ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⵍⵇⵓⴷⵙ ⴰⵎⴰⵖⵓⴷ- ⵕⵕⴱⴰⵟ ⵏ ⵜⵉⴼⴰⵡⵉⵏ
ⴰⵎⵣⴰⵖ ⵏ ⵜⴳⵍⴷⵉⵜ ⴰⵙⵓⵍⴰⵏ, ⴷ ⵓⵙⵎⵓⵙⵙⵓ ⵏ ⵓⴳⴷⵓⴷ ⴰⵏⴱⴷⴰⴷ… ⵉ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⴼⴰⵍⴰⵚⵟⵉⵏ
ⵍⴰ ⵉⵙⵏⵓⴱⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵎⴰⵍⴰⵙⵙ ⴰⴷ ⵢⴰⵏ ⵓⴽⴰⴱⴰⵔ ⵢⴰⵜⵜⵓⵢⵏ ⵙⴳ ⵜⵎⴰⴷⴷⴰⵙⵜ ⵏ ⵓⵙⵍⴻⵍⵍⵉ ⴰⴼⴰⵍⴰⵚⵟⵉⵏⵉ, ⴷ ⵉⴷⴷⴰⵏ ⵙ ⵍⵎⵖⵔⵉⴱ ⵙ ⵓⵙⵎⴷⵢⴰ ⴰⵙⵔⵜⴰⵏ ⴷ ⵡⴰⵢⵢⴰⴹ ⴰⵣⵔⴼⴰⵏ, ⵙ ⵜⵏⵙⵙⵉⵅⴼⵜ ⴷ ⵉⴳⵎⴰⵎⵏ ⵏ ⵜⴰⵥⴰⵢⵕⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵎⵓⵏ ⵓⵖⵔⵉⵎ ⴳ ⵜⵎⴰⴷⴷⴰⵙⵜ ⵜⴰⴼⵉⵍⵉⵚⵟⵉⵏⵉⵜ.
ⵙ ⵜⵉⵍⵉⵜ ⵏ ⵉⵎⵙⵜⴳⴳⴰⵔⵏ ⴷ ⵉⴳⵏⵙⴰⵙ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⵎⵖⵔⵉⴱⵉⵢⵉⵏ, ⵜⵕⵥⵎ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵎⴰⵙⵙ ⴰⵃⵎⴰⴷ ⵙⴰⵄⵉⴷ ⵜⵜⴰⵎⵉⵎⵉ, ⴰⵏⵙⵙⵉⵅⴼ ⵏ ⵜⵥⴰⵢⵕⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵎⵓⵏ ⵓⵖⵔⵉⵎ, ⴰⴳⵎⴰⵎ ⵏ ⵜⵙⵇⵇⵉⵎⵜ ⵜⴰⵎⵣⵣⴳⴰⵔⵜ ⵏ ⵜⵎⴰⴷⴷⴰⵙⵜ ⵏ ⵓⵙⵍⴻⵍⵍⵉ ⴰⴼⴰⵍⴰⵚⵟⵉⵏⵉ, ⵢⴰⵜ ⵜⵙⵓⵜⵍⵜ ⵏ ⵓⵙⵎⵓⵜⵜⴳ ⵉⴳⴳⵓⴷⵉⵏ ⵉ ⵓⴽⴰⴱⴰⵔ ⴰⴼⴰⵍⴰⵚⵟⵉⵏⵉ, ⵏⵏⵉ ⵔⴰⴷ ⵉⴽⴽ ⵙⴳ 14 ⵖⵔ 20 ⵢⵓⵍⵢⵓⵣ ⴷ ⵉⴷⴷⴰⵏ, ⵜⵡⴰⵜⵜⵙ ⴰⴷ ⵜⵏⵏⴰⵍ ⵜⵉⵥⴹⴰⵕⵉⵏ ⵏ ⵓⴽⴰⴱⴰⵔ ⴳ ⵢⵉⴳⵔⴰⵏ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ, ⴰⵏⵜⴰⵎ ⴰⵣⵔⴼⴰⵏ, ⴷ ⵓⵏⵄⴰⵕ ⴰⴳⵔⴰⵖⵍⴰⵏ.
ⵜⴳⴰ ⵜⵙⵓⵜⵍⵜ ⴰⴷ ⴰⵎⵢⴰⵖ ⴰⵎⵣⵡⴰⵔⵓ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴽⴷ ⵜⵥⴰⵢⵕⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵎⵓⵏ ⵓⵖⵔⵉⵎ ⴳ ⵜⵎⴰⴷⴷⴰⵙⵜ ⵏ ⵓⵙⵍⴻⵍⵍⵉ ⴰⴼⴰⵍⴰⵚⵟⵉⵏⵉ, ⵍⵍⵉⵖ ⵜⴳⴰ ⴰⵎⵙⴽⴰⵔ ⵉⵙⵎⵓⵏⵏ ⵏⴳⵔ ⵓⵖⵔⵉⵎ ⴷ ⵓⵙⵔⵜⴰⵏ, ⵙⵍⴰⵡⴰⵏ ⴰⴽⴽⵯ ⵎⴰⵙ ⵜⴳⴰ ⵜⵎⵙⴰⵔⵜ ⵜⴰⴼⴰⵍⴰⵚⵟⵉⵏⵉⵜ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ, « ⵜⴰⵎⵙⴰⵔⵜ ⵉⵍⵍⴰⵏ ⴳ ⵡⴰⵎⵎⴰⵙ ⵏ ⵉⵎⴹⴰⴽⴰⵕⵏ ⵉⵙⵔⵜⴰⵏⵏ ⴷ ⵉⵊⵢⵓ-ⵉⵙⵔⵜⴰⵏⵏ ⵜⵉⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ ⴰⵢⴰ ». ⵜⴰⵎⵢⴰⴷⴰⵙⵜ ⵉⴱⴷⴷⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⵙⴼⴰⵡ ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ ⵜⴰⵎⵖⵔⵉⴱⵉⵜ, ⵜⴷⵔⵓ ⴳ ⵓⵙⵏⴼⵍ ⵏⵏⵙ, ⵓⵔ ⴷ ⵖⴰⵙ ⵙ ⵜⵎⵙⴰⵔⵜ ⵏ ⵉⵎⵏⵖⵉ ⴰⵙⴳⴰⵡⴰⵏ ⴷ ⵓⵙⵎⴰⴷ ⵏ ⵓⵙⴷⵓⵔⵔⵉ, « ⵎⴰⵛⴰ ⴷ ⴰⵎⵜⵡⵉ ⵉ ⵡⴰⴷⴷⵓⵔ ⴷ ⵢⵉⵙⴽⵉⵍ ⴷ ⵜⵣⵔⴼⵜ. »
ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴳ ⵜⴳⵓⵔⵉ ⵏ ⵓⵕⵥⵥⵓⵎ, ⵎⴰⵙ “ⴼⴰⵍⴰⵙⵟⵉⵏ ⴷ ⴰⵜⵔⵙ ⵉⵕⵥⵎⵏ ⴳ ⵓⵙⵡⵉⵏⴳⵎ ⴰⵏⴼⴳⴰⵏ », ⴷⴰⵜ ⴰⴷ ⵜⵔⵏⴰ ⵎⴰⵙ ⵏⴽⴽⵯⵏⵉ ⵉⵎⵖⵔⵉⴱⵉⵢⵏ « ⵍⴰ ⵏⵜⵜⴱⴷⴰⴷ, ⵏⴻⵏⴳⴰⵥ ⵉ ⵉⵥⵕⵉⵜⵏ ⵏ ⵜⵎⵏⵖⵉⵡⵜ ⴷ ⵜⴼⵔⴳⵉ ⴷ ⵓⵙⵍⵍⴰⵥ ⴷ ⵓⵙⵙⴰⵛⴽ ⴷ ⵜⵉⵢⵜⵉ ⴷ ⵜⵕⵥⵉⵢⵉⵏ ⵀⵔⵛⵏⵉⵏ ⵏⵏⴰ ⵉⵜⵜⴹⵉⵚⵏ ⵉⴼⴰⵍⴰⵚⵟⵉⵏⵉⵢⵏ ».
« ⴰⵙⵏⵎⴰⵍⴰ ⵏ ⵜⵙⵓⵜⵍⵜ ⵏ ⵓⵙⵎⵓⵜⵜⴳ ⴳ ⵜⴰⴷⴷⴰⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ, ⴳ ⵜⴰⴷⴷⴰⵔⵜ ⵏⵏⵓⵏ, ⴷ ⴳ ⵜⵉⵣⵉ ⴰⴷ ⵙ ⵓⵥⵍⴰⵢ, ⵓⵔ ⵉⴳⵉ ⵖⴰⵙ ⴰⵙⵔⵙ ⵏ ⵓⵙⵎⵢⴰⵏⴰⵡ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ, ⵎⴰⵛⴰ ⵉⴳⴰ ⴰⵡⵏⵏⵉ ⴰⵣⴷⴳⴰⵏ ⴷ ⵓⵙⵎⴰⵢⵏⵓ ⵏ ⵓⵎⵏⴰⴷ ⴰⵣⵔⴼⴰⵏ ⴰⵏⴱⴷⴰⴷ ⴰⵙⵓⵍⴰⵏ », ⴳ ⵢⴰⵜ ⵜⴱⵔⴰⵜ ⵉⴼⴰⵡⵏ « ⵉⵎⵎⴰⵍⵏ ⵉⵎⴰⴷⵏ ⵉⵎⵏⵣⴰⵢⵏ ⵉⵕⵚⴰⵏ ⵏ ⵍⵎⵖⵔⵉⴱ ⴷ ⵉⵎⵖⵔⵉⴱⵉⵢⵏ, ⴰⴳⵍⵍⵉⴷ ⴷ ⵓⴳⴷⵓⴷ, ⴷ ⵓⵙⵎⵉⵔⵉⵡ ⵏ ⵜⵓⴳⴳⴰⵣ ⵏ ⵜⴳⵍⴷⵉⵜ ⵏⵏⴰ ⵉⵙⴷⵍⵏ ⵖ ⵜⵎⴰⵥⵓⵏⵜ ⵏⵏⵙ ⵜⴰⵙⵏⵓⵔⴰⵢⵜ ⵏ ⴱⴰⵢⵜ ⵎⴰⵍ ⵍⵇⵓⴷⵙ, ⴳ ⵓⵏⵄⴰⵕ ⵉ ⵜⵖⵓⵔⵉ ⵏ ⵡⴰⵎⵓⵏ ⴰⴳⵔⴰⵖⵍⴰⵏ ⵃⵎⴰ ⴰⴷ ⵢⴰⵙⵉ ⵜⵉⵎⵙⵜⴳⴳⴰⵔⵉⵏ ⵏⵏⵙ ⵜⵓⵍⴳⵉⵏⵉⵏ ⴷ ⵜⵖⴰⵔⴰⵏⵉⵏ.”
« ⴼⴰⵍⴰⵚⵟⵉⵏ ⴷ ⵜⴰⵎⵙⴰⵔⵜ ⵜⴰⵣⵔⴼⴰⵏⵜ ⵖ ⵓⵎⵣⵡⴰⵔⵓ. ⵜⴳⴰ ⴰⵙⵜⴰⵍ ⴷ ⵢⵉⵔⵉⵎ ⵏ ⵜⵉⴷⵜ ⵉ ⵜⵎⵢⴰⴳⴰⵏⵜ ⵏ ⵜⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ », ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. « ⵜⴳⴰ ⴰⵙⵜⴰⵍ ⵏ ⵜⵉⴷⵜ ⵉ ⵜⵡⵏⴳⵉⵎⵜ ⵏ ⵓⵎⴰⴹⴰⵍ ⴷ ⵜⵉⵙⵉⵜ ⵏ ⵜⵣⴷⴳⵉ ⵏ ⵉⵙⵓⵖⵏⵏ ⵉⴳⵔⴰⵖⵍⴰⵏⵏ ⴷ ⵜⵥⴹⴰⵕⵜ ⵜⴰⴳⵔⴰⵡⴰⵏⵜ ⵅⴼ ⵓⴼⵔⴰⴳ ⵏ ⵉⵎⵏⵣⴰⵢⵏ ⵉⵏⴼⴳⴰⵏⵏ ⴷ ⵉⵣⵔⴼⴰⵏⵏ », ⵜⵔⵏⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ.
ⵙⴳ ⵜⵙⴳⴰ ⵏⵏⵙ ⵉⵙⵎⵖⵔ ⵎⴰⵙⵙ ⴰⵃⵎⴰⴷ ⵙⴰⵄⵉⴷ ⵜⵜⴰⵎⵉⵎⵉ ⵜⴰⴷⵔⴰⵡⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⵎⵣⴰⵖ ⵅⴼ ⵜⵎⵙⴰⵔⵜ ⵜⴰⴼⴰⵍⴰⵚⵟⵉⵏⵉⵜ ⴷ ⵉⵎⵏⴰⴷⵏ ⵏ ⵍⵎⵖⵔⵉⴱ, ⴰⴳⵍⵍⵉⴷ ⴷ ⵓⴳⴷⵓⴷ, ⴷ ⵡⴰⵏⵙⴰ ⵏ ⴼⴰⵍⴰⵚⵟⵉⵏ ⴳ ⵡⵓⵍⴰⵡⵏ ⵏⵏⵙⵏ. ⵎⴽⴷⴰ ⵉⵙⵎⵖⵔ ⵓⵏⵙⵙⵉⵅⴼ ⵏ ⵓⴽⴰⴱⴰⵔ ⴰⴼⴰⵍⴰⵚⵟⵉⵏⵉ ⴰⵏⵏⴰⵍ ⴰⵙⵓⵍⴰⵏ ⵏ ⵍⵎⵖⵔⵉⴱ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⵙⵙⵉⵅⴼⵜ ⵏⵏⵙ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴳ ⵉⵙⴳⵔⴰⵡⵏ ⵉⵣⵔⴼⴰⵏⵏ ⵉⴳⵔⴰⵖⵍⴰⵏⵏ.
« ⵏⴼⵍⵙ ⴱⴰⵀⵔⴰ ⵙ ⵡⴰⴷⴷⵓⵔ ⵏ ⵜⴷⵔⴰⵡⵜ ⴰⴷ », ⵉⵏⵏⴰ ⵓⵏⵙⵙⵉⵅⴼ ⵏ ⵜⵥⴰⵢⵕⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵎⵓⵏ ⵓⵖⵔⵉⵎ ⵏ ⵜⵎⴰⴷⴷⴰⵙⵜ ⵏ ⵓⵙⵍⴻⵍⵍⵉ ⴰⴼⴰⵍⴰⵚⵟⵉⵏⵉ, « ⴳ ⵓⵙⴷⵓⵙ ⵏ ⵉⵎⵙⵍⵉ ⵏ ⴼⴰⵍⴰⵚⵟⵉⵏ ». ⵜⴰⵡⵓⵔⵉ ⵜⴰⵎⴰⵣⴰⵔⵜ ⵏⵏⵉ ⵅⴼ ⵏⵉⵡⵣ ⴳ ⵜⵎⴰⴷⴷⴰⵙⵜ, ⵉⵔⵏⴰ, ⵅⴼ ⵓⵣⴷⴰⵢ ⵏⵏⵙ, ⵅⴼ ⵓⵙⵉⵜⴳ ⵏⵏⵖ ⴰⵅⴰⵜⴰⵔ ⵉ ⵓⵙⴰⴷⵎⵔ ⵏⵏⵓⵏ ⴰⴽⴷ ⵉⵙⵓⵎⵔⵏ ⵏⵏⵖ ⴳ ⵡⴰⵏⵏⴰⵍ ⵏ ⵉⵣⵔⴼⴰⵏ ⵏ ⵓⴳⴷⵓⴷ ⵏ ⴼⴰⵍⴰⵚⵟⵉⵏ ».
ⵏⵙⴷⴷⵉⴷ ⵅⴼ ⵜⵖⴱⵉ ⵏ ⵓⵣⴷⴰⵢ ⴰⴽⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵙⵡⵓⵔⵉ ⵅⴼ ⵜⵙⵉⵍⴰ ⵏ ⵜⴼⵍⵙⵜ ⵉⵜⵜⵓⵎⵔⴰⵔⴰⵏ ⴷ ⵓⵎⵢⴰⵡⴰⵙ ⴰⵏⴱⵖⵓⵔ.., ⵉⵏⵏⴰ ⵜⵜⴰⵎⵉⵎⵉ, ⴷⴰⵜ ⴰⴷ ⵉⵙⵎⴷ « ⵉⴳⴰ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⵓⵍⴼ ⵉⴷⵔⵓⵙⵏ ⵉ ⵡⴰⴳⴰⵎ ⵙⴳ ⵜⵉⵔⵎⵉⵜ ⵏ ⵍⵎⵖⵔⵉⴱ ⵜⴰⵣⵔⴼⴰⵏⵜ, ⴷ ⵓⵙⴷⵓⵙ ⵏ ⵓⵎⵢⴰⵡⴰⴹ ⴰⵙⵓⵍⴰⵏ ⴷ ⵜⵎⵔⵙⵍⵜ ⵜⴰⵎⵣⵡⴰⵔⵜ ⴳ ⵢⵉⴳⵔ ⴰⴷ ».
ⵉ ⵓⵙⵙⴽⵜⵉ, ⵔⴰⴷ ⵢⵓⵎⴰ ⵓⵖⴰⵡⴰⵙ ⵏ ⵜⵙⵓⵜⵍⵜ ⵏ ⵓⵙⵎⵓⵜⵜⴳ ⴳ ⵓⵙⵇⵇⵉⵎ ⴷ ⵓⵙⵉⵏⴰⴳ ⵏ ⵕⵕⴱⴰⵟ ⴷⵔⵉⵙ ⴱⵏⵣⴽⵔⵉ ⵉ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵉⵙⴰⵡⵔⵉⵏ ⵜⵓⵙⵏⵉⵙⵉⵏ ⴷ ⵜⵎⵉⵥⵉⵕⵉⵏ ⴳ ⵉⵙⵏⵜⴰⵍ ⵉⵣⵔⴼⴰⵏⵏ ⵉⵎⵢⴰⵏⴰⵡⵏ ⵙⴳⵙⵏ :
ⵉⵎⴰⵙⵙⵏ ⵉⴳⵔⴰⵖⵍⴰⵏⵏ ⴷ ⵉⵏⵎⵜⵜⴰⵏ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ
ⵜⴰⵏⴰⴹⵉⵏ ⴷ ⵜⵏⵓⵔⵣⵉⵏ ⴷ ⵉⵔⵣⵣⵓⵜⵏ ⴷ ⵜⵉⵜⵉⵇⵏⵉⵢⵉⵏ ⵏ ⵓⵙⴰⵙⴼⵔⵓ ⴰⵎⴷⴰⵏ
ⴰⵙⵍⴳⵏ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ
ⴰⵏⵜⴰⵎ ⵏ ⵜⵕⵥⵉⵢⵉⵏ ⴳ ⵉⴽⴰⵍⵉⵡⵏ ⵉⴼⴰⵍⴰⵚⵟⵉⵏⵉⵢⵏ ⵉⵜⵜⵓⵙⴷⵓⵔⵔⵉⵏ
ⵜⴰⵙⵏⴱⴹⴰⵢⵜ ⵜⴰⵏⴱⴽⴰⴹⵜ ⵜⴰⴳⵔⴰⵖⵍⴰⵏⵜ
ⴰⵏⵄⴰⵕ ⴰⴳⵔⴰⵖⵍⴰⵏ ⴷ ⵓⵙⵡⵓⵔⵉ ⴷ ⵡⴰⵎⵓⵏ ⵓⵖⵔⵉⵎ ⴰⵎⴰⴹⵍⴰⵏ
ⵜⵉⵔⵎⵉⵜ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⵜⴰⵎⵖⵔⵉⴱⵉⵜ (…)
« ⵏⵙⵉⵜⴳ ⴰⵏⵏⴰⵍ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵜⵙⵓⵜⵍⵜ ⴰⴷ ⵢⵓⵙⵙⴰⵏ », ⵉⵏⵏⴰ ⵓⵎⵙⵇⴰⴷ ⵏ ⴼⵉⵍⵉⵙⵟⵉⵏ ⴳ ⵕⵕⴱⴰⵟ, ⵎⴰⵙⵙ ⵊⴰⵎⴰⵍ ⵛⵛⵓⴱⴽⵉ, « ⴰⵎⵏⴰⵖ ⵏⵏⵖ ⴰⵣⵣⵔⴰⴼ ⵙ ⵓⴼⵓⵍⴽⵉ ».
ⵏⵙⵖⴰⵡⵙⴰ ⴰⴷ ⵏⵙⵙⵖⵔⵜ ⵜⵉⵣⵎⵎⴰⵔ ⵜⵉⴼⴰⵍⴰⵚⵟⵉⵏⵉⵢⵉⵏ, ⴷ ⴰⴷ ⵏⴷⵔⵓ ⴳ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵓⴳⴷⵓⴷ ⴼ ⵜⵜⵓⴳⴰ ⵜⴳⵙⵔⵉ… »
ⴳ ⵜⴳⵉⵔⴰ ⵏ ⵜⴳⵓⵔⵉ ⵏⵏⵙ ⵜⵙⵎⴰⵢⵏⵓ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴰⵙⴷⴷⵉⴷ ⵎⴰⵙ ⵔⴰⴷ ⵉⵣⴷⵉ ⵓⵙⵇⵇⵉⵎ ⴰⵏⵄⴰⵕ ⴳ ⵓⴳⵏⵙⵓ ⵏ ⵓⵏⴰⴳⵔⴰⵡ ⴰⵏⵎⵜⵜⴰⵏ ⴷ ⵓⴳⵔⴰⵖⵍⴰⵏ, ⵜⵙⵙⴽⵜⵉ ⵎⴰⵙ “ⵉⵣⵎⵔ ⵓⵙⵡⵓⵔⵉ ⴰⵙⵔⵜⴰⵏ ⵉⴱⴷⴷⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴰⴷ ⵉⵙⵏⴼⵍ ⵜⴰⵎⵙⴰⵔⵜ ⵜⴰⴼⴰⵍⴰⵚⵟⵉⵏⵉⵜ ⵙⴳ ⵉⵎⵏⵖⵉ ⴰⵊⵢⵓⴱⵓⵍⵉⵜⵉⴽⵉ (ⴰⵊⵢⵓ-ⴰⵙⵔⵜⴰⵏ) ⴰⵡⵏⴳⵉⵎ ⵖⵔ ⵜⵖⵏⵙⴰ ⵅⴼ ⵡⴰⴷⴷⵓⵔ ⴰⵏⴼⴳⴰⵏ, ⵉ ⴰⴽⴽⵯ ⵜⴰⵏⴼⴳⴰⵏⵜ”. ⵙⴳ ⵜⵙⴳⴰ ⵏⵏⵖ, ⴷ ⵍⵍⵉⵖ ⵏⴳⴰ ⵜⴰⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵉⵡⵣ ⴳ ⴽⵓ ⵜⴰⵎⵍⴷⴰ ⵜⴰⵙⴳⴰⵡⴰⵏⵜ ⵏⵖ ⵜⴰⴳⵔⴰⵖⵍⴰⵏⵜ ⴰⴷ ⴳⵏⵜ ⵜⵕⵥⵉⵢⵉⵏ ⵀⵔⵛⵏⵉⵏ ⴰⵙⵏⵜⵍ ⵏ ⵓⵎⵙⴰⵡⴰⵍ ⴷ ⵓⵙⵎⵓⵙⵙⵓ ⴰⴳⵔⴰⵡⴰⵏ ⵉ ⵓⵙⴷⴷⵉⴷ ⵅⴼ ⵓⵙⴱⴷⴷⵉ ⵏ ⵜⴰⴷⵓⵜⵉⵏ ⴷ ⵜⵏⴼⵔⵓⵜ ⵏ ⵓⴼⵔⴰⴳ ⵉ ⵉⵖⵔⵎⴰⵏⵏ ⴷ ⵉⵏⵎⵣⴰⵖⵏ/ⵜⵏⵎⵣⴰⵖⵉⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⵉⴹⵉⵚ ⴽⵔⴰ ⵙⴳⵙⵏ, ⵏⵜⵜⵏⵉ ⴷ ⵉⵔⵏⴰⵡⵏ ⵏⵏⵖ, ⵎⴰⴷ ⵉⴹⵉⵚⵏ ⵉ ⴽⵔⴰ ⵏ ⴰⵢⵜ ⴷⴰⵔⵏⵖ ⴳ ⴼⴰⵍⴰⵚⵟⵉⵏ… ⴷ ⵓⵍⴰ ⴰⵙⴷⴷⵉⴷ ⵅⴼ ⵓⵙⵖⵓⵏ ⵏ ⵜⵏⴼⵔⵓⵜⵏ ⵓⵙⵙⵡⵀⵏ ⵏ ⵓⵙⵙⵉⵡⴹ ⵏ ⵜⵡⵉⵙⵉⵢⵉⵏ ⵜⵉⵏⴼⴳⴰⵏⵉⵏ ⴷ ⵅⴼ ⵡⴰⵏⴰⵡ ⴰⵙⵓⵍⴰⵏ ⵏ ⵓⵙⵓⵖⵏ ⴰⴷ.
ⵉⵎⴽⵉ, ⵜⴱⵔⵔⵃ ⵎⴰⵙⵙⴰ ⴱⵓⵄⵢⵢⴰⵛ ⵙ ⵓⵙⴳⵎⴹ, ⴳ ⵜⴳⵉⵔⴰ ⵏ ⵜⵙⵓⵜⵍⵜ, ⵏ ⵓⴱⵔⵓⵟⵓⴽⵓⵍ ⵏ ⵓⵎⵢⴰⵡⴰⵙ ⵏⴳⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵥⴰⵢⵕⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵎⵓⵏ ⵓⵖⵔⵉⵎ ⴳ ⵜⵎⴰⴷⴷⴰⵙⵜ ⵏ ⵓⵙⵍⴻⵍⵍⵉ ⴰⴼⴰⵍⴰⵚⵟⵉⵏⵉ, ⵉ ⵓⵙⴷⵓⵙ ⵏ ⵓⵙⵎⵢⴰⵏⴰⵡ ⵏ ⵜⵉⵔⵎⵉⵜⵉⵏ, ⴷ ⵓⵚⴽⵓ ⵏ ⵜⵥⴹⴰⵕⵉⵏ, ⴷ ⵓⵙⴷⵓⵙ ⵏ ⵉⵎⴰⵙⵙⵏ ⵏ ⵓⵎⵢⴰⵡⴰⵙ ⴷ ⵓⵎⵛⴰⵡⴰⵕ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵙⵏ, ⵙ ⵓⵣⵎⵣⵣⵓ ⵏ ⵜⴳⵉⵔⴰ ⵏ ⵜⵙⵓⵜⵍⵜ ⴰⵙⵙ ⵏ ⵓⵙⵉⵎⵡⴰⵙ 18 ⵢⵓⵍⵢⵓⵣ ⴷ ⵉⴷⴷⴰⵏ.
