ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
5 ⵏ ⵉⵎⵏⵣⴰⵢⵏ ⵉⵅⴰⵜⴰⵔⵏ, 40 ⵏ ⵉⵙⵖⵍⴰⴼ ⵉⵙⴳⵓⵎⴰⵏⵏ, ⴷ 10 ⵏ ⵉⵙⵖⵍⴰⴼ ⵉⵎⴰⵜⴰⵢⵏ
ⵉ ⵓⵙⴷⵓⵙ ⴷ ⵓⵙⴱⵓⵖⵍⵓ ⵏ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵓⵙⵏⵎⴰⵍⴰ ⴰⵏⵉⵎⴰⵏ ⵏ ⵜⵏⵖⵎⴰⵙⵜ ⴷ ⵜⵥⵕⵉⴳⵜ
ⵉⵙⵎⵏⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵎⵙⵙⴽⵜⵉⵜ ⵏⵏⵙ ⵅⴼ ⵓⵙⵏⵜⵉ ⵏ ⵓⵙⵍⴳⵏ ⵡⵉⵙⵙ 026.25 ⵉⵥⵍⵉⵏ ⵙ ⵡⴰⵍⴰⵙⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵏⵖⵎⴰⵙⵜ, ⵅⴼ ⵓⵙⵓⵜⵔ ⵏ ⵓⵎⵏⴰⴷ ⵏⵏⴰ ⵜ ⵉⴷ ⵉⵍⴽⵎ ⵙⴳ ⴷⴰⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ 16 ⵢⵓⵍⵢⵓⵣ 2025.
ⵉⴱⴷⴷ ⵓⵙⵇⵇⵉⵎ ⴳ ⵜⵎⵙⵙⴽⵜⵉⵜ ⵏⵏⵙ ⵅⴼ ⵓⵙⴰⵜⵉ ⵉⵏⵏⴰⵍⵏ ⵅⴼ ⵓⴷⵓⵙⵜⵓⵔ ⴷ ⵅⴼ ⵜⵏⵜⵜⴰⵎⵉⵏ ⵜⵉⴳⵔⴰⵖⵍⴰⵏⵉⵏ ⵏⵏⴰ ⵅⴼ ⵜⵙⵖⵣⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙⵍⴰⵡⴰⵏ ⴰⴽⴽⵯ ⵜⴰⵎⵜⵜⴰⵏⵜ 19 (ⴰⵣⵔⴼ ⴳ ⵜⴷⵔⴼⵉ ⵏ ⵓⵎⵏⴰⴷ ⴷ ⵓⵡⵏⵏⵉ) ⵙⴳ ⵓⵎⵉⵔⵓ ⴰⴳⵔⴰⵖⵍⴰ ⵉⵥⵍⵉⵏ ⵙ ⵉⵣⵔⴼⴰⵏ ⵉⵖⵔⵎⴰⵏⵏ ⴷ ⵉⵙⵔⵜⴰⵏⵏ. ⵎⴽⴷⴰ ⵉⵙⴽⵔ ⵙ ⵜⴳⵔⵓⵎⵎⴰ ⵏ ⵜⵉⵔⵎⵉⵜⵉⵏ ⵜⵉⵏⵙⵏⵎⵣⴰⵣⴰⵍⵉⵏ ⴳ ⵢⵉⴳⵔ ⵏ ⵉⵏⴳⵎⴰⵎⵏ ⵏ ⵓⵙⵏⵎⴰⵍⴰ ⴰⵏⵉⵎⴰⵏ ⵏ ⵜⵣⵣⵓⵍⵜ ⵏ ⵜⵏⵖⵎⴰⵙⵜ.
5 ⵏ ⵉⵎⵏⵣⴰⵢⵏ ⵉⵙⵓⵜⴰⵢ ⴷ 40 ⵏ ⵉⵙⵖⵍⴰⴼ ⵓⵏⵖⵉⴷⵏ
ⵙ ⵓⵙⵏⵜⵉ ⵙⴳ ⵉⵥⵕⵉ ⵏ ⵜⵉⵔⵎⵉⵜⵉⵏ ⵜⵉⵏⵙⵏⵎⵣⴰⵣⴰⵍⵏ ⵏ ⵉⵏⴳⵎⴰⵎⵏ ⵏ ⵓⵙⵏⵎⴰⵍⴰ ⴰⵏⵉⵎⴰⵏ ⵏ ⵜⵣⵣⵓⵍⵜ ⵏ ⵜⵏⵖⵎⴰⵙⵜ ⴷ ⵜⵖⵓⵔⵉ ⵏⵏⵙⵏⵜ, ⵙ ⵓⵎⵣⴰⵔⴰⵢ ⵏ ⵉⵙⵎⴰⵡⵏ ⵏⵏⵙⵏⵜ ⴷ ⵓⵎⵢⴰⵏⴰⵡ ⵏ ⵜⴰⵍⵖⵉⵡⵉⵏ ⵏⵏⵙⵏⵜ ⴷ ⵜⵡⵉⵍⴰⵜⵉⵏ ⵏⵏⵙⵏⵜ, ⵉⵙⵎⴷ ⵓⵙⵇⵇⵉⵎ ⴳ ⵜⵎⵙⵙⴽⵜⵉⵜ ⵏⵏⵙ ⵎⴰⵙ ⴷⴰ ⵜⵜⵓⵙⵏⵎⴰⵍⴰⵏⵜ ⴳ ⵎⴰⴷ ⵉⵥⵍⵉⵏ ⵙ ⵜⵓⵚⴽⵉⵡⵜ ⵏⵏⵙⵏⵜ ⴷ ⵜⴱⵔⵉⴷⵜ ⵏ ⵓⵙⵜⴰⵢ ⵏ ⵉⴳⵎⴰⵎⵏ ⵏⵏⵙⵏⵜ, ⴷ ⵜⵡⵓⵔⵉⵡⵉⵏ ⵏⵏⵙⵏⵜ ⵜⵉⵎⵢⴰⵏⴰⵡⵉⵏ, ⵙ ⵓⵎⵙⴰⵙⴰ ⴷ ⵙⵎⵎⵓⵙ ⵏ ⵉⵎⵏⵣⴰⵢⵏ ⵉⴷⵙⵍⴰⵏⵏ ⵏⵜⵜⵏⵉ ⴷ: ⵜⴰⴷⵔⴼⵉ ⵏ ⵓⵡⵏⵏⵉ, ⴰⵙⵎⴷⵢⴰ, ⴰⵎⵢⴰⵏⴰⵡ, ⵜⴰⵙⵉⵎⴰⵏⵜ, ⴷ ⵜⵉⵙⵓⵙⵖⵜ. ⵉⵙⵡⵓⵔⵉ ⵓⵙⵇⵇⵉⵎ ⵅⴼ ⵓⵙⴼⵙⵉ ⵏ ⵉⵙⴱⴷⴰⴷⵏ ⵏ ⵓⵙⵏⵜⵉ ⵏ ⵓⵙⵍⴳⵏ ⵡⵉⵙⵙ 026.25, ⴳ ⵓⵙⵙⵉⴷⴷ ⵏ ⵉⵎⵏⵣⴰⵢⵏ ⴰⴷ ⵙ ⵙⵎⵎⵓⵙ.
ⵙⴳ ⵎⴰⵢⴰⴷ, ⵜⵣⵎⵎⴻⵎ ⵜⵎⵙⵙⴽⵜⵉⵜ ⵏ ⵓⵙⵇⵇⵉⵎ ⵜⴰⴳⵔⵓⵎⵎⴰ ⵏ ⵜⴰⵏⵏⴰⵢⵉⵏ ⵉⵥⵍⵉⵏ ⵙ ⵜⴰⵍⵖⴰ ⴷ ⵜⵓⵎⴰⵢⵜ ⵏ ⵉⵙⴱⴷⴰⴷⵏ ⵏ ⵓⴹⵕⵉⵚ ⵏ ⵓⵙⵏⵜⵉ ⵏ ⵓⵙⵍⴳⵏ, ⵉⵙⵎⵏⵉⴷ ⵅⵉⴼⵙⵏⵜ ⵉⵙⵓⵎⵔⵏ ⴷ ⵉⵙⵖⵍⴰⴼⵏ.
ⴳ ⵎⴰⴷ ⵉⵥⵍⵉⵏ ⵙ ⵜⴰⵍⵖⴰ :
- ⴰⵙⵉⴷⴼ ⵏ ⵜⵣⵡⵓⵔⵜ ⵉ ⵓⴹⵕⵉⵚ;
- ⴰⵍⴰⵙ ⵏ ⵜⵓⵚⴽⴰ ⵏ ⵜⵓⵚⴽⵉⵡⵜ ⵏ ⵓⴹⵕⵉⵚ;
- ⴰⵙⵏⵎⵍ ⵏ ⴽⵔⴰ ⵏ ⵉⵔⵎⵎⵓⵙⵏ ⵉⴷⵙⵍⴰⵏⵏ;
- ⴰⴷⴷⵓⵔ ⵏ ⵓⵎⴹⴰⴽⴰⵕ ⵏ ⵓⵙⵏⵜⵉ ⵏ ⵓⵙⵍⴳⵏ ⵙ ⵜⵡⵉⵍⴰ ⵜⴰⵎⵢⴰⴽⵓⴷⵜ ⴰⴽⴷ ⵓⵙⵏⴰⵎ ⵏ ⵉⵙⵍⴳⵏⵏ ⵢⴰⴹⵏⵉⵏ ⵉⵙⵏⴰⵢⵏ ⴰⵙⵍⴳⵏ ⵏ ⵜⵏⵖⵎⴰⵙⵜ ⴷ ⵜⵥⵕⵉⴳⵜ ⵉ ⵜⵏⴼⵔⵓⵜ ⵏ ⵓⵎⵍⴰⵍⴰ ⵏⵏⵙⵏ ⴷ ⵓⵎⵙⴰⵙⴰ ⵏⵏⵙⵏ.
ⴳ ⵎⴰⴷ ⵉⵥⵍⵉⵏ ⵙ ⵜⵓⵎⴰⵢⵜ :
- ⴰⵎⵓⵏ ⴳ ⵜⵎⵙⵙⴽⵜⵉⵜ ⵏ ⵓⵙⵇⵇⵉⵎ ⵉⵙⵖⵍⴰⴼⵏ ⵉⵥⵍⵉⵏ ⵙ:
- ⴰⵙⵙⴼⴰⵡ ⵏ ⵡⴰⵏⴰⵡ ⵓⵍⴳⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵏⵖⵎⴰⵙⵜ, ⵙ ⵎⴰⴷ ⵉⴷⵔⵓⵏ ⴳ ⵓⵙⴷⵓⵙ ⵏ ⵜⵡⵓⵔⵉⵡⵉⵏ ⵏⵏⵙ ⴷ ⵓⵙⴷⵓⵙ ⵏ ⵜⵏⴼⵔⵓⵜ ⵏ ⵉⵣⵔⴼⴰⵏ ⵏ ⵉⵎⵙⵡⵓⵔⵉⵢⵏ ⵏⵏⵙ;
- ⴰⵙⴷⵓⵙ ⵏ ⵜⵙⵉⵎⴰⵏⵜ ⵜⴰⵎⵔⵙⴰⵍⵜ ⴷ ⵜⵙⵖⵏⴰⵏⵜ ⵏ ⵜⵎⵔⵙⵍⵜ ⴷ ⵓⴱⵟⵟⵓ ⵏⴳⵔ ⵓⵏⴳⵎⴰⵎ ⵏ ⵓⵙⵡⵓⴷⴷⵓ ⴰⵙⵖⵏⴰⵏ ⴷ ⵓⵏⴳⵎⴰⵎ ⵏ ⵓⵖⵜⵙ ⴳ ⵜⵎⵙⴰⵔⵉⵏ ⵉⵣⴷⵉⵏ ⵙ ⵜⵖⴰⵔⴰⵏⵉⵏ;
- ⴰⵙⴷⵓⵙ ⵏ ⵓⵎⵢⴰⵙ ⴳ ⵜⵓⵚⴽⵉⵡⵜ ⵏ ⵓⵙⵇⵇⵉⵎ ⴷ ⵓⵙⵎⴷⵢⴰ ⵏ ⵙⵉⵏ ⵉⵙⵎⵉⵍⵏ ⵏ ⵉⵎⵥⵕⴰⴳⵏ ⴷ ⵉⵏⵖⵎⴰⵙⵏ;
- ⴰⵙⴷⵓⵙ ⵏ ⵓⵙⵎⴷⵢⴰ ⴰⵡⵜⵎⴰⵏ;
- ⴰⵙⵉⴷⴼ ⵏ ⵜⴷⴰⴱⵓⵜⵉⵏ ⵜⵉⵎⵓⵟⵟⵓⵏⵉⵏ ⴷ ⵜⴰⵍⵖⵉⵡⵉⵏ ⵜⵉⵎⴰⵢⵏⵓⵜⵉⵏ ⵏ ⵜⵏⵖⵎⴰⵙⵜ;
- ⴰⵙⵔⵙ ⵏ ⵉⵎⵉⵙ ⵏ ⵓⴽⵛⵛⵓⵎ ⴰⵎⵖⴰⵡⵍ ⴳ ⵡⴰⴷⴷⴰⴷⵏ ⵏ ⵉⵣⵔⴰⵢⵏ ⵉⵅⴰⵜⴰⵔⵏ;
- ⴰⵙⴷⵓⵙ ⵏ ⵓⵙⴰⵜⵉ ⴰⴼⵔⴳⴰⵏ ⵏ ⵉⵣⵔⴼⴰⵏ ⵉⴷⵙⵜⴰⵔⵏ ⵏ ⵉⵏⵖⵎⴰⵙⵏ ⵙⵍⴰⵡⴰⵏ ⴰⴽⴽⵯ ⴳ ⵎⴰⴷ ⵉⵥⵍⵉⵏ ⵙ ⵜⵏⴱⴰⴹⵜ ⵜⴰⵙⵛⵍⵓⵍⴼⵜ ⵏ ⵓⵙⵇⵇⵉⵎ ⵙ ⵎⴰⴷ ⵉⴹⵎⵏⵏ ⵜⴰⵏⴼⵔⵓⵜ ⵏ ⵓⵎⵏⵣⴰⵢ ⵏ ⵓⵎⵙⴰⵙⴰ ⴷ ⵓⵙⵖⵓⵏ ⴷ ⵓⵙⵙⴽⴼⵍ (…).
10 ⵏ ⵉⵙⵖⵍⴰⴼ ⵉⵎⴰⵜⴰⵢⵏ ⵉ ⵓⵙⴷⵓⵙ ⵏ ⵓⴼⵔⴰⴳ ⵏ ⵓⵣⵔⴼ ⴳ ⵜⴷⵔⴼⵉ ⵏ ⵓⵡⵏⵏⵉ :
ⵅⴼ ⵉⴳⴳⵉ ⵏ ⵉⵙⵖⵍⴰⴼⵏ ⵏ ⵓⵙⵇⵇⵉⵎ ⵉⵥⵍⵉⵏ ⵙ ⵜⵎⴰⴷⴷⴰⵙⵉⵏ ⵏ ⵓⵙⵏⵜⵉ ⵏ ⵓⵙⵍⴳⵏ, ⴰⵎⵓⵏ ⴳ ⵜⵎⵙⵙⴽⵜⵉⵜ 10 ⵏ ⵉⵙⵖⵍⴰⴼ ⵉⵎⴰⵜⴰⵢⵏ ⵉⵙⵙⴽⵜⴰⵢⵏ ⵙ ⵡⴰⴷⴷⵓⵔ ⵏ ⵓⵙⵖⵣⵏ ⵏ ⵉⵙⵏⴰⵎⵏ ⵉⴷⵙⵍⴰⵏⵏ ⴳ ⵓⵏⴰⴳⵔⴰⵡ ⵏ ⵓⵣⵔⴼ ⴳ ⵓⵎⵏⵉⴷ ⴷ ⵜⴷⵔⴼⵉ ⵏ ⵓⵡⵏⵏⵉ ⵉⴹⵎⵏⵏ ⴰⵙⴷⵓⵙ ⵏ ⵜⵏⴼⵔⵓⵜ ⵏ ⵜⵡⵏⵏⴰⴹⵜ ⵜⴰⵏⵖⵎⴰⵙⵜ ⴷ ⵜⵏⵖⵎⴰⵙⵜ ⵜⴰⵣⵔⴼⴰⵏⵜ, ⴽⴽⴰⵏ ⵢⴰⴷ ⵍⵍⴰⵏ ⴳ ⵉⵎⵏⴰⴷⵏ ⴷ ⵜⵎⵙⵙⴽⵜⵉⵜⵉⵏ ⵉⵣⵡⵓⵔⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵙⴳⵉⵙⵏ:
- ⴰⵙⵙⴰⵔ ⵏ ⵓⵙⵖⵣⵏ ⵏ ⵓⵙⵍⴳⵏ ⵉ ⵓⵙⴷⵉⵡⵍ ⵏ ⵓⵎⵍⴰⵏ;
- ⴰⵙⴷⵔⵓⵙ ⵏ ⵓⴽⵛⵛⵓⵎ ⴰⵣⵣⵔⴰⴼ ⴳ ⵢⵉⴳⵔ ⵏ ⵜⵏⵖⵎⴰⵙⵜ ⴷ ⵓⵙⵉⵣⵡⵔ ⵏ ⵜⵎⵥⵍⴰ ⵏ ⵓⵙⵏⵎⴰⵍⴰ ⴰⵏⵉⵎⴰⵏ;
- ⴰⵙⵖⵓⵏ ⵏ ⵓⵙⵎⵉⵔⵉⵡ ⵏ ⵓⵙⴰⵢⵔⴰⵔ ⵏ ⵜⴷⵔⴼⵉ ⵏ ⵓⵡⵏⵏⵉ ⵙⴳ ⵜⴷⵔⴼⵉ ⵏ ⵜⵏⵖⵎⴰⵙⵜ ⵖⵔ ⵜⴷⵔⴼⵉ ⵏ ⵍⵎⵉⴷⵢⴰ;
- ⴰⵏⵏⴰⵍ ⵏ ⵜⵙⵉⵎⴰⵏⵜ ⵏ ⵜⵎⵙⵙⵏⵜⵉⵜⵉⵏ ⵜⵉⵏⵖⵎⴰⵙⵉⵏ ⴰⵎ ⵓⴽⵛⵛⵓⵎ ⵉ ⵓⵙⴷⵓⵙ ⵏ ⵜⴷⵔⴼⵉ ⵏ ⵓⵡⵏⵏⵉ;
- ⴰⵙⴱⴷⴷⵉ ⵏ ⵓⵡⵏⵏⵉ ⵏ ⵓⴽⵙⴰⵏ ⴳ ⵓⵙⴰⵜⵉ ⵏ ⵓⵙⵏⵎⴰⵍⴰ ⴰⵏⵉⵎⴰⵏ ⴷ ⵙ ⵓⵎⵙⴰⵙⴰ ⴷ ⵉⵏⴰⵡⴰⵢⵏ ⵉⵣⵔⴼⴰⵏⵏ;
- ⵜⵓⵙⵙⵔⴰ ⵏ ⵉⵙⵍⴳⵏⵏ ⵉⵏⴱⴽⴰⴹⵏ ⵉⵥⵍⵉⵏ ⵙ ⵓⵊⴷⴰⵔ ⴷ ⵓⵙⵏⴼⵍ ⵏⵏⵙⵏ ⵙ ⵉⵙⵍⴳⵏⵏ ⵉⵖⵔⵎⴰⵏⵏ ⵉⵎⵙⴰⵙⴰⵏ ⴷ ⵉⵏⴰⵡⴰⵢⵏ ⵉⵣⵔⴼⴰⵏⵏ;
- ⴰⵙⵖⵣⵏ ⵏ ⵜⵏⵜⵜⴰⵎⵜ ⵉⵥⵍⵉⵏ ⵙ ⵜⵖⴰⵔⴰⵡⵉⵏ ⵏ ⵓⵙⵓⵙⵙⵏ (…).
ⵍⵍⵉⵖ ⵉⵙⵎⵏⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵎⵙⵙⴽⵜⵉⵜ ⵏⵏⵙ ⵉ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵉ ⵉⵎⵙⴽⴰⵔⵏ/ⵜⵉⵎⵙⴽⴰⵔⵉⵏ ⴷ ⴰⴽⴽⵯ ⵉⵏⵎⵓⵔⴰⵏ/ⵜⵉⵏⵎⵓⵔⵉⵢⵉⵏ, ⵍⴰ ⵉⵜⵜⵎⴳⵕⴰⵥ ⵉ ⵡⴰⵔ ⴰⵙⵣⵎⵔ ⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵅⴼ ⵉⵥⵕⵉ ⵏⵏⵙ ⴷⴰⵜ ⴷ ⴳ ⵓⵣⵎⵣ ⵏ ⵓⵎⴹⴰⴽⴰⵕ ⵏ ⵓⵙⵏⵜⵉ ⵏ ⵓⵙⵍⴳⵏ 026.25 ⴷ ⵓⵙⵜⴰⵢ ⵅⵉⴼⵙ. ⴰⵔ ⵉⵜⵜⴰⵏⵏⴰⵢ ⵓⵙⵇⵇⵉⵎ ⵎⴰⵙ ⵜⵙⵓⵍ ⵜⵎⵍⴷⴰ ⴷⴰⵜ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕⵏ ⵉ ⵉⵥⵕⵉ ⵏ ⵉⵙⵖⵍⴰⴼ ⵏⵏⵙ ⴳ ⵓⵙⴰⵜⵉ ⵏ ⵓⵎⴹⴰⴽⴰⵕ ⵏ ⵉⵙⴱⴷⴰⴷⵏ ⵏ ⵓⵙⵏⵜⵉ ⵏ ⵓⵙⵍⴳⵏ. ⵎⴽⴷⴰ ⵉⵜⵜⵙⴷⴷⵉⴷ ⵓⵙⵇⵇⵉⵎ ⴰⵙⵓⵖⵏ ⵏⵏⵙ ⵙ ⵓⵙⴽⴰⵔ ⵏ ⵜⵙⵎⵉⴳⴰⵍ ⵏⵏⵙ ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏⵏⵉ ⴰⵙ ⵉⵜⵜⵓⵙⵎⴰⴳⵍⵏ ⴷ ⵙ ⵓⵎⵙⴰⵙⴰ ⴷ ⵉⵣⵎⴰⵣ ⵏⵏⴰ ⵉⵙⵡⵓⵜⵜⵓ ⵓⵙⵍⴳⵏ ⵡⵉⵙⵙ 76.15 ⵉⵥⵍⵉⵏ ⵙ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏⵏⵙ.
ⵉ ⵓⵙⵙⴽⵜⵉ, ⵢⵓⴳⴳⴰ ⵏⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵣⵎⵣ ⵏ ⵢⴰⵏ ⵡⴰⵢⵢⵓⵔ ⵉⵙⵎⴷⵏ ⴰⴽⴽⵯ ⵉⵎⵏⴰⴷⵏ ⵉⵜⵜⵓⵡⵏⵏⴰⵏ ⵅⴼ ⵓⵙⵏⵜⵉ ⵏ ⵓⵙⵍⴳⵏ, ⵉⵖⵔ ⵜⵏ, ⴷ ⵉⵙⵙⴼⵍⴷ ⵙ ⵜⵡⵉⵍⴰ ⵜⵓⵙⵔⵉⴷⵜ ⵉ ⵉⵎⵙⴽⴰⵔⵏ ⵉⵏⵜⴰⵢⵏ. ⵉⵙⵏⵎⴰⵍⴰ ⵓⵙⵇⵇⵉⵎ ⵜⵉⵣⵡⵉⵔⵉ ⵏ ⵉⵎⴰⵍⴰⵙⵙ ⴰⴷ ⵜⵉⵖⵉⵎⵉⵜⵉⵏ ⵏ ⵓⵙⵙⴼⵍⴷ ⴷ ⵓⵎⵢⴰⵖ ⵉⵥⵍⵉⵏ (8 ⵜⵉⵖⵉⵎⵉⵜⵉⵏ), ⴷ ⵢⴰⵜ ⵜⵙⵇⵇⴰⵢⵎⵓⵜ, ⴷⵔⵓⵏ ⴳⵉⵙⵏ ⵉⵎⵣⵣⵓⵍⴰⵏⵏ ⴷ ⵉⵏⵖⵎⴰⵙⵏ ⴷ ⵉⵎⵓⵣⴰⵢⵏ ⴷ ⵉⵙⵉⵎⴰⵏⵏ. ⵢⵉⵡⵣ ⵓⵙⵇⵇⵉⵎ ⵅⴼ ⵜⵖⵓⵔⵉ ⵉ ⴰⴽⴽⵯ ⵉⵏⴳⵎⴰⵎⵏ ⵉⵎⵣⵣⵓⵍⴰⵏⵏ ⴷ ⵉⵎⵓⵍⵍⵉⵢⵏ ⵙ ⵜⴼⵔⵉⵙⵜ ⵏⵏⵙⵏ ⵜⴰⵙⵏⵎⴰⵍⴰⵏⵜ, ⴷ ⵜⵙⵇⵇⵉⵎⵜ ⵜⴰⵣⵎⵣⴰⵏⵜ ⵉ ⵓⵙⵡⵓⴷⴷⵓ ⵏ ⵜⵎⵙⴰⵔⵉⵏ ⵏ ⵢⵉⴳⵔ ⵏ ⵜⵏⵖⵎⴰⵙⵜ ⴷ ⵜⵥⵕⵉⴳⵜ ⴷ ⵜⵎⴰⵡⴰⵙⵜ ⵏ ⵉⵄⵔⵔⵉⵎⵏ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ. ⵍⵍⵉⵖ ⴷⴰ ⵉⵙⵎⵏⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⵏⵉⵎⵎⵔ ⵉ ⵉⵏⴳⵎⴰⵎⵏ ⴰⴷ, ⵍⴰ ⵉⵜⵜⵙⴷⴷⵉⴷ ⵎⴰⵙ ⵙⵓⵍⵏ ⵉⵏⴳⵎⴰⵎⵏ ⵉⵜⵜⵡⴰⵏⵏⴰⵏ ⵡⴰⵃⴷⴰⵜⵏ ⴰⴷ ⵉⴳⴰⵏ ⵉⵎⵙⵜⴳⴳⴰⵔⵏ ⵅⴼ ⵓⵙⵎⴰⵔⵉ ⵏ ⵡⵉⵏ ⵜⵏ ⵉⵙⵎⴷⵢⴰⵏ, ⵉⵖ ⵉⴳⴰ ⵖ ⵜⵉⵖⵉⵎⵉⵜⵉⵏ ⵏ ⵓⵙⵙⴼⵍⴷ ⵏⵖ ⴳ ⵜⵙⵇⵇⴰⵢⵎⵓⵜ ⵏⵏⴰ ⵉⵙⵏⵓⴱⴳ ⵓⵙⵖⵉⵎ ⵏ ⵓⵙⵇⵇⵉⵎ.
ⵎⵇⵇⴰⵔ ⵎⴰⴷ ⵉⵣⵎⵎⴻⵎ ⵓⵙⵇⵇⵉⵎ ⵏ ⵓⵍⴷⴰⵢ ⵉⵣⵢⵢⵔⵏ ⴳ ⵉⵎⵏⴰⴷⵏ ⵏⴳⵔ ⵉⵏⴳⵎⴰⵎⵏ ⵉⴷⵔⵓⵏ ⴷ ⵓⵎⵣⴰⵔⴰⵢ ⵏ ⵉⵎⵏⴰⴷⵏ ⵏⵏⵙⵏ ⵅⴼ ⵓⵙⵏⵜⵉ ⵏ ⵓⵙⵍⴳⵏ, ⵢⵉⵡⵣ ⵓⵙⵇⵇⵉⵎ ⵅⴼ ⵓⵙⵣⵎⵔ ⵏ ⴰⴽⴽⵯ ⵉⵏⴳⵎⴰⵎⵏ ⴰⴷ ⴼⴽⵏ ⵉⵎⵏⴰⴷⵏ ⵏⵏⵙⵏ ⴷ ⵉⵙⵎⴰⵇⵇⵍⵏ ⵏⵏⵙⵏ, ⵙ ⵎⴰⴷ ⵉⵎⵙⴰⵙⴰⵏ ⴷ ⵜⵉⵍⴰⵍⵜ ⵏⵏⵙ ⴰⵎ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵜⴰⵏⵎⴰⴳⵓⵜ ⴷ ⵜⵙⵉⵎⴰⵏⵜ, ⴷ ⵜⵎⵢⴰⴷⴰⵙⵜ ⵏⵏⵙ ⴳ ⵓⵙⵎⵓⵜⵜⴳ ⵏ ⵓⵎⵏⵉⴷ ⵏⵏⵙ ⴷ ⵉⵙⵖⵍⴰⴼ ⵏⵏⵙ, ⵙ ⵎⴰⴷ ⵉⵎⵙⴰⵙⴰⵏ ⴷ ⵜⵡⵓⵔⵉⵡⵉⵏ ⵏⵏⵙ ⴳ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ ⴷ ⵓⴼⵔⴰⴳ ⵏⵏⵙⵏ ⴷ ⵜⵏⴼⵔⵓⵜ ⵏ ⵜⵎⵙⴽⵔⵜ ⵏⵏⵙⵏ ⵙ ⵓⵙⵎⴰⴷ, ⴳ ⵓⵙⴰⵜⵉ ⵏ ⵜⵉⵣⵓⵣⵜ ⵉⵙⵎⴷⵏ ⵅⴼ ⵓⵡⵇⵇⵔ ⵏ ⵜⵙⵓⵖⴰⵍ ⵜⵉⵏⴰⵎⵓⵔⵉⵏ ⴷ ⵜⵖⵣⵓⵔⴰⵏⵉⵏ ⴳ ⵢⵉⴳⵔ ⴰⴷ.
