ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⴰⵎⴰⵔⵉ ⵄⴱⴷⵍⵡⴰⵃⴷ ⵃⵏⵏⵓ ⵉⵊⵊ ⵙⴳ ⵢⵉⵏⵏⵉ ⵉ ⵢⵉⵅⴹⴰⵕⵏ ⴰⴷ ⴰⵔⵉⵏ ⵙ ⵜⵓⵜⵍⴰⵢⵜ ⵏⵏⵙⵏ ⵜⴰⵎⴰⵣⵉⵖⵜ, ⵉⵊⵊ ⵙⴳ ⵢⴻⵏⵏⵉ ⵉⴷⴼⴰⵕⵏ ⴰⴱⵔⵉⴷ ⵏ ⵜⵉⵔⵔⴰ ⴱⴰⵛ ⴰⴷ ⵣⴳⵙ ⵟⵟⴼⵏ ⴰⵛⴱⴰⵕ ⵏ ⵜⵏⵜⵜⵉⵜ, ⴰⴷ ⵎⵎⵓⵖⵥⵍ ⴰⴽⴷ ⵜⵓⵜⵍⴰⵢⵉⵏ ⵉ ⵅⴰⴼⵙⵏ ⴷ ⵉⵙⵙⴼⴰⵢⵏ ⴷⴳ ⵡⴰⵣⵣⴰⵔⴳⵏ ⵏ ⵎⵉⵏ ⵉⵜⵜⵡⴰⵇⵇⴰⵔⵏ ⴷ ⵎⵉⵏ ⵉⵜⵜⵡⴰⵥⵕⵏ ⴷ ⵎⵉⵏ ⵉⵜⵜⵡⴰⵙⵍⵏ.. ⴷ ⵛⵡⴰⵢⵜ ⵏ ⵓⵛⴰⵍ ⵜⵜⵔⵔⴰⵏ ⵜ ⵅ ⵓⵥⵓⵕ, ⴰⵜⵜⴰⵖ ⴰⴷ ⵉⵟⵟⴼ, ⴰⵜⵜⴰⵖ ⵓⵔ ⵣⴳⵙ ⵜⵜⵉⵡⵉⵏⵜ ⵛⴰ ⵜⵃⵕⵢⴰⴹⵉⵏ ⵏ ⵓⵡⴹⴹⵕ.
ⴷⴳ ⵓⵎⵙⴰⵡⴰⵍ ⴰ ⵢⵇⵇⴰⵔ ⵃⵏⵏⵓ ⴱⵍⵍⵉ « ⵜⵜⴰⵔⵉⵖ ⵙ ⵜⵎⴰⵣⵉⵖⵜ, ⵎⵉⵏⵣⵉ ⵓⵔⵉⴷ ⴷ ⵉⵛⵜ ⵏ ⵜⵓⵜⵍⴰⵢⵜ ⵏ ⵜⵉⵔⵔⴰ ⵡⴰⵀⴰ, ⴰⵏⵉⵛⵜ ⵏ ⵎⵉⵏ ⵜⵍⵍⴰ ⴷ ⵜⵓⵜⵍⴰⵢⵜ ⵏⵜⵜⴰⵛⴰ ⵜⵜ, ⵏⵜⵜⴷⴷⵔ ⵉⵜⵜ, ⴷ ⵉⵛⵜ ⵏ ⵜⵓⵜⵍⴰⵢⵜ ⵜⵙⵙⵔⵓ ⴰⵏⵖ, ⴷ ⵉⵛⵜ ⵏ ⵜⵓⵜⵍⴰⵢⵜ ⵜⵙⵙⵣⴷⴰⵖ ⴰⵏⵖ ⴷⵉ ⵜⵖⵎⵎⵓⵔⴰ ⵉⵜⵜⵡⴰⵜⵜⵓⵏ, ⵃⵎⴰ ⴰⴷ ⵜⵜ ⴷⴷ ⵏⵙⵙⵓⴼⵖ, ⴰⴷ ⵣⴳⵙ ⵏⴱⴷⴷ ⴷⴳ ⵡⵓⴷⵎ ⵏ ⵜⴰⵜⵜⵓⵜ ».
ⴰⵏⵙⵓⴼ ⵣⴰⴳⴽ ⵖⵔ ⵜⴼⵔⴰⵢ ⵏ ⵓⵖⵎⵉⵙ «ⴰⵎⴰⴹⴰⵍ ⴰⵎⴰⵣⵉⵖ» ⴳ ⵉⵎⵙⴰⵡⴰⵍⵏ ⵏⵏⵙ ⵉⴽⵓⵢⵢⵓⵔⵏ. ⵉⵏⵉ ⴰⵏⵖ ⴷ ⴰⵎⵣⵡⴰⵔⵓ, ⵎⵉⵏ ⵉⵄⵏⴰ ⵄⴱⴷⵍⵡⴰⵃⴷ ⵃⵏⵏⵓ ?
ⵜⴰⵏⵎⵎⵉⵔⵜ ⵎⴰⵙⵙ ⵅⵉⵔⴷⴷⵉⵏ, ⵣⴳⴽ, ⵜⵜⵇⴰⴷⵉⵖ ⴰⵟⵟⴰⵚ ⴰⵖⵎⵉⵙ ⵏ ⵓⵎⴰⴹⴰⵍ ⴰⵎⴰⵣⵉⵖ ⵉ ⴰⵏⵖ ⴷ ⵉⵕⵥⵎⵏ ⵜⵉⴼⵔⴰⵢ ⴰ ⵃⵎⴰ ⴰⴷ ⴷⴳⵙⵏⵜ ⵏⵙⵙⴼⵉ ⵓⵍ ⵏⵏⵖ ⵉ ⵉⵛⵛⵓⵕⵏ ⵙ ⵜⵎⵏⵏⴰ. ⵣⴳⴽ ⵄⴰⵡⴷ, ⵙⵙⴰⴽⴽⵯⴰⴹⵖ ⵉⵊⵊ ⵏ ⵡⴰⵣⵓⵍ ⵉⵎⵖⴰⵔ ⵉ ⵇⴰⵄ ⵜⵉⵎⵖⵔⴰ ⴷ ⵉⵎⵖⵔⴰ ⵏ ⵜⵖⵎⵔⵜ ⴰ ⵏ ⵉⵎⵙⴰⵡⴰⵍⵏ ⵙ ⵜⵎⴰⵣⵉⵖⵜ, ⵇⵇⴰⵔⵖ ⴰⴽ ⴰⵇⵇⴰ ⵡⴰ, ⴷ ⵉⵊⵊ ⵏ ⵓⵚⵓⵕⵉⴼ ⴰⵏⵉⵛⵜ ⵏ ⵎⵉⵏ ⵜ ⵉⵇⴷⴷⵏ ⴷⴳ ⵢⵉⴳⵔ ⵏ ⵓⵙⴷⴷⵔ ⵏ ⵜⵓⵜⵍⴰⵢⵜ ⵏⵏⵖ ⵜⴰⵎⴰⵣⵉⵖⵜ, ⴳ ⵡⴰⴽⵓⴷ ⵎⴰⵏⵉ ⵏⵜⵜⴰⴼ ⴰⵟⵟⴰⵚ ⵏ ⵉⵎⴰⵣⵉⵖⵏ ⵙⵙⵡⵛⴰⵏ ⵜⵜ ⵉ ⵓⵡⴹⴹⵕ ⴰⵎⵏ ⵓⵔ ⵜⵜⵉⴽⵉⵏ, ⵙ ⵓⴱⴱⴰⵥ ⵏⵏⵙⵏ ⵉ ⵓⵣⵍⵍⵉⴼ ⴳ ⵜⵓⵜⵍⴰⵢⵉⵏ ⵏ ⵎⵉⴷⴷⵏ, ⴷ ⵜⴰⵜⵜⵓⵜ ⵏⵏⵙⵏ ⵉ ⵜⵓⵜⵍⴰⵢⵜ ⵏⵏⵙⵏ. ⴰⵎⵏ ⵏⵙⵙⵏ, ⴰⴳⵍⴰ ⵏ ⵜⵓⵜⵍⴰⵢⵜ ⴷ ⵉⵍⵙ, ⴰⵙⵙ ⵉ ⴷⵉ ⵖⴰ ⵉⵍⵍⴼ ⵢⵉⵍⵙ ⵉ ⵜⵓⵜⵍⴰⵢⵜ, ⵜⴻⵜⵜⵎⵜⵜⴰ.
ⴰⵡⴰⵍ ⵅⴼ ⵓⵢⴰ ⵓⵔ ⵉⵇⵟⵟⵉ, ⵎⴰⵛⴰ ⴰⴷ ⴷ ⵄⵇⴱⵖ ⵖⵔ ⵓⵙⵇⵙⵉ ⵏⵏⵛ ⵅⴼ ⵜⵎⴱⵉⵔⵜ ⵉⵏⵓ, ⴷ ⵎⵉⵏ ⵄⵏⵉⵖ. ⵏⵛⵛ, ⴷ ⵎⵎⵉⵙ ⵏ ⴱⵓⵔⵎⵎⴰⵏⴰ, ⵣⵉ ⴷⴷⵛⴰⵔ ⵏ ⵉⵚⴰⵍⵃⵉⵡⵏ, ⵙⴳ ⵓⵎⵊⵊⴰⵡ. ⵖⵔⵉⵖ ⴷⵉ ⵜⵉⵏⵎⵍ ⵏ ⵍⴳⴷⵉⵔⴰ, ⵣⵉ ⵙⵙⵏⵏⵉ, ⵎⵎⵓⵜⵜⵢⵖ ⴱⴰⵛ ⴰⴷ ⵖⵔⵖ ⴷⴳ ⵓⵙⵉⵏⴰⵏ ⵏ ⵓⵙⵎⵓⵜⵜⴳ ⴷⵉ ⵍⴽⴱⴷⴰⵏⵉ, ⵉ ⵢⵉⴳⴳⵯⵊⵏ ⵙ ⵛⴰ ⵏ 14 ⵉⴽⵉⵍⵓⵎⵉⵟⵔⵏ ⵅⴼ ⴷⴷⵛⴰⵔ ⵏⵏⵖ. ⴷⵉⵏ ⵉ ⵖⴰ ⴱⴷⵉⵖ ⴰⴷ ⵍⵎⴷⵖ ⴱⴰⵛ ⴰⴷ ⵜⵜⴽⵍⵖ ⵅⴼ ⵓⵣⵍⵍⵉⴼ ⵉⵏⵓ, ⵓⵎⵉ ⵏⴽⵔⴰ ⵉⵊ ⵏ ⵓⵅⵅⴰⵎ ⵚⴹⵉⵚ ⵉⴷⵏⵖ, ⵏⴱⴷⴰ ⴰⴷ ⵏⵍⵎⴷ ⴰⴷ ⵏⵚⴱⴱⵏ ⵏⵏⵉⵜ, ⴰⴷ ⵏⵙⵏⴻⵏ ⵏⵏⵉⵜ, ⴰ ⵏⵙⵙⵓ ⵏⵏⵉⵜ, ⴰ ⵏⴳⴼⴼⴹ ⵏⵏⵉⵜ, ⴰⵎⵏ ⵏⵍⵍⴰ ⴷ ⵉⵃⵏⵊⵉⵔⵏ ⵏ 12 ⵏ ⵉⵙⴳⴳⵯⵓⵙⴰ.
ⵣⵉ ⵙⵙⵏⵏⵉ, ⵎⵎⵓⵜⵜⵢⵖ ⵄⴰⵡⴷ ⵖⵔ ⵓⵙⵉⵏⴰⵏ ⵏ ⵍⵎⴰⵟⴰⵕ, ⴷⵉⵏ ⵉ ⵖⵔⵉⵖ ⵉⵊⵊ ⵏ ⴽⵕⴰⴹ ⵏ ⵉⵙⴳⴳⵯⵓⵙⴰ, ⵇⴱⵍ ⵎⴰ ⴰⴷ ⴷ ⵎⵎⵓⵜⵜⵉⵖ ⴰⴷ ⴽⵎⵎⵍⵖ ⴰⵙⴳⴳⵯⴰⵙ ⵉⵏⵓ ⴰⵏⴳⴳⴰⵔⵓ ⵏ ⵜⴱⴰⴽⴰⵍⵓⵔⵉⵜ ⴷⴳ ⵓⵙⵉⵏⴰⵏ ⵏ ⵟⴰⵀⴰ ⵃⵙⵉⵏ ⴷⴳ ⵓⵣⵖⵏⵖⴰⵏ.
ⵣⵉ ⵙⵙⵏⵏⵉ, ⴽⵙⵉⵖ ⵜⴰⴱⴰⴽⴰⵍⵓⵔⵉⵜ, ⵔⵓⵃⵖ ⵣⵎⵎⵖ ⴳ ⵜⵖⵉⵡⴰⵏⵜ ⵏ ⵉⵣⵔⴼⴰⵏ ⴷⵉ ⵡⵊⴷⴰ, ⴰⵡⵔⵏⴰⵙ, ⵜⴱⴰⵏ ⴷ ⵜⴱⵔⵉⴷⵜ ⵏ ⵜⵖⵓⵔⵉⵡⵉⵏ ⵏ ⵜⵎⴰⵣⵉⵖⵜ, ⵕⵓⵃⵖ ⵣⵎⵎⴻⵎⵖ ⴷⴳⵙ, ⴽⵙⵉⵖ ⴷ ⴷⴳⵙ ⴰⴷⵉⴱⴱⵍⵓⵎ.
ⴰⴷⴰⴼ ⵉⵏⵓ ⴷⴳ ⵢⵉⵛⵜ ⵏ ⵜⵡⵓⵔⵉ ⴷⴳ ⵢⵉⵛⵜ ⵏ ⵜⵎⵙⵙⵓⵔⵜ, ⵜⵙⵙⵉⴳⴳⵯⵊ ⴰⵢⵉ ⵛⵡⴰⵢⵜ ⵅⴼ ⵡⴰⵣⵣⵔⴳ ⵏ ⵜⵖⵓⵔⵉ ⴽⵜⵔ ⵣⵉ ⵙⴰ ⵏ ⵉⵙⴳⴳⵯⵓⵙⴰ, ⴰⵔⴰⵎⵉ ⴷ ⴳⴳⵉⵖ ⵉⵊⵊ ⵏ ⵓⵚⵓⵕⵉⴼ ⵏⵏⵉⴹⵏ ⵖⵔ ⵢⵉⴳⵔ ⵏ ⵓⵙⵍⵎⴷ ⵏ ⵜⵎⴰⵣⵉⵖⵜ, ⵍⵅⴷⵏⵏⵉ ⴰⴷ ⴰⵢⵉ ⴷ ⵜⵏⵏⵓⵕⵥⵎ ⵜⵡⵡⵓⵔⵜ ⵏⵏⵖⵏⵉ ⴱⴰⵛ ⴰⴷ ⴰⴷⴼⵖ ⴷⴳ ⵓⵎⴰⵚⵟⵕ, ⵣⵉ ⵙⵙⵏⵏⵉ ⴰⴷ ⵣⵎⵎⴻⵎⵖ ⴷⵉ ⴷⴷⵓⴽⵜⵓⵔⴰ, ⵍⵅⵅⵓ ⴰⵇⵇⴰ ⵢⵉ ⴰⵢⵏⵏⵉ ⵎⴰ ⵉⵡⴹⵖ ⵜⵜⴳⴳⵖ ⵜⵉⵔⵣⵣⵓⵜⵉⵏ ⴷⴳ ⵢⵉⴳⵔ ⴰ ⵉ ⴰⵏⵖ ⵉⵣⴷⵖⵏ ⵏⵣⴷⵖ ⵉⵜ !
ⵙⴳ ⵢⵉⵛⵜ ⵏ ⵜⵖⵎⴰⵔⵜ ⵏⵏⵉⴹⵏ, ⵏⵛⵛ ⵙⴳ ⵢⵉⵏⵏⵉ ⵉ ⵢⵉⵅⴹⴰⵕⵏ ⴰⴷ ⵏⴰⵔⵉ ⵙ ⵜⵓⵜⵍⴰⵢⵜ ⵏⵏⵖ ⵜⴰⵎⴰⵣⵉⵖⵜ, ⵡⴰ ⴷ ⴰⴱⵔⵉⴷ ⵏⵟⵟⴼ ⵉⵜ ⴱⴰⵛ ⴰⴷ ⵣⴳⵙ ⵏⵟⵟⴼ ⴰⵛⴱⴰⵕ ⵏ ⵜⵏⵜⵜⵉⵜ, ⴰⴷ ⵏⵎⵎⵓⵖⵥⵍ ⴰⴽⴷ ⵜⵓⵜⵍⴰⵢⵉⵏ ⵉ ⵅⴰⴼⵏⵖ ⴷ ⵉⵙⵙⴼⴰⵢⵏ ⴷⴳ ⵡⴰⵣⵣⴰⵔⴳⵏ ⵏ ⵎⵉⵏ ⵉⵜⵜⵡⴰⵇⵇⴰⵔⵏ ⴷ ⵎⵉⵏ ⵉⵜⵜⵡⴰⵥⵕⵏ ⴷ ⵎⵉⵏ ⵉⵜⵜⵡⴰⵙⵍⵏ.. ⴷ ⵛⵡⴰⵢⵜ ⵏ ⵓⵛⴰⵍ ⵏⵜⵜⵔⵔⴰ ⵜ ⵅ ⵓⵥⵓⵕ, ⴰⵜⵜⴰⵖ ⴰⴷ ⵉⵟⵟⴼ, ⴰⵜⵜⴰⵖ ⵓⵔ ⵣⴳⵙ ⵜⵜⵉⵡⵉⵏⵜ ⵛⴰ ⵜⵃⵕⵢⴰⴹⵉⵏ ⵏ ⵓⵡⴹⴹⵕ.
ⴱⴷⴷⵓ ⵏⵏⵛ, ⵎⴰⵎⵛ ⵉ ⵜ ⵜⵓⵖⴰ ⴷⴳ ⵢⵉⴳⵔ ⵏ ⵜⵉⵔⴰ ⵏ ⵓⵙⴼⵔⵓ ⴷ ⵜⵏⴼⴰⵙ ? ⵎⵉⵏ ⵛⴽⴽ ⵉⵊⵊⵉⵏ ⴰⴷ ⵜⴹⴼⵕⴷ ⴰⴱⵔⵉⴷ ⴰ ⴰⵙⴽⵍⴰⵏ ?
ⵏⵛⵛⵉⵏ, ⵜⴰⵎⴰⵣⵉⵖⵜ ⵏⵟⵟⴼ ⵉⵜⵜ ⵙ ⵓⵎⵥⵥⵓⵖ. ⵏⵛⵛ ⵣⴳ ⵢⵉⵏⵏⵉ ⵉ ⵜⵓⵖⴰ ⵉⵜⵜⵟⵟⵚⵏ ⵖⵔ ⵜⵏⴼⴰⵙ ⴷⵉ ⵜⴰⵍⵍⵙⵜ, ⵎⴰⵏⵉ ⵓⵔ ⵜⴻⵜⵜⵙⵍⵉⴷ ⵖⵉⵔ ⵉ ⵜⵎⵙⴰⵔⵉⵏ ⵏ ⵜⵃⵓⵊⴰ ⵙⵙⵔⵊⵉⵊⵉⵏⵜ ⵜⴰⵢⴽⵉⵜⵉⵏ ⵏⵏⵛ. ⴰⵎⵥⵥⵓⵖ ⵉ ⵉⵛⵛⵓⵕⵏ ⵙ ⵜⵃⵓⵊⴰ ⴷ ⵜⵡⴰⴼⵉⵜⵉⵏ ⴷ ⵢⵉⵣⵍⴰⵏ ⴷ ⵡⴰⵡⴰⵍⵏ ⵉⵇⴰⴷⵏ.. ⵓⵔ ⵉⵣⵎⵎⵔ ⴰⴷ ⵉⵇⵇⵉⵎ ⵓⵔ ⵉⵙⵄⴷⴷⵓ ⵜⴰⴱⵔⴰⵜ ⵖⵔ ⵜⵡⵏⴳⵉⵎⵜ ⵃⵓⵎⴰ ⴰⴷ ⴷ ⵜⵔⵔ ⵉⵊⵊ ⵏ ⵏⵛⵛ ⵉⴷⴷⵓⵔⵔⵉ, ⵣⴳⴳⴰ ⵉ ⵉⴱⴷⴰ ⵉⵜⵜⵏⴷⵔⴰⴼ ⴷⴳ ⵉⴹⵕⵉⵚⵏ ⵏ ⵜⵄⵔⴰⴱⵜ ⴷ ⵜⴼⵕⴰⵏⵚⵉⵙⵜ. ⵉⵚⵓⵔⴰⴼ ⵉⵎⵣⵡⵓⵔⴰ, ⴳⴳⵉⵖ ⵜⵏ ⴰⵎⵏ ⵍⵍⵉⵖ ⴷ ⴰⵎⵃⴹⴰⵕ ⴷⵉ ⵏⵏⴰⴹⵓⵕ, ⵡⴰⵎⵉ ⵙⵇⴰⴷⵖ ⵜⴰⵇⵙⵙⵉⵙⵜ ⵖⵔ ⵓⵙⴷⴷⵉ ⵏ “ⴰⵡⴰⵍⵏ ⴷⵉ ⵍⵎⵉⵣⴰⵏ” ⵉ ⵜⵓⵖⴰ ⴷ ⵉⵙⵄⴷⴷⵓ ⵎⵓⵚⵟⴰⴼⴰ ⴱⵓⵣⵢⵢⴰⵏⵉ ⴷⵉ ⵕⵕⴰⴹⵢⵓ ⵏ ⵜⵎⴰⵣⵉⵖⵜ ⵣⵉ ⵕⵕⴱⴰⵟ ⴷⴳ ⵡⴰⵙⵙ ⵏ ⵓⵙⴰⵎⴰⵙ (ⵍⵃⴷⴷ). ⵣⵉ ⵙⵙⵏⵏⵉ, ⴱⴷⵉⵖ ⵙⵇⴰⴷⵉⵖ ⴽⵓⵍ ⴰⵎⵓⵔ ⵜⴰⵇⵙⵙⵉⵙⵜ ⵉ ⵓⵙⴷⴷⵉ ⴰ, ⵜⵜⵙⵍⵉⵖ ⴰⵙ ⵅⵎⵉ ⴷ ⵜⵄⴷⴷⵓ ⵙ ⵜⵎⵉⵊⵊⴰ ⵏ ⴱⵓⵣⵢⵢⴰⵏⵉ .
ⵜⵎⵎⵔⵏⵉ ⴷⴰⵢⵉ ⵜⴰⵢⴽⵉⵜ ⵙ ⵜⵉⵔⴰ ⵏ ⵜⵎⴰⵣⵉⵖⵜ, ⵓⵎⵉ ⵉ ⵕⵓⵃⵖ ⵖⵔ ⵜⵙⴷⴷⴰⵡⵉⵜ, ⵍⵅⴷⵏⵏⵉ ⵙⵙⴼⵢⵏⵜ ⵉⴷ ⵅⴰⴼⵉ ⵜⵉⵔⴰ, ⵎⴰⵛⴰ ⴰⵟⵟⴰⵚ ⵣⵉ ⵎⵉⵏ ⵓⵔⵉⵖ ⴷⴳ ⵓⵣⵎⵣ ⵏ ⵜⵙⴷⴰⵡⵉⵜ, ⵡⴹⴹⵕⵖⵜ.
ⴰⵔ ⵖⴰ ⴱⴷⵉⵖ ⴰⴷ ⵅⴷⵎⵖ, ⵉ ⴰⵢⵉ ⴷ ⵖⴰ ⵢⴰⵙ ⵓⵅⴰⵕⵕⵚ ⵏ ⵓⵙⵓⴼⵖ ⵏ ⵓⴷⵍⵉⵙ, ⴱⴷⵉⵖ ⵣⴳ ⵢⵉⵣⵍⴰⵏ, ⵙ ⵡⴰⵎⵓⴷ “ⵜⵜⵓⵖ”, ⴷ ⵢⵉⵊ ⵏ ⵓⴷⵍⵉⵙ ⵏ ⵜⵓⵍⵍⵉⵙⵉⵏ ⴰⵣⵡⵍ ⵏⵏⵙ “ⵡⵉ ⴷ ⵢⵓⴷⴼⵏ ⵖⵔ ⵡⴰⵣⵣⴰⵔⴳ ?” ⵉⴷⵍⵉⵙⵏ ⴰ ⴼⴼⵖⵏⴷ ⴷ ⴰⴽⵏⵉⵡⵏ ⴷⴳ ⵓⵙⴳⴳⵯⴰⵙ ⴷ ⵉⵊⵊ, ⴷⵉ 2018.
ⵎⴰⵎⵛ ⵉ ⵛⴽⴽ ⵜⵥⵥⵓⵖⵖⵔ ⵜⵡⵏⵏⴰⴹⵜ ⵏⵏⵛ ⵜⴰⴷⵍⵙⴰⵏⵜ ⴷ ⵜⵎⵓⵏⴰⵏⵜ ⵃⵎⴰ ⴰⴷ ⵜⴳⴳ ⵜⴰⵎⴰⴳⵉⵜ ⵉⵏⴽ ⴰⵎ ⵢⵉⵊⵊ ⵏ ⴱⵓⵢⵣⵍⴰⵏ ⴷ ⴱⵓⵜⵓⵍⵍⵉⵙⵉⵏ ?
ⴰⵎⵏ ⴰⵛ ⵏⵏⵉⵖ ⴰⵍⵍⵉⵏⵏⴰ, ⵏⵛⵛ ⵇⵇⴰⵔⵙⵖ ⴷ ⵣⵉ ⵜⵇⴱⵉⵍⵜ ⵏ ⴰⵢⵜ ⵙⵄⵉⴷ, ⵉ ⵣⵉ ⴷ ⵇⵇⴰⵔⵙⵏ ⵡⴰⵟⵟⴰⵙ ⵏ ⴰⵢⵜ ⴰⵙⴼⵔⵓ ⴷⵉ ⴰⵔⵉⴼ. ⵄⵇⵍⵖ, ⴷⴳ ⵢⵉⵊ ⵏ ⵓⵎⵙⴰⵡⴰⵍ ⵏⵏⵙ, ⵉⵏⵏⴰ ⵄⴱⴷⵍⵃⴰⵎⵉⴷ ⵍⵢⵏⴷⵓⵣⵉ : “ⵓⵔ ⵉⵣⵎⵎⴰⵔ ⵛⴰ ⵏ ⵢⵉⵊⵊⵏ ⵉⵙⵡⴰ ⴰⵎⴰⵏ ⵏ ⴰⵢⵜ ⵙⵄⵉⴷ, ⵓⵔ ⵉⵜⵜⵉⵍⵉ ⴷ ⴰⵣⵍⴰⵡⵉ”. ⵜⴰⵎⵓⵔⵜ ⵏ ⴰⵢⵜ ⵙⵄⵉⴷ, ⴷ ⵡⴰⵎⴰⵏ ⵏⵏⵙ ⵉ ⵉⴽⴽⵉⵏ ⴷⵉ ⵜⵎⵉⵊⵊⴰ ⵏ ⵃⵎⴷ ⵣⵣⵢⵢⴰⵏ ⴷ ⵃⵎⴷ ⴱⵏⵢⵃⵢⴰ ⴷ ⵎⵉⵎⵓⵏ ⵚⵚⵃⵔⴰⵡⵉ ⴷ ⴱⵉⵍⴰⵍ ⵡⵄⵍⴰⵙ…, ⵔⵏⵉ ⵅⴰⴼⵙⵏ ⵉⵏⵏⵉ ⵉⵛⵓⵇⵏ ⴷⴳ ⵢⵉⴳⵔ ⵏ ⵡⴰⵍⵍⴰⵙ ⴰⵎ ⵎⵓⵃⵎⵎⴷ ⴱⵓⵣⴳⴳⵓ ⴷ ⵙⴰⵄⵉⴷ ⴱⵍⵖⵔⴱⵉ ⴷ ⵄⵓⵎⴰⵕ ⵍⵎⴷⴷⴰⵎ ⴷ ⵄⵎⴷ ⵣⴰⵀⵉⴷ…, ⵎⴰⵍⴰ ⵍⵃⴽⴰⵢⵜ ⵏ ⵓⵢⴰ ⴰⵇⵇⴰ ⵜⵜ ⵏⵉⵛⴰⵏ ⴷⴳ ⵡⴰⵎⴰⵏ ⵏ ⴰⵢⵜ ⵙⵄⵉⴷ, ⴰⵇⴰ ⵓⵍⴰ ⴷ ⵏⵛⵛ ⴷ ⵉⵊⵊⵏ ⵉ ⵉⵙⵡⵉⵏ ⵣⴳ ⵜⴰⵍⵉⵡⵉⵏ ⵉ ⵣⵉ ⵙⵡⵉⵏ ⵢⵉⵏⴰ ⵉ ⴷ ⵉⴷⴰⵔⵖ…
ⴷ ⵜⵉⴷⵜ, ⴰⵎⵥⵥⵓⵖ ⵏⵏⵖ ⵉⵙⵍⵎⴷ ⴰⵏⵖ ⵎⵉⵏ ⴷ ⵉⵍⵇⴹ ⵣⵉ ⵍⵄⵡⴰⵢⴷ ⵏⵏⵖ, ⵎⴰⵛⴰ ⵓⵍⴰ ⴷ ⵜⵉⵟⵟ ⵖⵔⵙ ⵜⴰⵙⵖⴰⵔⵜ ⵏⵏⵙ, ⵉ ⵣⵉ ⴰⵏⵖ ⵜⴳⵡⵡⴷ ⵖⵔ ⵜⵉⵔⴰ ⵏ ⵎⵉⵏ ⵏⵓⵔⴰ. ⵜⵉⵟⵟ ⵉ ⵣⵉ ⵏⵖⵔⴰ ⵉⵙⴼⵔⴰ ⴷ ⵜⵏⴼⴰⵙ ⴷ ⵉⵎⵣⴳⵓⵏⵏ ⵏ ⵍⴳⵏⵓⵙ ⵏⵏⵉⴹⵏ, ⵜⵙⵙⵓ ⴰⵏⵖ ⴰⴱⵔⵉⴷ ⵃⵓⵎⴰ ⴰⴷ ⵏⵉⵏⵉ : ⵎⴰⵖⴰⵔ ⵍⵍⴰ ⵏⵛⵛⵉⵏ ⵓⵔ ⵏⵜⵜⴳⴳ ⵙ ⵢⵉⵍⵙ ⵏⵏⵖ ⵎⵉⵏ ⴳⴳⵉⵏ ⵢⵉⵏⵏⵉⴹⵏ ⵙ ⵢⵉⵍⵙⴰⵡⵏ ⵏⵏⵙⵏ ?
ⵎⵉⵏ ⵄⵏⴰⵏⵜ ⵜⵄⵏⴽⵔⴰⴼ ⵉ ⵜⵓⴼⵉⴷ ⴷⴳ ⵓⴱⵔⵉⴷ ⵏ ⵜⵉⵔⵔⴰ ⵙ ⵜⵎⴰⵣⵉⵖⵜ ? ⵓⵊⴰⵔ ⵄⴰⴷ ⴳ ⵜⵉⵍⵉⵏ ⵓⵙⵉⵖⵉ ⵏ ⵓⴼⵓⵙ ⵉ ⵉⵇⵇⵉⵍⵍⵜⵏ, ⴷ ⵡⴰⵏⵏⴰⵍ ⵉ ⵢⵓⴷⵔⵓⵙⵏ ?
ⵡⴰⴷⵎ ⴰⵢⵉ ⴰⴷ ⵉⵏⵉⵖ ⴰⵇⴰ ⵜⵉⵔⵔⴰ ⵙ ⵜⵎⴰⵣⵉⵖⵜ, ⵓⵍⵉⴷ ⴷ ⴰⵙⵏⴼⵍⵓⵍ ⵡⴰⵀⴰ, ⵜⵉⵔⴰ ⵙ ⵜⵎⴰⵣⵉⵖⵜ ⴷ ⵉⵊ ⵏ ⵡⵓⴹⵓⴼ ⵏ ⵓⵛⴱⴰⵔ ⴰⵔⵏⴷⴰⴷ ⵉ ⵇⵟⵟⵓ. ⵣⵉ ⴱⴷⴷⵓ, ⵓⴽⵉⵖ ⴱⵍⵍⵉ ⵏⵛⵛ ⵓⵔⵉⴷ ⵜⵜⴰⵔⵉⵖ, ⵣⵉ ⴱⴷⴷⵓ, ⵜⵜⵓⵖⴰ ⴱⵏⵏⵉⵖ. ⵜⵜⵓⵖⴰ ⵙⵔⵓⵙⵉⵖ ⵜⵍⴰⵊⵓⵕⵜ ⵅⴼ ⵜⵍⴰⵊⵓⵔⵜ, ⴰⵙⴽⴽⵉⵍ ⵅ ⵓⵙⴽⴽⵉⵍ… ⴱⵏⵏⵉⵖ ⵉⵊ ⵏ ⵍⵇⵏⴹⵕⵜ ⵣⵉ ⵜⴰⵍⵍⵙⵜ ⵖⵔ ⵜⴼⴰⵡⵜ… ⵜⵉⵄⵏⴽⵔⴰⴼ ⵜⵜⵓⵖⴰ ⵜⵏⵜ ⴷ ⴰⵏⵥⴰⵕ, ⴱⴷⴷⵓ ⵣⴳ ⵉⵎⴰⵡⴰⵍⵏ ⵉ ⵢⵓⴷⵔⵓⵙⵏ, ⵡⴰⵅⵅⴰ ⵍⵍⴰⵏ ⵄⴰⴷ ⵜⵅⵚⵚ ⵍⵅⴷⵎⵜ ⴽⵜⵔ. ⵔⵏⵉ ⵅ ⵎⴰⵏⴰⵢⴰ, ⵜⵉⴷⴽⴽⵯⴰⵏⵉⵏ ⵉ ⵖⴰ ⵉⴼⵙⵔⵏ ⵙ ⵜⵎⴰⵣⵉⵖⵜ ⵓⴷⵔⵓⵙⵏⵜ, ⴰⵏⵏⴰⵍⵏ ⵜⵎⵔⵙⴰⵍ ⵡⴰⵅⵅⴰ ⵉⵍⵍⴰ ⵄⴰⴷ ⵓⵔ ⵉⵍⵍⵉ ⵎⴰⵎⵛ ⵏⵙⵙⵉⵜⵉⵎ ⴰⴷⵢⵉⵍⵉ ⵃⵓⵎⴰ ⴰⴷ ⵜⵙⵙⵓⵔⴼ ⵜⵎⴰⵣⵉⵖⵜ ⵖⵔ ⵣⵣⴰⵜ. ⴱⵍⴰ ⵎⴰ ⴰⴷ ⵏⵙⵙⵉⵡⵍ ⵅ ⵓⵙⵎⵥⵉ ⵉ ⵣⵉ ⵅⵣⵣⵔⵏ ⵡⴰⵟⵟⴰⵚ ⵏ ⵎⵉⴷⴷⵏ ⵖⵔ ⵜⵉⵔⴰ ⵙ ⵜⵎⴰⵣⵉⵖⵜ.
ⵎⴰⵎⵛ ⵜⴻⵜⵜⵡⴰⵍⵉⴷ, ⵜⵉⵣⵎⵎⴰⵔ ⵉ ⵉⵜⵜⵡⴰⴳⴳⵏ ⴳ ⵜⵙⴽⵍⴰ ⵜⴰⵎⴰⵣⵉⵖⵜ ⴰⵔ ⴰⵙⵙ ⴰ, ⵎⴰ ⵉⵡⴹⵏⵜ ⵖⵔ ⵓⴳⴷⵓⴷ, ⵏⵉⵖ ⵄⴰⴷ ⴰⴱⵔⵉⴷ ⴷ ⴰⵣⴳⵔⴰⵔ ?
ⵜⴰⵙⴽⵍⴰ ⵜⴰⵎⴰⵣⵉⵖⵜ, ⵜⵎⵙⴰⵔ ⴰⵙ ⴰⵎ ⵛⴰ ⵏ ⵓⴳⵓⵊⵉⵍ ⵉⵍⴰ ⵜⵜⵡⴰⵇⵇⵏⵏⵜ ⵅⴰⴼⵙ ⵜⵡⵓⵔⴰ ⴷ ⵜⴱⵓⵔⵊⴰⵜⵉⵏ ⴰⵟⵟⴰⵚ ⵣⴳ ⵡⴰⵎⵉ. ⴰⴳⵓⵊⵉⵍ ⴰ, ⴰⵇⵇⴰ ⵜ ⵄⴰⴷ ⵉⵙⵇⵔⵇⵓⴱ ⴷⵉ ⵜⵡⵓⵔⴰ. ⵡⴰⵀ, ⵓⵍⴰ ⴷ ⵉⵊⵊⵏ ⵎⴰ ⵉⵣⵎⵎⵔ ⴰⴷ ⵉⵏⴽⵔ ⴱⵍⵍⵉ ⵏⵉⵡⴹ ⴰⴷ ⵏⵙⵙⵓ ⵜⵉⵙⵉ ⵉ ⵢⵉⵛⵜ ⵏ ⵜⵙⵓⵜⴰ ⵜⴰⵙⴽⵍⴰⵏⵜ ⵜⴻⵜⵜⵕⵥⵥⴰ ⵉⴳⵓⴷⴰⵔ ⵏ ⵜⵎⵉⵡⴰⵏⵜ ⵉ ⵅⴰⴼⵙ ⵉⵊⵏⵉⵏ ⵅⴼ ⵉⴷⵎⴰⵔⵏ ⵣⴳ ⵡⴰⵎⵉ ⵜⵍⵍⴰ ⵜⵎⴰⵣⵉⵖⵜ, ⵜⵉⵔⴰ ⵙ ⵜⵎⴰⵣⵉⵖⵜ ⵍⵅⵅⵓ, ⴱⴷⴰⵏⵜ ⵜⵜⴰⴼⵏⵜ ⴰⵎⴽⴰⵏ ⵏⵏⵙⵏⵜ, ⴱⴷⴰⵏ ⵉⵎⴰⵔⵉⵜⵏ ⵜⵜⵔⵔⴰⵏ ⴰⵙⵏⵜ ⵜⴰⵢⵏⵉⵜ, ⵓⵊⴰⵔ ⵄⴰⴷ ⵣⴳ ⵡⴰⵎⵉ ⵜⵜⵡⴰⴳⴳⵏⵜ ⵜⵖⵓⵔⵉⵡⵉⵏ ⵜⵉⵎⴰⵣⵉⵖⵉⵏ ⴳⵉ ⵜⵙⴷⴷⴰⵡⵉⵜⵉⵏ ⵏ ⵍⵎⵖⵔⵉⴱ. ⴷⵉⵏ ⵉⵙⵏⴼⵍⵓⵍⵏ ⴷ ⵉⵎⴰⵢⵏⵓⵜⵏ, ⵍⵅⵣⵔⴰⵜ ⴷ ⵜⵉⵎⴰⵢⵏⵓⵜⵉⵏ, ⴷⵉⵏ ⴰⵙⵓⵖⵍ ⵖⵔ ⵜⵎⴰⵣⵉⵖⵜ… ⵎⴰⵏⴰⵢⴰ ⵎⵕⵕⴰ ⵓⵔ ⵏⵣⵎⵎⵔ ⵖⵉⵔ ⴰⴷ ⴰⵙ ⵏⵡⵡⵜ ⴷⴳ ⵡⵓⵕⵓ .
ⵎⴰⵛⴰ ⵄⴰⴷ ⵏⵉⴳⴳⵯⵊ ⵅ ⵓⴳⴷⵓⴷ ⵢⵉⵔⵉⵡⵏ, ⵄⴰⴷ ⵉⵚⵓⵔⴰⴼ ⵏⵏⵖ ⴷ ⵉⵇⵓⴹⴰⴹⵏ, ⵎⵉⵏⵣⵉ ⵄⴰⴷ ⵜⴰⵎⴰⵣⵉⵖⵜ ⵓⵔ ⵜⵓⴼⵉ ⴰⵎⴽⴰⵏ ⵏⵏⵙ ⵏⵉⵛⴰⵏ ⴷⴳ ⵢⵉⴳⵔ ⵓⵙⵍⵎⴷ ⴷⵉ ⵜⵉⵏⵎⵍ ⴷ ⵉⵙⵉⵏⴰⵏ ⴷ ⵜⵙⴷⴷⴰⵡⵉⵜ ⴷ ⵡⴰⵎⵎⴰⵙⵏ ⵏ ⵓⵙⵎⵓⵜⵜⴳ… ⵄⴰⴷ ⵓⵔ ⵜⵓⴼⵉ ⴰⵎⴽⴰⵏ ⵏⵏⵙ ⴰⵎⵏ ⵜⵍⴰ ⴳ ⵢⵉⴳⵔ ⵏ ⵓⵙⵏⵖⵎⵙ… ⵜⴰⵙⴽⵍⴰ ⵜⴰⵎⴰⵣⵉⵖⵜ ⴷⵉ ⵜⵓⵖⴱⴰⵢⵜ ⵏⵏⵙ, ⴷ ⵉⵛⵜ ⵏ ⵜⵙⴽⵍⴰ ⵏ ⵜⵏⵣⴱⴰⵢⵜ, ⵢⵓⵔⴰ ⵅⴰⴼⵙ ⴰⴷ ⵜⵇⵇⵉⵎ ⴰⵎⵎⵓ, ⵓⵔ ⵙⵙⵉⵏⵖ ⴰⵔ ⵎⵍⵎⵉ… ⴷ ⵉⵊⵊ ⵏ ⵜⵙⴽⵍⴰ ⵉⵅⴱⴱⵛⵏ ⴷⴳ ⵓⵥⵔⵓ ⴱⴰⵛ ⴰⴷ ⵜⵇⵇⵉⵎ, ⴱⴰⵛ ⴰⴷ ⵜⴷⴷⵔ .
ⵎⵉⵏ ⵄⵏⴰⵏⵜ ⵜⵚⵓⵕⵉⴼⵉⵏ ⵉ ⵉⵅⵚⵚⵏ ⴰⴷ ⵜⵜⵡⴰⴳⴳⵏⵜ ⴱⴰⵛ ⴰⴷ ⵜⵓⴳⵓⵔ ⵜⵙⴽⵍⴰ ⵜⴰⵎⴰⵣⵉⵖⵜ ⵖⵔ ⴷⴰⵜ, ⴰⴷ ⵜⴹⵎⵏ ⵜⵉⴽⵍⵉ ⵏⵏⵙ ?
ⵉⵅⵚⵚ ⴰⵏⵖ ⴷ ⴰⵎⵣⵡⴰⵔⵓ, ⴰⴷ ⵏⴱⵏⴰ ⵉⵛⵜ ⵏ ⵜⵡⵏⵏⴰⴹⵜ ⵉ ⵖⴰ ⵉⴽⵙⵉⵏ ⵜⴰⵙⴽⵍⴰ ⵏⵏⵖ, ⵓⵍⵉⴷ ⴰⴷ ⵏⵊⵊ ⴰⵎⴰⵔⵓ ⴰⴷ ⵉⵎⵅⵜⵡⴰⵢ ⵓⵃⵃⴷⵙ, ⴰⴷ ⵉⵎⵎⵏⵖ ⵓⵃⵃⴷⵙ. ⵉⵅⵚⵚ ⴰⵏⵖ ⴰⴷ ⵏⵔⵔ ⵜⴰⵢⵏⵉⵜ ⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵍⵎⴷ, ⴰⴷ ⴰⵙ ⵏⵓⵛ ⴰⴼⵓⵙ, ⵃⵓⵎⴰ ⴰⴷ ⵜⵉⵍⵉ ⴷ ⵉⵛⵜ ⵏ ⵜⵓⵜⵍⴰⵢⵜ ⵏ ⵓⵙⵡⵉⵏⴳⵎ ⴷ ⵓⵙⵏⴼⵍⵓⵍ. ⴰⵚⵓⵔⵉⴼ ⵡⵉⵙ ⵙⵉⵏ, ⵏⵜⵜⴰ ⴷ ⴰⵚⵓⵔⵉⴼ ⵏ ⵓⴼⵙⴰⵔ ⵙ ⵜⵎⴰⵣⵉⵖⵜ, ⵉⵅⵚⵚ ⵜⴰⵢⵏⵉⵜ ⴷ ⵜⴰⵎⵇⵇⵔⴰⵏⵜ ⴷⴳ ⵓⵖⵣⴷⵉⵙ ⴰ, ⴰⴷ ⵜⵜⵡⴰⵀⵡⵏⵏ ⵉⴱⵔⵉⴷⵏ ⴰⵔⵏⴷⴰⴷ ⵉⵎⴰⵔⵓⵜⵏ ⵃⵓⵎⴰ ⴰⴷ ⴰⵡⴹⵏ ⴰⴷ ⴼⵙⵔⵏ ⵉⵙⵏⴼⵍⵓⵍⵏ ⵏⵏⵙⵏ. ⴰⵎⵏ ⵏⵣⵎⵎⵔ ⴰⴷ ⵏⵉⵏⵉ, ⴷ ⴰⴽⵓⴷ ⵃⵓⵎⴰ ⴰⴷ ⵉⵍⵉⵏⵜ ⵜⵎⵔⵙⴰⵍ ⵏ ⵓⵣⵖⴰⵏ, ⵉ ⵖⴰ ⵉⵚⵚⵓⵕⴼⵏ ⴰⴽⴷ ⵜⵙⴽⵍⴰ ⵜⴰⵎⴰⵣⵉⵖⵜ, ⵃⵓⵎⴰ ⴰⴷ ⴰⵙ ⵜⴻⵜⵜⵡⴰⵡⵛ ⵜⵓⵖⴱⴰⵢⵜ ⴷ ⵓⵙⴼⵙⵉ. ⵙ ⵓⵢⴰ, ⵏⵃⴷⴰⵊ ⵄⴰⵡⴷ ⵃⵓⵎⴰ ⴰⴷ ⵏⵙⵙⴳⵎ ⵉ ⵉⵃⵏⵊⵉⵔⵏ ⵉⵎⵥⵥⵢⴰⵏⵏ ⴰⵇⴰⵙⵉ ⵏ ⵜⵛⵓⵏⵉ ⵏ ⵜⵙⴽⵍⴰ ⵏⵏⵖ, ⵣⴳⵙ ⵉ ⵖⴰ ⵜⵜⵡⴰⵇⵇⵏⵏ ⴰⴽⴷ ⵜⵎⴰⴳⵉⵜ ⵏⵏⵙⵏ ⴷ ⵜⵓⵜⵍⴰⵢⵜ ⵏⵏⵙⵏ ⴷ ⵜⴷⵍⵙⴰ ⵏⵏⵙⵏ.
ⴰⵎⵓⴷ ⵉⵏⴽ “ⵜⵜⵓⵖ” ⴷⴰⴳⵙ ⵜⵉⵖⴰⵡⵙⵉⵡⵉⵏ ⵇⵇⵏⵏⵜ ⵖⵔ ⴰⵔⵉⴼ, ⵎⵉⵏ ⵛⴽ ⵉⵊⵊⵉⵏ ⴰⴷ ⵜⴰⵔⵉⴷ ⴰⵎⵓⴷ ⴰ ? ⵎⴰⵏ ⵜⵉⴱⵔⴰⵜⵉⵏ ⵉ ⵜⵅⵙⴷ ⴰⴷ ⵣⴳⵙ ⵜⵙⵙⵉⵡⴹⴷ ?
ⴰⵔⵉⴼ, ⵓⵍⵉⴷ ⴷ ⵉⵊ ⵏ ⵡⴰⵣⵣⵔⴳ ⴷ ⴰⵊⵓⴳⵔⴰⴼⵉ ⵉⵎⵎⵔⵙ ⵅⴼ ⵜⵎⴰ ⵏ ⵜⵎⵓⵔⵜ. ⴰⵔⵉⴼ, ⵏⵣⵎⵎⴰⵔ ⴰⴷ ⵖⵔⵙ ⵏⵅⵣⴰⵔ ⴰⵎ ⵢⵉⵊⵊ ⵏ ⵡⵓⵍ ⵉⵜⵜⵡⴰⵜⵜⵓⵏ. “ⵜⵜⵓⵖ”, ⵙ ⵍⵎⵄⵏⴰ ⵏⵏⵙ ⵢⵓⵍⵍⵖⵏ, ⵏⵜⵜⴰ ⴷ ⵉⵊⵊ ⵏ ⵓⵣⵎⵣ ⵏ ⵓⴹⵓⵇⵇⵥ ⴰⴳⵯⵏⵙⴰⵏ. ⵅⵎⵉ ⵉⵜⵜⵎⵓⵜⵜⵓⵢ ⵓⵅⵢⵢⵇ ⵃⵎⴰ ⴰⴷ ⵉⴷⵡⵍ ⴷ ⵜⴰⵇⵙⵙⵉⵙⵜ, ⵏⵉⵖ ⵅⵎⵉ ⵉⵙⵙⴼⴰⵢ ⵡⵓⵍ ⵉⴷⴷⵓⵇⵎⴰⵏ, ⵃⵓⵎⴰ ⴰⴷ ⵉⵔⵛⵎ ⵉⵙⴽⴽⵉⵍⵏ ⴷ ⴰⵙⴼⵔⵓ.
ⵅⵙⵖ ⴰⴷ ⵢⵉⵍⵉ ⵡⴰⵎⵓⴷ ⴰ, ⴷ ⵜⴰⵎⴰⵜⴰⵔⵜ ⵉⵛⵀⴷⵏ ⵅⴼ ⵜⵉⵇⵇⵙⵜ ⴷ ⵓⵡⵣⵡⵣ ⵉ ⵉⵙⵙⴷⵍⵏ ⵅⴼ ⵢⵉⵊ ⵏ ⵓⴷⵖⴰⵔ ⵍⵓⵍⵖ ⴷ ⵣⴳ ⵓⵄⴷⴷⵉⵙ ⵏⵏⵙ. ⴷ ⵉⵛⵜ ⵏ ⵜⵎⴰⵜⴰⵔ ⵜⵛⵀⴷ ⵅⴼ ⵓⵙⵓⵙⵎ ⴷ ⴰⵣⴳⵔⴰⵔ ⵓⵔ ⵏⵣⵎⵎⴰⵔ ⴰⴷ ⴰⵙ ⵏⵚⴱⵕ ⵓⵊⴰⵔ. ⵓⴷⵎⴰⵡⵏ ⵏ ⵜⵎⵖⴰⵔⵉⵏ ⵉⵜⵜⵔⴰⵊⴰⵏ ⵜⵉⵙⴰⵡⵉⵏ ⵏⵏⵙⵏⵜ ⴰⴷ ⴷⵡⵍⵏⵜ, ⵓⵔ ⴷ ⴷⴷⵉⴽⴽⵯⵉⵍⵏⵜ, ⵓⴷⵎⴰⵡⵏ ⵏ ⵜⵚⵓⴹⴰⵔ ⵢⵓⵥⵖⵏ ⴷ ⵜⵓⴷⵔⵉⵏ ⵏ ⵜⴰⵔⵔⵉⵙⵜ ⵉⵀⵔⵓⵔⴰⵏ, ⴷ ⵜⵓⴷⵔⵜ ⵏ ⵍⵄⵔⴰⵙⵉ ⵉⵏⴼⴰⵔⴰⵔⵏ… ⵎⵕⵕⴰ ⵎⴰⵏⴰⵢⴰ ⴷ ⵉⵊ ⵏ ⵜⵇⴰⵜⵛⵓⵜ ⵣⵉ “ⵜⵜⵓⵖ” ⵉ ⵓⵔ ⵜⵜⴻⵜⵜⵓⵖ.
ⵜⴰⴱⵔⴰⵜ ⵉⵏⵓ ⵜⵓⵖⴰ ⵜⵜ ⴷ ⵜⴰⵇⵓⴹⴰⵜ : ⴰⵔⵉⴼ, ⵓⵔ ⵉⵍⵍⵉ ⴷ ⵉⵊⵊ ⵏ ⵓⵎⵣⵔⵓⵢ ⵏ ⵜⴰⵜⵜⵓⵜ, ⵎⴰⵛⴰ ⴰⵔⵉⴼ ⴷ ⵉⵊⵊ ⵏ ⵍⵅⵅⵓ ⵉ ⵉⵙⵜⴰⵀⵍⵍⵏ ⴰⴷ ⵜ ⵏⵥⵕ, ⴰⴷ ⵜ ⵏⴰⵔⵉ, ⴰⴷ ⴰⵙ ⵏⵙⵍⵍ, ⴰⴷ ⵜ ⵏⴷⴷⵔ..
ⴰⴷⵍⵉⵙ ⵉⵏⴽ ⴰⵎⴳⴳⴰⵔⵓ : “ⵜⵓⴷⵔⵜ ⵊⴰⵔ ⵉⵖⵏⴷⴰⵏ”. ⵎⴰⵢⵎⵎⵉ ⵜⵉⵅⴹⴰⵔⴷ ⴰⵣⵡⵍ ⴰ ? ⵎⵉⵏ ⵉⵅⵙ ⴰⴷ ⵢⵉⵏⵉ ⴷⴳ ⵡⴰⵣⵣⵔⴳ ⴰⵙⴽⵍⴰⵏ ?
“ⵜⵓⴷⵔⵜ ⵊⴰⵔ ⵉⵖⵏⴷⴰⵏ” ⴷ ⵉⵊⵊ ⵏ ⵓⵏⵄⴰⵎ ⴱⵍⵍⵉ ⵜⵓⴷⵔⵜ ⵓⵔ ⵜⵀⵡⵉⵏ. ⵜⵓⴷⵔⵜ ⵇⴰⵄ ⴷ ⵜⵉⵙⵍⵍⵢⵉⵡⵉⵏ ⵖⵣⵉⵏⵜ ⵙ ⵜⵔⵎⵉⵜⵉⵏ ⴷ ⵉⵡⵟⵟⵓⵜⵏ, ⴷ ⵓⴱⴷⴷⵉ ⴷ ⵡⵓⴹⵓ ⵏ ⵓⵛⴱⴰⵔ. ⵙⵜⵉⵖ ⴰⵣⵡⵍ ⴰ, ⵎⵉⵏⵣⵉ ⵣⵎⵎⴰⵔⵖ ⴰⴷ ⵉⵏⵉⵖ ⴷ ⵜⵉⵙⵉⵜ ⵏ ⵢⵉⵛⵜ ⵏ ⵜⴼⵍⵙⴰⴼⵜ ⵏ ⵜⵉⵔⵔⴰ ⵉⵏⵓ : ⵜⵉⵔⴰ ⵓⵔⵉⴷ ⵉ ⴱⵉⵙⵜⴰ, ⵜⵉⵔⴰ ⵉ ⵓⵙⵓⴼⵖ ⵏ ⵜⴰⵢⵛⵉⵜⵉⵏ, ⵜⵉⵔⴰ ⴷ ⵜⵖⵓⵢⵢⵉⵜ ⵉⴷⴷⵓⵔⵔⵢⵏ, ⵜⴻⵜⵜⴼⴼⵖ ⴷ ⵃⵎⴰ ⴰⴷ ⵜⵎⵎⵍ ⵉⵅⴼ ⵏⵏⵙ.
ⵉⵖⵏⴷⴰⵏ ⴷⵉ ⵡⴰⵎⵓⴷ ⴰ, ⴷ ⵉⵊ ⵏ ⵜⵡⵍⴰⴼⵜ ⵏ ⵇⴰⵄ ⵎⵉⵏ ⵅⴰⴼⵏⵖ ⵉⵙⵙⵇⴰⵙⴰⵃⵏ ⵜⵓⴷⵔⵜ, ⴰⵎⵏ ⵣⵎⵎⵔⵏ ⴰⴷ ⵉⵍⵉⵏ ⵉⵖⵏⴷⴰⵏ ⴷ ⵉⵊⵊ ⵏ ⵍⵃⴰⵊⵜ ⵉ ⵖⴰ ⵉⴽⵙⵉⵏ ⵜⵓⴷⵔⵜ, ⴰⴷ ⵜⵜ ⵉⵙⵎⵓⵜⵜⵉ ⵖⵔ ⵎⴰⵏⵉ ⵏⵏⵉⴹⵏ ⵙ ⵓⵖⵉⵍ ⵅⴰⴼⵙ, ⴰⵎⵏ ⴽⵙⵙⵉⵏ ⵉⵖⵏⴷⴰⵏ ⵏ ⵓⵎⵣⵉⵍ ⵓⵣⵣⴰⵍ ⵣⵉ ⵜⵎⵙⵙⵉ ⵖⵔ ⵡⴰⵎⴰⵏ.
ⵎⴰⵎⵛ ⵜⴻⵜⵜⴳⴳⴷ ⵜⴻⵜⵜⵉⵅⴹⴰⵔⴷ ⵉⵣⵡⵉⵍⵏ ⵉ ⵜⵡⵓⵔⵉⵡⵉⵏ ⵉⵏⴽ ⵜⵉⵙⴽⵍⴰⵏⵉⵏ ? ⵎⴰ ⵉⵣⵡⵉⵍⵏ ⵉⵏⴽ ⴷ ⵜⵉⵙⵉⵜ ⵏ ⵜⵓⵎⴰⵢⵉⵏ ⵏ ⵜⵡⵓⵔⵉⵡⵉⵏ ⵉⵏⴽ, ⵏⵉⵖ ⵜⴻⵜⵜⵊⵊⵉⴷ ⵉⵎⵖⵔⵉ ⴰⴷ ⵉⵏⴷⵀ ⴰⵣⵡⵍ ⵎⴰⵏⵉ ⵉⵅⵙ ?
ⴰⵣⵡⵍ ⵖⴰⵔⵉ, ⵓⵔ ⴷ ⵉⵜⵜⵉⵙ ⴷⵖⵢⴰ, ⵓⵔ ⵉⵀⵡⵉⵏ ⵛⴰ ⴰⴷ ⵜ ⵙⵙⵔⵙⵖ. ⴰⵣⵡⵍ, ⵉⵜⵜⴰⵙ ⴷ ⴰⵡⴰⵔⵏ ⵉ ⵢⵉⵊⵊ ⵏ ⵓⵎⵙⴽⵙⵉ ⴷ ⴰⵎⵇⵇⵔⴰⵏ ⴰⴽⴷ ⵓⴹⵕⵉⵚ. ⴰⵅⵎⵉ ⴷ ⵉⵙⵎ ⵏⵏⵙ ⵏ ⵜⵉⴷⵜ ⵉ ⴷ ⵉⵜⵜⴱⴰⵏⵏ ⵙⴳⴳⴰ ⵉ ⵖⴰ ⵉⵚⵚⴼⴰ ⵓⵊⵏⵏⴰ. ⵛⴰ ⵏ ⵜⵡⴰⵍⴰⵜⵉⵏ, ⴰⵣⵡⵍ ⵉⵜⵜⵉⵍⵉ ⴷ ⵜⵉⵙⵉⵜ ⵏ ⵓⴹⵕⵉⵚ, ⴷⵉ ⵜⵡⴰⵍⴰⵜⵉⵏ ⵏⵏⵉⴹⵏ, ⵉⵜⵜⵉⵍⵉ ⴷ ⵜⴰⵡⴰⴼⵉⵜ ⵉⵙⵙⵏⵀⵣⵣⴰ ⵉⵙⵇⵙⵉⵜⵏ ⴷⴳ ⵡⴰⵍⵍⵉ ⵏ ⵉⵎⵖⵔⵉ.
ⵓⵔ ⵃⵎⵎⵍⵖ ⵉⵣⵡⵉⵍⵏ ⵉⵜⵜⵇⵏⵏ ⴰⴹⵕⵉⵚ, ⵔⵣⵣⵓⵖ ⵍⴱⴷⴰ ⵅⴼ ⵉⵣⵡⵉⵍⵏ ⵉ ⵜ ⵉⵕⵥⵥⵎⵏ, ⵉⵣⵡⵉⵍⵏ ⵉ ⵉⵜⵜⴳⴳⵏ ⴷⵖⴷⵖ ⵉ ⵉⵙⵇⵙⴰⵏ, ⵉⴼⵏ ⵖⴰⵔⵉ ⵉⵣⵡⵉⵍⵏ ⵉⵜⵜⵔⵔⴰⵏ ⵅⴼ ⵉⵙⵇⵙⴰⵏ. ⵎⵉⵏⵣⵉ ⵜⴰⵙⴽⵍⴰ ⵏ ⵜⵉⴷⵜ, ⵎⴰⵎⵛ ⵜⵜⵡⴰⵍⵉⵖ, ⵓⵔ ⵜⵜ ⵇⵇⵉⵔⵏ ⵛⴰ ⵉ ⵜⵏⵏⵉ ⵉ ⴷⵉ ⵏⵇⵇⴰⵔ ⴽⵓⵍⵛⵉ, ⵎⴰⵛⴰ ⵜⴰⵙⴽⵍⴰ ⵏ ⵜⵉⴷⵜ, ⵜⵜⵡⴰⵍⵉⵖ ⵜⵜ ⴷ ⵜⵏⵏⵉ ⵉ ⵛⴽⴽ ⵖⴰ ⵉⵊⵊⵏ ⴰⴷ ⵜⵙⵔⵓⵙⵉⴷ ⵉⵙⵇⵙⴰⵏ ⵡⴰⵅⵅⴰ ⵜⵏⴼⴰⵔⴰⵔⴷ ⵣⴳⵙ.
ⴳ ⵜⵏⴼⴰⵙ ⵉⵏⴽ “ⵡⵉ ⴷ ⵢⵓⴷⴼⵏ ⵖⵔ ⵡⴰⵣⵣⴰⵔⴳ”, ⵎⴰ ⵜⵉⵡⴹⴷ ⴰⴷ ⴷⴳⵙⵏⵜ ⵜⵙⵃⴹⵔⴷ ⵉⵙⵏⵜⴰⵍ ⵉ ⵉⵇⵇⵏⵏ ⵖⵔ ⵜⵎⴰⵣⵉⵖⵜ (ⵜⴰⵏⵜⵜⵉⵜ, ⴰⵢⴷⴰ, ⵜⵓⵜⵍⴰⵢⵜ)? ⴷ ⵎⴰ ⵏⵣⵎⵎⵔ ⴰⴷ ⵏⵃⵙⴱ ⴰⵏⴰⵡ ⴰ ⵏ ⵜⵏⴼⴰⵙ ⴰⵎ ⵢⵉⵊ ⵏ ⵓⴽⵍⴰⵚⵉ ⵏ ⵜⵏⵣⴱⴰⵢⵜ?
ⴷⵉ ⵜⵓⵍⵍⵉⵙⵉⵏ ⴰ, ⵜⴰⵎⴰⵣⵉⵖⵜ, ⵓⵔⵉⴷ ⴷ ⵜⵓⵜⵍⴰⵢⵜ ⵏ ⵡⴰⵍⵍⴰⵙ ⵡⴰⵀⴰ, ⴰⵏⵉⵛⵜ ⵏ ⵎⵉⵏ ⵜⵍⵍⴰ ⴷ ⵉⵎⴰⵏ ⵏ ⵜⵏⴼⴰⵙ. ⵉⵡⵔⵉⴽⵏ ⵜⵜⵏⵀⵣⵣⴰⵏ ⴷⴳ ⵡⴰⵣⵣⵔⴳ ⴷ ⴰⵎⴰⵣⵉⵖ, ⵙⵙⴰⵡⴰⵍⵏ ⵙ ⵢⵉⵍⵙ ⴷ ⴰⵎⴰⵣⵉⵖ, ⴽⵙⵙⵉⵏ ⵜⴰⵎⴰⴳⵉⵜ ⴷ ⵜⴰⵎⴰⵣⵉⵖⵜ… ⵜⵜⴷⵔⵏ ⵊⴰⵔ ⵙⵉⵏ ⵏ ⵉⵣⵎⴰⵣ: ⵉⴹⵏⵏⴰⴹ ⵉ ⵉⴽⵙⵉⵏ ⴷⴷⵇⵍ ⵏ ⵡⴰⵢⴷⴰ, ⴷ ⵍⵅⵅⵓ ⵉ ⵉⵜⵜⴷⴷⵔⵏ ⴰⵛⵔⵔⴳ ⵏ ⵉⵚⵓⵕⴰⴼ.
ⵡⴰⵀ, ⵏⵣⵎⵎⴰⵔ ⴰⴷ ⵏⵉⵏⵉ ⴷ ⵜⵉⴷⵜ ⴷ ⵉⵛⵜ ⵏ ⵜⵏⵣⴱⴰⵢⵜ ⴷ ⵜⴰⴷⵍⵙⴰⵏⵜ. ⵎⵉⵏⵣⵉ ⵅⵎⵉ ⵏⵜⵜⴰⵔⵉ ⵙ ⵜⵓⵜⵍⴰⵢⵜ ⵏⵏⵖ, ⵏⵜⵜⴱⴷⴷⴰ ⴷⴳ ⵡⵡⵓⴷⵎ ⵏ ⵜⴰⵜⵜⵓⵜ. ⵏⵜⵜⵔⵔⴰ ⴷ ⵜⴰⵢⵏⵉⵜ ⵉ ⵜⵡⵏⴳⵉⵎⵜ ⵜⴳⵣⴰⵎ ⵙ ⵓⵎⵢⵢⴽ, ⵜⴳⵣⵎ ⵙ ⵓⵙⴱⵄⵄⴷ… ⵡⴰ ⵓⵍⵉⴷ ⴷ ⴰⴳⵔⵔⵄ ⵏ ⵓⵙⵏⴼⵍⵓⵍ, ⴰⵏⵉⵛⵜ ⵏ ⵎⵉⵏ ⵉⵍⵍⴰ ⴷ ⵜⴰⵏⴼⵓⵍⵜ ⵣⴰⴳⵉ ⵖⵔ ⵉⵎⵖⵔⵉ ⵃⵎⴰ ⴰⴷ ⵏⵡⵡⵜ ⵉⵥⵡⵕⴰⵏ ⵉ ⵜⵓⵜⵍⴰⵢⵜ ⵏⵏⵖ ⵜⴰⵎⴰⵣⵉⵖⵜ, ⴰⴷ ⵏⵔⵔ ⴰⵛⴰⵍ ⵖⵔ ⵉⵥⵓⵕⴰⵏ ⵏ ⵜⵎⴰⴳⵉⵜ.
ⵎⴰ ⵜⴹⴼⵔⴷ ⵜⴰⴱⵔⵉⴷⵜ ⵏ ⵛⴰ ⵏ ⵓⵎⴰⵔⵓ ⴷⵉ ⵜⵏⴼⴰⵙ ⴰ ⵏⵏⵛ ? ⵣⵉ ⵜⵙⴽⴰⵍⴰ ⵜⴰⵎⴰⵣⵉⵖⵜ ⵏⵉⵖ ⵜⴰⵎⴰⴹⵍⴰⵏⵜ ?
ⵏⵛⵛ, ⵣⵉ ⵖⵔⵉ, ⵓⵔ ⵉⵜⵜⵏⵏⴹ ⵓⵢⴰ ⵅⴼ ⵜⴽⵙⵙⵉⵜ ⵣⵉ ⵡⴰ ⵏⵉⵖ ⵣⵉ ⵡⵉⵏ, ⴰⵏⵉⵛⵜ ⵏ ⵎⵉⵏ ⵉⵜⵜⵏⵏⴹ ⵓⵢⴰ ⵅⴼ ⵓⵎⵛⴱⴱⴰⴽ ⵏ ⵜⵏⴼⴰⵙ ⵏ ⵜⵓⴷⵔⵜ, ⴷ ⵜⵔⵎⵉⵜⵉⵏ ⵜⵉⵏⴼⴳⴰⵏⵉⵏ ⵉ ⵏⵙⵙⴳⴰⵎ ⴷ ⴰⵎⵏⵓⵙ, ⵏⵙⵇⴰⴷⴰ ⵜ ⴷ ⵉⴹⵕⵉⵚⵏ, ⴷ ⴰⵏⵜⵓⵏ ⵉ ⵡⵏⵏⵉ ⵉⵅⵙⵏ ⴰⴷ ⵉⵖⵔ ⵜⴰⴱⵔⴰⵜ. ⵏⵛⵛ, ⵣⵎⵎⵔⵖ ⴰⴷ ⵉⵏⵉⵖ ⴷ ⴰⵎⵣⵡⴰⵔⵓ, ⵎⴰⵍⴰ ⴷⵉⵏ ⵛⴰ ⵏ ⵡⵉ ⴹⴼⵕⵖ, ⴰⵇⴰ ⴷ ⴰⵢⴷⴰ ⵏⵏⵖ ⴰⵎⴰⵣⵉⵖ, ⵙ ⵜⵃⵓⵊⴰ ⵏⵏⵙ, ⴷ ⵉⵣⵍⴰⵏ ⵏⵏⵙ, ⴷ ⵜⵇⵙⵙⵉⵙⵉⵏ ⵏⵏⵙ… ⴱⵍⴰ ⵎⴰⵏⴰⵢⴰ, ⴽⵓⵍ ⴰⴹⵕⵉⵚ ⵣⴳ ⵉⴹⵕⵚⵏ ⵉ ⵅⴼ ⵎⵎⵔⵙⵏⵜ ⵜⵉⵟⵟⴰⵡⵉⵏ ⵉⵏⵓ, ⵜⵜⵓⵖⴰ ⵜ ⴷ ⵜⵉⵙⵉⵜ ⵏ ⵜⵅⵣⴰⵔⵉⵏ ⵉⵏⵓ. ⴽⵓⵍ ⴰⵎⴰⵔⵓ ⵣⴳ ⵉⵎⴰⵔⵓⵜⵏ ⵉ ⵓⵎⵉ ⵖⵔⵉⵖ, ⵉⵊⵊⴰ ⵍⴰⵜⵔ, ⵡⴰⵅⵅⴰ ⵖⵉⵔ ⴷⵔⵓⵙ ⴷⵉ ⵜⵉⵔⵔⴰ ⵉⵏⵓ. ⵎⴰⵛⴰ ⵍⴱⴷⴰ ⵜⵜⵟⵟⴼⵖ ⵉⵅⴼ ⵉⵏⵓ ⵃⵓⵎⴰ ⴰⴷ ⵉⵍⵉⵖ ⴷ ⵏⵛⵛ, ⵓⵍⵉⴷ ⴷ ⵛⴰ ⵏ ⵜⵡⵍⴰⴼⵜ ⵏ ⵛⴰ ⵏ ⵃⴷⴷ ⵏⵏⵉⴹⵏ. ⴷ ⵏⵛⵛ, ⴷ ⵉⵛⵜ ⵏ ⵜⵖⵓⵢⵢⵉⵜ ⵣⵉ ⵜⵎⵓⵔⵜ ⴰ ⵉ ⵅⴼ ⵄⵊⵊⵏⵖ.
ⴰⴽⴷ ⵓⵖⵣⴷⵉⵙ ⵏ ⵓⵙⴼⵔⵓ ⴷ ⵜⵏⴼⴰⵙ, ⵜⵓⵔⵉⴷ ⵉⵛⵜ ⵏ ⵜⵎⵣⴳⵓⵏⵜ ⴰⵣⵡⵍ ⵏⵏⵙ «ⵜⴰⵚⴹⴰⵕⵜ ⵅ ⵓⵎⴽⵙⴰ», ⴰⵎⵏ ⵜⵙⵙⵓⵖⵍⴷ ⵓⵏⴳⴰⵍ «ⵉⴼⵜⵡⵉⵙⵏ ⵙⵙⴽⵎⴰⴹⵏ» ⵏ ⴰⵎⵉⵏⴰ ⴱⵕⵡⴰⴹⵉ. ⵎⵉⵏ ⵄⵏⴰⵏⵜ ⵙⵏⴰⵜ ⴰ ⵏ ⵜⵡⵓⵔⵉⵡⵉⵏ ⴷⴳ ⵓⴱⵔⵉⴷ ⵉⵏⴽ ⴰⵙⴽⵍⴰⵏ ?
ⴰⴹⵕⵉⵚ ⵉⵏⵓ “ⵜⴰⵚⴹⴰⵕⵜ ⵅ ⵓⵎⴽⵙⴰ” ⴷ ⵉⵊⵊ ⵏ ⵓⵚⵓⵕⵉⴼ ⵏⵏⵉⴹⵏ, ⵙ ⵢⵉⵊ ⵏ ⴱⵓⵃⴱⵍ ⵏⵏⵉⴹⵏ. ⵎⵉⵏⵣⵉ ⴰⵎⵣⴳⵓⵏ ⵉⵃⴷⴰⵊ ⵏ ⵓⵅⴰⵕⵕⵚ ⵏⵏⵉⴹⵏ, ⴰⵅⴰⵕⵕⵚ ⵉ ⴷⵉ ⵜⵜⵙⵙⵃⴹⴰⵔⵉⴷ ⴰⴳⴷⵓⴷ ⵉⵅⵣⵣⴰⵔⵏ ⴷⴳ ⵉⵡⵔⵉⴽⵏ ⵉⵏⴽ. ⴰⵎⵣⴳⵓⵏ, ⵓⵔⵉⴷ ⵏⵜⵜⴰⵔⵉ ⵜ ⴱⴰⵛ ⴰⴷ ⵜ ⵏⵖⵔ ⵡⴰⵀⴰ, ⴰⵏⵉⵛⵜ ⵏ ⵎⵉⵏ ⵜ ⵏⵜⵜⴰⵔⵉ ⴱⴰⵛ ⴰⴷ ⴰⵙ ⵏⵙⵍ, ⴰⴷ ⵜ ⵏⵥⵕ. ⵎⴰⵏⴰⵢⴰ, ⵉⵜⵜⵊⵊⴰ ⴰⵏⵖ ⴰⴷ ⵏⴱⴷⴷⵍ ⵛⵡⴰⵢⵜ ⴰⵅⴰⵕⵕⵚ ⴷⵉ ⵜⵓⵜⵍⴰⵢⵜ ⴷ ⵓⴹⵕⵉⵚ.
ⵎⴰ ⴰⵙⵓⵖⵍ, ⴷ ⵉⵊ ⵏ ⵍⵃⵎⵍ ⵉⴷⵇⵍ, ⵉⵅⵚⵚ ⵉⵛ ⴰⴷ ⵜⵅⴰⵕⵕⵚⴷ ⴷⴳ ⵓⴹⵕⵉⵚ ⴰⵎⵣⵡⴰⵔⵓ, ⴰ ⵅⴰⴼⵙ ⵜⵃⴰⵡⵍⴷ, ⴰⵎⵏ ⵛⴽⴽ ⵉⵅⵚⵚ ⴰⴷ ⴷⴳⵙ ⵜⴳⴳⴷ ⴱⵓⵃⴱⵍ ⴷ ⴰⵎⴰⵢⵏⵓ ⴷⴳ ⵓⴹⵕⵉⵚ ⵡⵉⵙ ⵙⵉⵏ. “ⵉⴼⵜⵡⵉⵙⵏ ⵙⵙⴽⵎⴰⴹⵏ” ⴷ ⵉⵊⵊ ⵓⵚⵓⵕⵉⴼ ⵉⵎⵔⵔⵜ ⴰⵢⵉ ⴰⵟⵟⴰⵚ, ⵎⴰⵛⴰ ⵜⵜⵓⵖⴰ ⵜ ⵉⵛⵏⴰ ⵙ ⵡⴰⵟⵟⴰⵚ. ⵎⵉⵏⵣⵉ ⵓⵛⵉⵖ ⴰⵅⵎⵉ ⴳⴳⵉⵖ ⵉⵛⵜ ⵏ ⵍⵇⵏⴹⵕⵜ ⵊⴰⵔ ⵙⵏⴰⵜ ⵏ ⵜⴷⵍⵙⵉⵡⵉⵏ, ⴱⵍⴰ ⵎⴰ ⴰⴷ ⵏⵖⵖ ⴱⵓⵃⴱⵍ ⵏ ⵓⴹⵕⵉⵚ.
ⵎⴰ ⴷⵉⵏ ⵛⴰ ⵏ ⵉⵙⵖⵏⵓⵜⵏ ⴷ ⵉⵙⴽⵍⴰⵏⵏ ⴳⴳⵓⵔⵏ ⴷ ? ⴷ ⵎⵉⵏ ⵣⴰⴳⴽ ⵖⴰ ⵏⵔⴰⵊⴰ ⴷⵉ ⵎⵉⵏ ⴷ ⵉⴳⴳⵓⵔⵏ ⵏ ⵡⵓⵙⵙⴰⵏ ?
ⵡⴰⵀ, ⴷⵉⵏ ⴰⵎⴰⵢⵏⵓ. ⵉⴳⴳⵓⵔ ⴷ ⴰⵙⴳⴳⵯⴰⵙ ⴰ ⵉⵊⵊ ⵏ ⵡⵓⵏⴳⴰⵍ ⴷ ⴰⵎⴰⵢⵏⵓ ⴰⵣⵡⵍ ⵏⵏⵙ «ⵉⵟⴰⵏⵢⴰ», ⵙ ⵢⵉⵛⵜ ⵏ ⵜⵎⴰⵎⴽⵜ ⴷ ⵢⵉⵛⵜ ⵏ ⵜⴼⵍⵙⴰⴼⵜ ⴷ ⵜⴰⵎⴰⵢⵏⵓⵜ ⴷⵉ ⵜⵉⵔⵔⴰ ⴷ ⵡⴰⵍⵍⴰⵙ. ⴰⵎⵏ ⴷⵉⵏ ⵉⵊⵊ ⵏ ⵓⵎⵣⴳⵓⵏ ⵄⴰⵡⴷ ⵓⵔⵉⵖ ⵜ, ⵜⵜⵔⴰⵊⵉⵖ ⵎⵍⵎⵉ ⴷ ⵖⴰ ⵉⴼⴼⵖ.
ⵎⴰ ⵜⵏⴽⴽⵯⵉⴷ ⴰⴷ ⵜⴰⴷⴼⴷ ⴳ ⵛⴰ ⵜⵔⵎⵉⵜⵉⵏ ⵜⵉⵙⴽⵍⴰⵏⵉⵏ ⴷ ⵜⵉⵎⴰⵢⵏⵓⵜⵉⵏ, ⴰⵎ ⵜⵙⴽⵍⴰ ⵏ ⵉⵃⵔⵎⵓⵛⵏ ⵏⵉⵖ ⵜⵉⵔⵔⴰ ⵏ ⵓⵙⵉⵏⴰⵔⵢⵓ ?
ⵡⴰⵀ, ⵄⴰⴷ ⵍⵓⵅ. ⵜⴰⵙⴽⵍⴰ ⵏ ⵉⵎⵥⵥⵢⴰⵏⵏ ⴰⵎ ⵓⴽⵙⵉⵊⵉⵏ, ⵓⵔ ⵏⵣⵎⵎⴰⵔ ⴰⴷ ⵏⵇⵇⵉⵎ ⴱⵍⴰ ⵏⵜⵜⴰⵜ. ⴳⴳⵉⵖ ⵛⴰ ⵏ ⵜⵣⵎⵎⴰⵔ, ⵖⴰⵔⵉ ⵛⴰ ⵏ ⵉⴹⵕⵉⵚⵏ, ⵓⵔ ⵜⵏ ⴷ ⵙⵙⵓⴼⵖⵖ ⵛⴰ. ⴰⵎⵏ ⵙⵙⵓⵖⵍⵖ ⵛⴰ ⵏ ⵉⴹⵕⵉⵚⵏ ⵣⵉ ⵜⵙⴽⵍⴰ ⵜⴰⵎⴰⴹⵍⴰⵏⵜ ⵖⵔ ⵜⵎⴰⵣⵉⵖⵜ. ⵎⴰⵛⴰ ⴰⵎⵅⵓⵎⴱⵍ ⴰⵇⵇⴰ ⵜ ⴷⵉ ⵜⵎⵙⵍⴰⵢⵉⵏ ⵜⵉⵜⵉⵇⵏⵉⵢⵉⵏ, ⴷ ⵓⵙⵓⴼⵖ. ⵡⴰ ⴷ ⴰⵎⵅⵓⵎⴱⵍ ⴰⴷ ⵅⴰⵕⵕⵚⵖ ⵎⴰⵎⵛ ⵖⴰ ⴳⴳⵖ ⴰⴷ ⵜ ⵚⵚⵓⵔⴼⵖ ⵃⵎⴰ ⴰⴷ ⵔⵔⵖ ⵜⴰⵢⵏⵉⵜ ⵉ ⵓⴽⵍⴰⵚⵉ ⴰ ⵏ ⵜⵙⴽⵍⴰ.
ⵎⴰⵛⴰ ⵎⵉⵏ ⵉⵇⵇⵏⵏ ⵖⵔ ⵓⵙⵉⵏⴰⵔⵢⵓ, ⴷ ⵉⵛⵜ ⵏ ⵜⵓⵔⵊⵉⵜ ⴰⵇⵇⴰ ⵜⵜ ⵖⴰⵔⵉ, ⵎⴰⵛⴰ ⵄⴰⴷ ⴰⴷ ⴷ ⵢⴰⵙⵙ ⵡⴰⵙⵙ ⵉ ⴷⵉ ⵖⴰ ⵏⴳⴳ ⵜⵉⵣⵎⵎⴰⵔ ⴷⴳ ⵢⵉⴳⵔ ⴰ.
ⴰⵡⴰⵍ ⴷ ⴰⵎⴳⴳⴰⵔⵓ ?
ⴷⴳ ⵡⴰⵡⴰⵍ ⵉⵏⵓ ⵉⵍⴻⵍⵍⵉ, ⵅⵙⵖ ⴰⴷ ⵉⵏⵉⵖ ⴰⵇⴰ ⵏⵛⵛ ⵜⵜⴰⵔⵉⵖ ⵃⵎⴰ ⴰⴷ ⵟⵟⴼⵖ ⴰⵛⴱⴰⵔ ⴰⵔⵏⴷⴰⴷ ⵉ ⵜⴰⵜⵜⵓⵜ. ⵜⵜⴰⵔⵉⵖ ⵙ ⵜⵎⴰⵣⵉⵖⵜ, ⵎⵉⵏⵣⵉ ⵓⵔⵉⴷ ⴷ ⵉⵛⵜ ⵏ ⵜⵓⵜⵍⴰⵢⵜ ⵏ ⵜⵉⵔⵔⴰ ⵡⴰⵀⴰ, ⴰⵏⵉⵛⵜ ⵏ ⵎⵉⵏ ⵜⵍⵍⴰ ⴷ ⵜⵓⵜⵍⴰⵢⵜ ⵏⵜⵜⴰⵛⴰ ⵜⵜ, ⵏⵜⵜⴷⴷⵔ ⵉⵜⵜ, ⴷ ⵉⵛⵜ ⵏ ⵜⵓⵜⵍⴰⵢⵜ ⵜⵙⵙⵔⵓ ⴰⵏⵖ, ⴷ ⵉⵛⵜ ⵏ ⵜⵓⵜⵍⴰⵢⵜ ⵜⵙⵙⵣⴷⴰⵖ ⴰⵏⵖ ⴷⵉ ⵜⵖⵎⵎⵓⵔⴰ ⵉⵜⵜⵡⴰⵜⵜⵓⵏ, ⵃⵎⴰ ⴰⴷ ⵜⵜ ⴷⴷ ⵏⵙⵙⵓⴼⵖ, ⴰⴷ ⵣⴳⵙ ⵏⴱⴷⴷ ⴷⴳ ⵡⵓⴷⵎ ⵏ ⵜⴰⵜⵜⵓⵜ.
ⵜⴰⴱⵔⴰⵜ ⵉⵏⵓ ⵉ ⵎⴰⵕⵕⴰ ⵡⵉ ⵉⵇⵇⴰⵔⵏ ⵎⵉⵏ ⵓⵔⵉⵖ : ⵓⵔ ⵜⵜⵊⵊⴰ ⵜⵓⵜⵍⴰⵢⵜ ⵏⵏⵛ ⴰⴷ ⵜⵎⵎⵜ ⴷⴳ ⵡⴰⵏⵖ ⵏⵏⵛ. ⵊⵊ ⵉⵜⵜ ⴰⴷ ⵜⵏⵄⵏⵄ ⴷⵉ ⵜⵇⵙⵙⵉⵙⵉⵏ ⵏⵏⵛ, ⴷⵉ ⵜⵡⵔⵉⵇⵉⵏ ⵏ ⵜⴰⵔⵡⴰ ⵏⵏⵛ, ⴷ ⵡⴰⵡⴰⵍ ⵏⵏⵛ ⴰⴽⵓⵢⴰⵙⵙ… ⵅⵎⵉ ⵏⵜⵜⴰⵔⵉ ⵙ ⵜⵓⵜⵍⴰⵢⵜ ⵏⵏⵖ, ⵓⵔⵉⴷ ⵏⵜⵜⴰⵔⵉ ⵡⴰⵀⴰ, ⵎⴰⵛⴰ ⵏⵕⵥⵥⵎ ⵉⵖⴰⵍⵍⵏ ⵏⵏⵖ ⵉ ⵓⵎⵣⵔⵓⵢ ⵃⵓⵎⴰ ⴰⴷ ⵜ ⵏⴱⵏⴰ ⵣⵉ ⵊⵊⴷⵉⴷ.
ⴰⵎⵙⴰⵡⴰⵍ : ⵅⴰⵢⵔⴷⴷⵉⵏ ⵍⵊⴰⵎⵄⵉ
