ⴰⵎⴰⴹⴰⵍ ⴰⵎⴰⵣⵉⵖ ⵉⵍⵙ ⵏ ⵉⵎⴰⵣⵉⵖⵏ
ⴳ ⵓⵙⴰⵜⵉ ⵏ ⵜⵉⵍⴰⵍ ⵏⵏⵙ ⵜⵉⵙⴳⵎⴰⵏⵉⵏ ⵏ ⵓⵙⴷⴷⵉ 2024/2025, ⴷ ⵙ ⵜⴷⵔⴰⵡⵜ ⴰⴽⴷ ⵜⵉⵏⵎⵍ ⵙⵉⴷⵉ ⵡⴰⵙⵙⴰⵢ ⴷ ⵙ ⵓⵣⴷⴷⵓⵢ ⴰⴽⴷ ⵜⵎⵙⵎⵓⵏⵜ ⵏ ⵉⵎⴰⵔⴰⵡⵏ ⵏ ⵉⵏⵍⵎⴰⴷⵏ ⴳ ⵜⵎⵔⵙⵍⵜ, ⵜⵙⵏⵎⴰⵍⴰ ⵜⵔⴰⴱⴱⵓⵜ ⵜⴰⵙⴳⵎⴰⵏⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵀⵍⴰ ⵏ ⵡⴰⵛⵜⵓⴽⵏ ⴰⵢⵜ ⴱⴰⵀⴰ ⵢⴰⵏ ⵡⴰⵙⵙ ⴰⵣⵔⴰⵡⴰⵏ ⴳ ⵜⵉⵏⵎⵍ ⵏ ⵙⵉⴷⵉ ⵡⴰⵙⵙⴰⵢ ⴰⵙⵙ ⵏ ⵓⵙⵉⵎⵡⴰⵙ 05 ⵉⴱⵔⵉⵔ 2025 ⵅⴼ ⵉⵎⵔⵙⵉ » ⴰⵙⵖⵓⴷⵓ ⵏ ⵜⵎⵙⴽⵉⵔⵜ ⵜⴰⵣⵣⵓⵍⴰⵏⵜ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵍⵎⴷ ⴰⵎⵏⵣⵓ » ⵙⴳ ⵡⵓⵜⵓⵢ ⵏ ⵉⵎⴳⴳⵉⵡⵙⵏ ⵉⵙⴳⵎⴰⵏⵏ ⵉⵜⵜⵓⵙⵎⴰⴳⴰⵍⵏ ⵙ ⵡⵓⵜⵓⵢ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵙⴳⴰ ⵎⴰⵙⵙ « ⵃⴰⴼⵉⴷ ⵡⴰⵃⵙⵙⵉ » ⴷ ⵎⴰⵙⵙ ⵄⴱⴷⵍⵀⴰⴷⵉ ⵙⵙⴰⵅⵉ ⴷ ⵉⵎⵣⵔⴰⵡⵏ ⵉⵎⴳⴳⵉⵡⵙⵏ ⵜⴰⵥⵍⴰⵢⵜ ⵏ ⵜⵎⴰⵣⵉⵖⵜ ⵎⴰⵙⵙ ⵕⴰⵛⵉⴷ ⴰⵏⴼⵍⵓⵙ ⴷ ⵎⴰⵙⵙ ⵕⴰⵛⵉⴷ ⵓⴱⴰⵖⴰⵊ ⵙ ⵜⴷⵔⴰⵡⵜ ⵏ ⵜⵙⵍⵎⴰⴷⵉⵏ ⴷ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵎⵀⵍⴰ. ⵉⵡⴰⵜⵜⵙ ⵡⴰⵙⵙ ⴰⴷ ⴰⵙⴳⵎⴰⵏ ⴰⴷ ⵉⵙⵖⵓⴷⵓ ⵉⴳⵉ ⴰⵙⴳⵎⴰⵏ ⵙⴳ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵓⵎⴹⴰⴽⴰⵕ ⵏ ⵜⵎⵙⴽⵉⵔⵉⵏ ⵏ ⵜⴷⴰⵍⴰ ⵎⵓⵔⵙⵏⵉⵏ ⴷ ⵓⵙⴷⵓⵙ ⵏ ⵓⵙⵎⵓⵜⵜⴳ ⴰⵙⵓⵍⴰⵏ ⴰⵎ ⵜⵔⵙⵍⵜ ⵏ ⵓⵙⴱⵓⵖⵍⵓ ⵏ ⵜⴰⵣⵣⵓⵍⵜ ⵜⴰⵙⴳⵎⴰⵏⵜ ⴷ ⵓⵙⵙⵕⵚⵓ ⵏ ⵓⵎⴷⵢⴰ ⴰⴱⵉⴷⴰⴳⵓⵊⵉ ⴰⵜⵔⴰⵔ ⵉⴱⴷⴷⵏ ⵅⴼ ⵉⵙⵍⵍⵡⵉ ⴷ ⵓⵙⴱⵓⵖⵍⵓ ⵏ ⵜⵙⵏⵉⴳⵉⵜⵉⵏ ⵏ ⵜⴷⴰⵍⴰ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵜⵥⵕⴰ ⵜⵉⵍⴰⵍⵜ ⴰⴷ ⴰⵙⵏⵎⴰⵍⴰ ⵏ ⵢⴰⵜ » ⵜⵉⵏⴰⵡⵜ ⵅⴼ » ⵜⵉⵍⴰⵍ ⵏ ⵜⵓⴷⵔⵜ ⵜⴰⵏⵎⵍⴰⵏⵜ ⴷ ⵜⴰⵎⵙⵙⵉⵍⵉⵜ ⵜⴰⴷⵙⵍⴰⵏⵜ ⵏ ⵜⵓⵚⴽⴰ ⵏ ⵜⵓⴳⵏⵏⴰ ⵏ ⵓⵏⵍⵎⴰⴷ ⴷ ⵜⵔⵙⵍⵜ ⵏ ⵓⵍⵎⵎⵓⴷ ⵉⵕⵡⴰⵏ » ⵙⵙⵓⵜⵉⵏ ⵜⵜ ⵉⵎⵣⵔⴰⵡⵏ ⵉⵎⴳⴳⵉⵡⵙⵏ ⵎⴰⵙⵙ ⵕⴰⵛⵉⴷ ⴰⵏⴼⵍⵓⵙ ⴷ ⵎⴰⵙⵙ ⵕⴰⵛⵉⴷ ⵓⴱⴰⵖⴰⵊ, ⵎⴽⵍⵍⵉ ⵉⵙⵙⵎⵏⵉⴷ ⵎⴰⵙⵙ ⵕⴰⵛⵉⴷ ⴰⴽⵕⴽⴰⴹ ⴷ ⵓⵙⵍⵎⴰⴷ ⵍⵃⴰⵙⴰⵏ ⵕⵕⴰⵊⵉ ⵙⵏⴰⵜ ⵜⵎⵙⵉⵔⵉⵏ ⵜⵉⵎⴷⵢⴰⵜⵉⵏ ⴳ ⵜⵉⵍⴰⵍⵜ ⵏ ⵜⵖⵔⵉ ⴷ ⵓⵙⴼⵜⵉ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⵉⵎⴷⴰ ⵓⵏⵎⵓⵇⵇⴰⵔ ⵙ ⵓⴱⵟⵟⵓ ⵏ ⵉⵙⵍⴽⵉⵏⵏ ⵏ ⵓⵙⵉⵜⴳ ⵅⴼ ⵜⵎⴷⵔⴰⵡⵉⵏ ⴷ ⵉⵎⴷⵔⴰⵡⵏ ⴷ ⵓⵙⵙⵎⵖⵔ ⵏ ⵉⴷ ⵎⴰⵙⵙ ⵉⵙⵓⵜⴰⵢ ⵙ ⵜⵎⵓⵙⵏⵉ ⴷ ⵓⵙⵉⵜⴳ ⵏ ⵜⴷⵔⴰⵡⵉⵏ ⵏⵏⵙⵏ ⴷ ⵜⵓⴳⴳⴰⵙ ⵏⵏⵙⵏ ⵃⵎⴰ ⴰⴷ ⵉⴱⵓⵖⵍⵓ ⵓⵙⴷⴰⵡ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
ⴰⵙⵓⵖⵍ ⵄⴱⴷⵍⵡⴰⵃⴷ ⴱⵓⵜⴱⴰⵖⴰ
