جريدة العالم الأمازيغي صوت الإنسان الحر
ⵎⵓⵃⵎⵎⴷ ⴼⴰⵔⵉⵙⵉ*
ⴰⵎⵏ ⵏⵙⵙⵏ ⴱⵍⵍⵉ ⵜⴰⵏⴱⴰⴹⵜ ⵜⴰⵎⴰⵖⵔⴰⴱⵉⵜ ⵜⵓⵖⴰ ⵜⵔⵣⵣⵓ ⴰⴷ ⵜⴳⴳ ⵜⵉⴼⵉⵏⴰⵖ ⴷⵉ ⵜⵜⵎⵏⵢⴰⵜ ⵖⴰⵔ ⵓⵎⴳⴳⴰⵔ ⵡⴰⵔ ⵜⴳⴳⵉ ⵛⴰ. ⴰⴽⴷ ⵓⵖⵣⴷⵉⵙ ⵏ ⵎⴰⵏⴰⵢⴰ ⵉⴽⴽⵔ ⴷ ⵉⵊⵊ ⵣⴳ ⴰⵢⵜ ⵉⵄⵛⵎⵉⵔⵏ ⵉ ⵡⴰⵔ ⵉⵃⵎⵎⵍⵏ ⵜⴰⵎⴰⵣⵉⵖⵜ ⴷ ⵎⵉⵏ ⵣⴰⵢⵙ ⴷ ⵉⴽⴽⵉⵏ, ⵉⵏⵏⴰ, ⴱⵍⵍⵉ ⵜⵉⴼⵉⵏⴰⵖ ⵎⴰⵍⵍⴰ ⵜⵡⴰⴳⴳⵏⵜ ⴰⴷ ⵜⴰⴼ ⵜⵓⵜⵍⴰⵢⵜ ⵜⴰⵄⵔⴰⴱⵜ ⴰⴷ ⵜⵎⵎⴽⴽⵙ ⵡⴰⵔ ⴷ ⴰⵙ ⵜⵖⵉⵎⵉ ⵔⵉⵎⴰⵔⵜ. ⴰⵎⵏ ⵍⴱⴷⴰ ⴽⴽⵔⵏ ⵉⵎⴰⵣⵉⵖⵏ ⵎⴰⵔⵔⴰ ⴰⴷ ⴰⵔⵔⵏ ⵅⴼ ⵓⵜⵔⵔⴰⵙ ⴰ.
ⵜⴰⵎⵣⵡⴰⵔⵓⵜ ⴷⵉ ⵎⴰⵏⴰⵢⴰ ⵉⵎⵙⴰⵔⵏ, ⵏⵜⵡⴰⵍⴰ ⴱⵍⵍⵉ ⵉⵊⵊ ⵏ ⵓⵜⵔⵔⴰⵙ ⵉⴳⴳⴰ ⵜⴰⵃⵕⵢⴰⴹⵜ ⴷⴳ ⵡⴰⵢⴷⵓⴷ ⴰⵎⵏ ⵉⴽⵎⵍ, ⴷⴰⵏⵉⵜⴰ ⵏⵜⵙⵇⵙⴰ, ⵎⴰ ⴷ ⵜⵉⴷⵜ ⵡⵏⵏⵉ ⵖⴰⵔ ⵉⵙⵙⵉⵡⵍⵏ ⵅⴼ ⵜⴰⵎⴰⵣⵉⵖⵜ ⵙ ⵏ ⵍⵃⴰⵊⵜ ⴷ ⵜⴰⵄⴼⴼⴰⵏⵜ ⴰⴷ ⵖⴰⵔⵙ ⵏⴽⴽⵔ ⴰⴷ ⴽⵉⴷⵙ ⵏⵎⵙⴰⵙⵔ? ⴷ ⵜⴰⵎⵔⴰⵔⵓⵜ ⵅⴼ ⵓⵙⵇⵙⵉ ⴰ, ⵏⵜⴰⴼ ⴱⵍⵍⵉ ⴷⵉⵏⵉ ⴰⵟⵟⴰⵚ ⵏ ⵜⵎⵙⵍⴰⵢⵉⵏ ⵉⵣⵣⴰⵔⵏⵜ ⵉⴷ ⵡⴰⵔ ⵖ ⴰⵔⵏⵖ ⴱⵓ ⴰⴽⵓⴷ ⵅⵎⴰ ⴰⴷ ⵏⴰⵔⵔ ⵅⴼ ⵉⵡⴷⴰⵏ, ⴰⵎ ⵓⵖⵏⴰⵙ ⵅⴼ ⵡⴰⴳⵍⴰ ⴰⵎⵓⵔⴰⵏ, ⴰⵣⵔⴼ ⵏ ⵓⵎⴰⵣⵉⵖ ⴷⴳ ⵉⴳⵔ ⵏ ⵜⵙⵔⵜⵉⵜ ⵅⵎⴰ ⴰⴷ ⵜⵜ ⵉⴳⴳ ⵓⵍⴰ ⴷ ⵏⵜⵜⴰ, ⴰⴷ ⵉⵃⴹⴰ ⵅⴼ ⵎⵉⵏ ⴷ ⵉⵡⵡⵉ ⵏ ⵓⵖⵏⴰⵙ ⵏ 20 ⵉⵙⴳⴳⵯⵓⵙⴰ ⴳ ⵉⵄⴷⴰⵏ, ⴰⴷ ⵉⵙⵙⵉⵔⵉⵡ ⴰⵡⵏⴳⵎ ⵏⵏⵙ ⴰⴷ ⵉⵖⵣⵔ ⵎⵉⵏ ⵉⵅⵙⵙⵏ ⵉ ⵡⴰⴽⵓⴷ ⴰ.
ⵜⵉⵙⵙ ⵙⵏⴰⵜ, ⴷ ⵏⵜⵜⴰⵜ ⴳ ⵉⵍⵍⴰⵏ ⴷ ⴰⵙⵓⵖⵏ ⴷⵉ ⵎⴰⵏⴰⵢⴰ ⵜⵇⵇⴰⵔ, ⵎⴰⵎⵎⴽ ⵖⴰⵔ ⵏⴰⴼ ⵜⴰⵎⴰⵣⵉⵖⵜ ⴷⵉ ⵎⴰⵔⵔⴰ ⵎⵉⵏ ⵉⵇⵇⵏⴻⵏ ⵖⴰⵔ ⵓⵡⴰⵏⴽ ⵏⵛⵛⵉⵏ ⵡⴰⵔ ⵡⴰⵔ ⵣⴰⵢⵙ ⵏⵜⴰⵔⵔⵉ, ⵜⵎⵙⴰⵔ ⴰⵏⵖ ⴰⵎ ⵡⵏⵏⵉ ⴳ ⵉⵙⵙⵎⵎⴰⵔⵏ ⴰⴱⵔⵉⴷ ⵏ ⴰⵔⴱⴱⵉ ⵉ ⵉⵡⴷⴰⵏ ⵏⵜⵜⴰ ⵡⴰⵔ ⵅⴰⴼⵙ ⵉⴳⴳⵓⵔ ⵛⴰ. ⴰⵙⴼⵙⵉ ⴰⵎⵣⵡⴰⵔⵓ ⴰⴷ ⵏⴳⴳ ⵉⵊⵊ ⵏ ⴷⴷⵔⵉⵣ ⵙ ⵜⵓⵜⵍⴰⵢⵜ ⵏⵏⵖ, ⵎⴰⵍⵍⴰ ⵡⴰⵔ ⵏⵡⵡⵉⴹ ⴰⴷ ⵜⵜ ⵏⵙⴱⵣⵣⴻⵣ ⵅⴼ ⴰⵡⴰⵏⴽ, ⴰⴷ ⵜⴰⴼ ⵏⵛⵛⵉⵏ ⵖⴰⵔⵏⵖ ⵉⵛⵜ ⵏ ⵍⵃⴰⵊⵜ ⴷⴳ ⵓⴼⵓⵙ ⵏⵏⵖ ⵏⴼⴼⵖ ⵣⴰⵢⴷ ⴷ ⵍⴼⴷⵍ.
ⵙ ⵓⵢⴰ ⵡⴰⵔ ⵉⵍⵍⵉ ⴷ ⴰⵎⵏⵓⵙ ⵎⴰⵍⵍⴰ ⵡⴰⵔ ⵜⴳⴳⵉⵏ ⴷⵉ ⵜⵏⵄⴰⵛⵉⵏ ⵏⵉⵖ ⴷⵉ ⵛⴰ ⵏⵏⵖⵏⵉ, ⴰⵎⵏⵓⵙ ⴰⵎⵇⵇⵔⴰⵏ ⵎⴰⵍⵍⴰ ⵏⵛⵛⵉⵏ ⵉⵎⴰⵣⵉⵖⵏ ⵡⴰⵔ ⵣⴰⵢⵙ ⵏⵜⴰⵔⵔⵉ, ⴰⵎⵏⵓⵙ ⴰⵎⵇⵇⵔⴰⵏ ⵎⴰⵍⵍⴰ ⵡⴰⵔ ⴷ ⴰⵙ ⵏⵔⵔⵉ ⵜⴰⵢⵢⵏⵉⵜ, ⴰⴷ ⴷⴰⵢⵙ ⵏⵔⵣⵓ, ⴰⴷ ⴷⴰⵢⵙ ⵏⴼⴰⵔⵙ, ⵎⴰⵎⵎⴽ ⵎⵎⴰ ⵜⴳⴳⴰ ⵜⵓⵙⵙⵏⴰ ⴰⴷ ⴷⵉⵏⵉ ⵏⴰⴼ ⵜⴰⵎⴰⵣⵉⵖⵜ.
ⵎⴰⵍⵍⴰ ⴰⵎⴰⵣⵉⵖ ⵉⵇⵇⵉⵎ ⴰⵎⵢⴰ ⴰⴹⵓ ⵉⴷ ⵖⴰⵔ ⵉⵚⵚⵓⴹⵏ ⴰⴷ ⵜ ⵢⴰⵡⵉ, ⴰⴷ ⵏⵉⵍⵉ ⴷⴳ ⵉⵊⵊ ⵏ ⵡⴰⴷⴷⴰⴷ ⵉⵇⵙⵃ ⴰⴷ ⵅⴰⴼⵙ ⵏⵎⵚⴱⴹⴰ, ⵏⵉⵖ ⵉⵏⵉ, ⴰⴷ ⴰⵏⵖ ⵢⴰⵔⵔ ⵉⵙⴳⴳⵯⵓⵙⴰ ⴷ ⵉⵎⵇⵇⵔⴰⵏⴻⵏ ⵖⴰⵔ ⴷⴼⴼⴰⵔ, ⵉⵅⵙⵙ ⴰⴷ ⵏⵍⵀⴰ ⴰⴽⴷ ⵜⴰⵡⵓⵔⵉ ⵉ ⵅⴰⴼⵏⵖ ⵢⵓⵔⴰ ⵓⵎⵣⵔⵓⵢ ⴰⴷ ⵜⵜ ⵏⴳⴳ, ⵎⴰⵍⵍⴰ ⵏⵇⵇⵉⵎ ⴰⵎⵢⴰ ⴰⵢⵢⴷⵉ ⵉⴷ ⵖⴰⵔⵏⵖ ⴷ ⵖⴰⵔ ⵉⵣⵓⵏ, ⵙⵙⵏⵎ ⵍⵅⴷⵏⵏⵉ ⴱⵍⵍⵉ ⵡⴰⵔ ⵏⵜⴳⴳ ⵚⵓⵕⵉⴼ ⵖⴰⵔ ⵣⵣⴰⵜ.
ⵖⴰⵔ ⵓⵎⴳⴳⴰⵔ ⵏⵇⵇⴰⵔ, ⵉⵄⴷⵓ ⴰⵏⵖ ⵡⴰⴽⵓⴷ ⴰⵟⵟⴰⵚ ⵉⵅⵙⵙ ⵡⴰⵔ ⴷⴰⵢⵙ ⵏⵔⵏⵏⵉ.
* ⴰⵙⵍⵎⴰⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ
