙ.
ⴰⵔ ⴱⴰⵀⵔⴰ ⵉⵜⵜⵏⵄⴰⵔ ⴷⴷⴰ ⵎⵓⵃ ⴼ ⵓⵃⵡⴰⵛ ⴷ ⵡⵉⵍⵍⵉ ⵎⵓ ⵉⵙⵙⴰⵖ “ⵉⴱⵍⴷⵉⵢⵏ”, ⴰⴷ ⵓⵔ ⵏⵜⵜⵓ ⵖⵉⴷ ⵎⴰⵙ ⴷ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵔ ⵜⵜ ⴱⴷⴷⴰ ⵉⵜⵜⴰⵡⵉ ⴳ ⵜⵥⵓⵕⵉⵡⵉⵏ ⵏ ⵓⵃⵡⴰⵛ, ⵍⵍⵉⵖ ⵉⵙⵎⵓⵏ ⵜⵉⵏⴰⴹⴹⴰⵎⵉⵏ ⵏ ⵉⵏⴹⴹⴰⵎⵏ, ⴷ ⵓⵙⵎⵖⵔ ⵏ ⵉⵏⴹⴰⵎⴰⵏ, ⴷ ⵓⵙⵏⵎⴰⵍⴰ ⵏ ⵜⵣⴷⵓⵖⵉⵏ ⵏ ⵉⵏⴰⵥⵓⵕⵏ ⴷ ⵓⵙⵏⵎⴰⵍⴰ ⵏ ⵉⵏⵄⵉⴱⴰⵕⵏ ⵉ ⵓⵙⵙⵔⵇⴱ ⵏ ⵜⵔⵓⴱⴱⴰ ⵏ ⵓⵃⵡⴰⵛ…
ⵉⵙⵇⵙⴰ ⴷⴷⴰ ⵎⵓⵃ ⵢⵉⵏⵉ: “ⵉⵙ ⵜⴳⴰ ⵜⵎⴰⵣⵉⵖⵜ ⵜⴰⴽⴰⴷⵉⵎⵉⵜ ?” . ⵏⵙⵇⵙⴰ ⵜ: ⵎⴰⴷ ⵉⴳⴰⵏ ⴰⴷ ⵜⴳ ⵢⴰⵜ ⵜⵓⵜⵍⴰⵢⵜ ⵜⴰⴽⴰⴷⵉⵎⵉⵜ ? ⵜⴰⵎⴰⵣⵉⵖⵜ ⵜⵔⴼⵓⴼⴰ ⴳ ⵎⴰⴷ ⵉⵣⵔⵉⵏ. ⵎⵇⵇⴰⵔ ⵖⵎⴽ ⴰⵏⵏ, ⵜⵟⵟⴰⴼ ⵜⴰⵙⴽⵍⴰ ⵏⵏⵙ ⴷ ⵜⵊⵕⵕⵓⵎⵜ ⵏⵏⵙ ⴷ ⵜⴷⵍⵙⴰ ⵏⵏⵙ ⵙⵔⵙ ⵉⵥⵍⵉⵏ, ⴰⵔ ⵉⵜⵜⴰⵍⵉ ⵓⵙⵎⵔⵙ ⵏ ⵎⴰ ⴰⴷ ⴳ ⴽⵉⴳⴰⵏ ⵏ ⵉⵙⵡⵉⵔⵏ ⵉⵎⴰⵙⵙⴰⵏⵏ. ⵖⵉⵍⴰⴷ ⵜⴰⵎⴰⵣⵉⵖⵜ ⴰⵔ ⵜⵜⵓⵖⵔⵉ ⴳ ⵜⵓⴳⵜ ⵏ ⵜⵙⴷⴰⵡⵉⵢⵉⵏ ⴷ ⵉⵙⵉⵏⴰⴳⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ, ⴳⵉⵙⵏ ⵏⵉⵜ ⴰⵙⵉⵏⴰⴳ ⵏ ⵉⵏⴰⵍⴽⵓ ⵍⵍⵉ ⵏⵏ ⴱⴰⵀⵔⴰ ⵓⵔ ⵢⴰⴳⴳⵓⴳⵏ ⴼ ⵜⵣⴷⵓⵖⵜ ⵏ ⴷⴷⴰ ⵎⵓⵃ ⴳ ⵜⵎⴰⵣⵉⵔⵜ ⵏ ⵜⵉⴼⴰⵡⵉⵏ. ⵜⴰⵎⴰⵣⵉⵖⵜ ⵖⵉⵍⴰⴷ ⴰⵔ ⴼⵍⵍⴰⵙ ⴷ ⴰⵔ ⵙⵔⵙ ⵜⵜⵓⵙⴽⵉⵔⵉⵏ ⵜⴱⵔⴰⵜⵉⵏ ⵜⵉⵎⴰⵙⵙⴰⵏⵉⵏ ⵖ ⵏⵉⵜ ⵍⵍⴰⵏⵜ ⵜⵉⵏ ⵜⵙⴷⴰⵡⵉⵜ ⵏ ⵜⵙⵏⵉⵊⵊⵉⵜ. ⵉⵙ ⴷ ⵎⴰ ⴰⴷ ⴰⴽⴽⵯ ⵓⵔ ⴰⵔ ⵉⵙⴽⴰⵔ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵓⵜⵍⴰⵢⵜ ⵉⴳⴰⵏ ⵜⴰⵎⴰⵙⵙⴰⵏⵜ ⵉⴳⴰⵏ ⵜⴰⴽⴰⴷⵉⵎⵉⵜ?!
ⵉⵏⵏⴰ ⴷⴷⴰ ⵎⵓⵃ ⵎⴰⵙ ⵓⵔ ⵏⵟⵟⴰⴼ ⵉⵡⵔⵉⴽⵏ ⵉⵎⴰⵣⵉⵖⵏ ⴷ ⵓⵙⴰⵏⵉⵏ ⵜⵜⵓⵙⵙⴰⵏⵏⵉⵏ ⵙ ⵓⵎⵢⴰⵙⴰ. ⵍⵍⴰⵏ ⴷⴰⵔⵏⵖ ⵏⴽⴽⵏⵉ ⵉⵎⴰⵣⵉⵖⵏ ⵜⵓⴳⵜ ⵏ ⵉⵡⵔⵉⴽⵏ ⴷ ⵉⵏⵎⵖⵓⵔⵏ ⵖ ,ⵉⵜ ⵉⵍⵍⴰ ⵍⵎⵅⵜⴰⵔ ⵙⵙⵓⵙⵉ ⵍⵍⵉ ⴱⴰⵀⵔⴰ ⵉⵜⵜⵓⴱⴷⴰⵔⵏ ⴳ ⵓⴱⵓⴷⴽⴰⵙⵜ. ⵉⵍⵉⵏ ⴷⴰⵔⵏⵖ ⵉⵡⵔⵉⴽⵏ ⵢⴰⴹⵏⵉⵏ ⵍⵍⵉ ⴷ ⵉⵇⵇⴰⵏⵏ ⴰⴷ ⵏⵙⵙⵏ ⵜⵓⴷⵔⵜ ⴷ ⵓⴼⴰⵔⵙ ⵏⵏⵙⵏ ⴷ ⵓⵎⵏⴰⴹ ⵖ ⵙⵡⵓⵔⵉⵏ, ⵔⴰⴷ ⴳⵉⵙⵏ ⵏⴱⴷⵔ: ⵎⵄⵎⵎⵔⵉ, ⵛⴰⴼⵉⵇ, ⵚⵉⴷⵇⵉ ⴰⵣⴰⵢⴽⵓ, ⴱⵓⴽⵓⵙ, ⴰⵡⵔⵉⴷ, ⴰⵅⵉⵢⵢⴰⵟ, ⵎⵓⵊⴰⵀⵉⴷ, ⵜⴰⵡⴼⵉⵇ, ⴷⴷⵖⵔⵏⵉ, ⵍⵢⵓⵙⵉ, ⵜⴰⴱⴰⵄⵎⵕⴰⵏⵜ ⵛⴰⵀⵓ, ⵄⴰⵚⵉⴷ…
ⵉⵜⵜⵓⴱⴷⴰⵔ ⴱⴰⵀⵔⴰ ⵍⵎⵅⵜⴰⵔ ⵙⵙⵓⵙⵉ ⴳ ⵓⴱⵓⴷⴽⴰⵙⵜ, ⴰⵡⵔⵉⴽ ⴰⴷ ⴰⵎⴰⵣⵉⵖ ⴰⵔ ⵜ ⴱⴰⵀⵔⴰ ⵙⵙⵉⵎⵖⵓⵔⵏ ⵉⵎⴰⵣⵉⵖⵏ. ⴰⴷ ⴽⴰ ⵏⵓⵔⵔⵉ ⵙ ⴰⵢⵍⵍⵉ ⵓⵔⴰⵏ ⴽⵔⴰ ⵏ ⵉⵎⵔⵣⵓⵜⵏ ⴼ ⵍⵎⵅⵜⴰⵔ ⵙⵙⵓⵙⵉ ⵣⵓⵏ ⴷ: ⴱⵓⴽⵓⵙ, ⴰⵣⴰⵢⴽⵓ, ⵜⴰⵡⴼⵉⵇ, ⴷⴷⵔⵇⴰⵡⵉ, ⵅⴰⵍⵉⵍ…
ⴷⴷⴰ ⵎⵓⵃ ⵓⵔ ⵜ ⵉⵙⵙⵓⵙⵎ ⵓⴱⵔⵉⴷ ⵏ ⵓⵙⵎⵙⴰⵙⴰ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵡⵉⵔ ⵏ ⵜⵡⵓⵔⵉ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ. ⵙⵍⴰⵡⴰⵏ ⴰⴽⴽⵯ ⵉⵖ ⵏⵙⵙⵏ ⵎⴰⵙ ⵉⵙⵡⵓⵔⵉ ⵡⴰⵎⵎⴰⵙ ⵉⵥⵍⵉⵏ ⴳ ⵓⵙⵉⵏⴰⴳ ⵙ ⵉⵙⵍⴳⵏⵏ ⵉⵎⴰⵙⵙⴰⵏⵏ ⵜⵜⴰⵡⵙⵙⴰⵏⵏⵉⵏ. ⵖⵉⴷ ⵓⵔ ⵏⵓⴼⵉ ⴰⴷ ⵏⴻⵏⵏⴻⴰ ⵎⴰⵙ ⵓⵔ ⵉⴳⵉ ⵍⵃⴰⵍ ⵜⵓⵜⵍⴰⵢⵜ ⵏ ⵓⵙⴰⵔⵎ. ⴰⵛⴽⵓ ⴰⵙⵎⵙⴰⵙⴰ ⵏ ⵜⵓⵜⵍⴰⵢⵜ ⴰⵔ ⵉⵜⵜⵉⵍⵉ ⵙ ⵜⵡⵓⵔⵉ ⵉⴳⴰⵏ ⵜⴰⵎⵔⵙⵍⴰⵏⵜ ⵉⴱⴷⵏ ⴼ ⵜⵔⵙⴰⵍ ⵜⵉⵎⴰⵙⵙⴰⵏⵉⵏ ⴷ ⵜⵉⵔⵎⵉⵜⵉⵏ. ⴰⴷ ⵏⵥⵕ ⵖⴰⵙ ⵜⵉⵢⵢⴰⴼⵓⵜⵉⵏ ⵜⵜⵓⵙⴽⴰⵔⵏⵉⵏ ⴳ ⵉⵙⵡⵉⵔⵏ ⵏ ⵓⵙⵙⵍⵎⴷ ⴷ ⵓⵙⵏⵖⵎⵙ ⴷ ⵓⵎⵢⴰⵡⴰⴹ ⴷ ⵜⵉⵔⵔⴰ ⵙ ⵜⵎⴰⵣⵉⵖⵜ ⴷ ⵓⵎⵙⴰⵡⴰⴹ ⵏⴳⵔ ⵡⵉⵍⵍ ⵙⵔⵙ ⵉⵙⴰⵡⴰⵍⵏ ⴳ ⵜⵎⴰⵣⵖⴰ ⴰⴽⴽⵯ.
ⴰⴷ ⴳⴳⵔⵓⵖ ⵙ ⵎⴰⴷ ⵉⵏⵏⴰ ⴷⴷⴰ ⵎⵓⵃ ⴼ ⵜⴳⵓⵔⵉ “ⵜⴰⵎⴰⵣⵉⵖⵜ” ⵢⵉⵏⵉ ⵎⴰⵙ ⵏⵙⵖⴰⵡⵙⴰ ⴰⴷ ⵏⵥⵕ ⴰⵥⵓⵕ ⵏⵙ ⴰⵎⴰⵙⵙⴰⵏ ! ⵎⴰⵛ ⵓⵔ ⴰⵖ ⵜ ⵉⵎⵍⵉ, ⵏⴻⵏⵏⵓⵔⵣ ⴰⴷ ⴰⵖ ⵜ ⵉⵎⵍ ⵖ ⵎⴰⴷ ⵢⴰⵥⵏ. ⴰⵛⴽⵓ ⵣⵓⵏ ⴷ ⵖⵎⴽ ⴰⵏⵏ ⵏⵉⵜ ⴰⴷ ⴰⵖ ⵜⵜⵉⵏⵉⵏ ⵡⴰⵄⴷⵉⵡⵏ ⵏ ⵜⵎⴰⵣⵉⵖⵜ.
