ⵄⴱⵍⴽⴰⵔⵉⵎ ⴰⵇⵛⵛⴰⵔ.. ⵏⵉⵖ ⴰⵖⵏⵏⵉⵊ ⴰⵜⵓⵣⵉⵏ

ԑeblkarim AKECCAR niɣ aɣennij atuzin

muḥemmed farisi*

aɣennij d ijj uɣezdis d ameqqṛan zi tdelsa n waydud amaziɣ, irsa xef izlan g illan d ttisi i xef tersa tsekla tamaziɣt. s uya ntaf amussu n tẓuṛi a imɣar ɣar ayt umaziɣ zayes twennan xef imxumbal d timukrisin iddaren di tudert nnes g imṣebḍan. amaziɣ isneflel deg waṭṭaṣ n igaren n tsekla, maca s tɣuni nnes aked izlan g iwtin deg iẓuṛan n tdelsa nnes, jjint ad issemɣar lɣezrat nnes xma ad kides irni anya s immasen nnes imṣebḍan.

deg uɣezdis a ntaf allun d ijj n imis iddukkel izlan zeg waṭṭas zeggʷami, asafu nnes teks itt tameṭṭuḍt tamaziɣt, ɣar awarn as iffeɣ d ɣar irgazen.

aɣennij amaziɣ war iqqim deg uqwiṛ n tmeṭṭuḍt zegga d iffeɣ ɣar beṛṛa n uqwiṛ nnes, s uya ntaf argaz ula d netta ireni as aṭṭaṣ n tmeslayin id t ijjin ad t netwala ass a xef talɣa a. amen nessen belli amussu n uɣennij amaziɣ niɣ arifi yugur aked umussu n ufgan amaziɣ, aswir i ɣar ɣa yaweḍ ad kides tewweḍ tẓuṛi, s uya umi d ilul umussu adelsan amaziɣ ilul d akides ijj uɣennij d amaynu war iqqim s talɣa nnes tamaysut, zegga aydud a ikker ad issers aseqsi xef min iԑna, zayes yudef deg imenɣiten aked yenni isseḥqaran marra min d ikkin zi jjuṛṛet n tamaziɣt.

umussu adelsan amaziɣ ijj aneɣ d aṭṭaṣ inaẓuṛen ssiriwen aɣennij s usidef n imassen nneɣni am lgembri d immeksin zi tmurt n sbbanya g yudsen arrif, wwin d inuya d imaynuten ssidfen xafsen izlan, ar mani lexxu nufa ɣarneɣ inaẓuren am lwalid mimun, ḥasan tibarnit, cukri, agraf d waṭṭas n trabuttin sseswent iger n uɣennij arifi.

Aɣennij arifi swizan dayes marra tiqebbal n arrif, s uya ntaf la d teqbilt n ayt ttuzin tejj d ula d nettat inaẓuṛen am ԑebdlkarim akeccar g issentan deg ubrid a zik, ijja zeg izlan n jeddes ameqqran iɣennijen war zaysen ityiwin uterras. Akeccar g illan zeg imezwura di teqbilt n ayt ttuzin ad irbu lgembri xef uԑrur nnes aked imeddukal nnes ad imneɣ aked twengimt i tuɣa d inedren xef urifi di teqbilt n ayt ttuzin niɣ tawengimt yullsen xef arrif amen ikmel.

igga tizemmar nnes xma ad icuqq abrid a ad igg aɣennij atuzin jar iɣennijen n tqebbal n arrif, waxxa amen nessen belli arrif deg wakud n usenti nnes deg iger a tuɣa iqseḥ s waṭṭaṣ, niɣ ad nini tanfust nnes am tenfas n marra inaẓuṛen n arrif.

karim iɣennej xef tayri d tmurt d uԑraq, iɣennijen nnes war daysen bu turja aṭṭaṣ anict i daysen n tidet n tudert n urifi, iɣennijen nnes tafed daysen rimart n iḍennaṭ. zeg iɣennijen nnes i nufa umi d neṛẓem tiṭṭawin nneɣ di teqbilt a (ggiɣ akides amelqi, nḥar a memmis aked babas, ad nraḥ ɣar irumiyen…) karim war izemmem bu iɣennijen nnes d manaya id aneɣ ɣar ijjen ad nqada smaԑil suṭṭu g illan d ijj zeg inaẓuṛen niɣ ijj zeg yenni itqasan aẓawan d mammek ixess ad yili.

karim tuɣa war imin uneɣmis nnes, ar mani g issenta unhezzi n arrif iffeɣ d xma ad yini awal nnes, iɣennej xef inekraf isertanen iɣennej xef waddad di idder arrif, war itiḥel s uswizi, mermi mma imsar ca ad tafed d amezwaru iɣennej xafes, igga tizemmar nnes di tmurt n irumiyen xma ad issiweḍ aɣennij arifi g iksin tabrat n arrif d min irezzu s tutmayt tamaziɣt d tafransist.

ɣar umeggar, neqqar tanemmirt i netta d marra inaẓuṛen g iteggen tizemmar nnsen xma ad yaweḍ uɣennij arifi waxxa ԑad aqa t deg ubrid n uzday u nessitim ad ffɣen iɣennijen n karim ɣar marra waydud xma ad arren mezri i ict n tẓuṛi g illan d afares n teqbilt n ayt ttuzin.

* Aslmad n tutlayt tamaziɣt

ⵄⴱⵍⴽⴰⵔⵉⵎ ⴰⵇⵛⵛⴰⵔ ⵏⵉⵖ ⴰⵖⵏⵏⵉⵊ ⴰⵜⵓⵣⵉⵏ

ⵎⵓⵃⵎⵎⴷ ⴼⴰⵔⵉⵙⵉ*

ⴰⵖⵏⵏⵉⵊ ⴷ ⵉⵊⵊ ⵓⵖⵣⴷⵉⵙ ⴷ ⴰⵎⵇⵇⵕⴰⵏ ⵣⵉ ⵜⴷⵍⵙⴰ ⵏ ⵡⴰⵢⴷⵓⴷ ⴰⵎⴰⵣⵉⵖ, ⵉⵔⵙⴰ ⵅⴼ ⵉⵣⵍⴰⵏ ⴳ ⵉⵍⵍⴰⵏ ⴷ ⵜⵜⵉⵙⵉ ⵉ ⵅⴼ ⵜⵔⵙⴰ ⵜⵙⴽⵍⴰ ⵜⴰⵎⴰⵣⵉⵖⵜ. ⵙ ⵓⵢⴰ ⵏⵜⴰⴼ ⴰⵎⵓⵙⵙⵓ ⵏ ⵜⵥⵓⵕⵉ ⴰ ⵉⵎⵖⴰⵔ ⵖⴰⵔ ⴰⵢⵜ ⵓⵎⴰⵣⵉⵖ ⵣⴰⵢⵙ ⵜⵡⵏⵏⴰⵏ ⵅⴼ ⵉⵎⵅⵓⵎⴱⴰⵍ ⴷ ⵜⵉⵎⵓⴽⵔⵉⵙⵉⵏ ⵉⴷⴷⴰⵔⵏ ⴷⵉ ⵜⵓⴷⵔⵜ ⵏⵏⵙ ⴳ ⵉⵎⵚⴱⴹⴰⵏ. ⴰⵎⴰⵣⵉⵖ ⵉⵙⵏⴼⵍⴻⵍ ⴷⴳ ⵡⴰⵟⵟⴰⵚ ⵏ ⵉⴳⴰⵔⵏ ⵏ ⵜⵙⴽⵍⴰ, ⵎⴰⵛⴰ ⵙ ⵜⵖⵓⵏⵉ ⵏⵏⵙ ⴰⴽⴷ ⵉⵣⵍⴰⵏ ⴳ ⵉⵡⵜⵉⵏ ⴷⴳ ⵉⵥⵓⵕⴰⵏ ⵏ ⵜⴷⵍⵙⴰ ⵏⵏⵙ, ⵊⵊⵉⵏⵜ ⴰⴷ ⵉⵙⵙⵎⵖⴰⵔ ⵍⵖⵣⵔⴰⵜ ⵏⵏⵙ ⵅⵎⴰ ⴰⴷ ⴽⵉⴷⵙ ⵉⵔⵏⵉ ⴰⵏⵢⴰ ⵙ ⵉⵎⵎⴰⵙⵏ ⵏⵏⵙ ⵉⵎⵚⴱⴹⴰⵏ. ⴷⴳ ⵓⵖⵣⴷⵉⵙ ⴰ ⵏⵜⴰⴼ ⴰⵍⵍⵓⵏ ⴷ ⵉⵊⵊ ⵏ ⵉⵎⵉⵙ ⵉⴷⴷⵓⴽⴽⵍ ⵉⵣⵍⴰⵏ ⵣⴳ ⵡⴰⵟⵟⴰⵚ ⵣⴳⴳⵯⴰⵎⵉ, ⴰⵙⴰⴼⵓ ⵏⵏⵙ ⵜⴽⵙ ⵉⵜⵜ ⵜⴰⵎⵟⵟⵓⴹⵜ ⵜⴰⵎⴰⵣⵉⵖⵜ, ⵖⴰⵔ ⴰⵡⴰⵔⵏ ⴰⵙ ⵉⴼⴼⵖ ⴷ ⵖⴰⵔ ⵉⵔⴳⴰⵣⵏ.

ⴰⵖⵏⵏⵉⵊ ⴰⵎⴰⵣⵉⵖ ⵡⴰⵔ ⵉⵇⵇⵉⵎ ⴷⴳ ⵓⵇⵡⵉⵕ ⵏ ⵜⵎⵟⵟⵓⴹⵜ ⵣⴳⴳⴰ ⴷ ⵉⴼⴼⵖ ⵖⴰⵔ ⴱⵕⵕⴰ ⵏ ⵓⵇⵡⵉⵕ ⵏⵏⵙ, ⵙ ⵓⵢⴰ ⵏⵜⴰⴼ ⴰⵔⴳⴰⵣ ⵓⵍⴰ ⴷ ⵏⵜⵜⴰ ⵉⵔⵏⵉ ⴰⵙ ⴰⵟⵟⴰⵚ ⵏ ⵜⵎⵙⵍⴰⵢⵉⵏ ⵉⴷ ⵜ ⵉⵊⵊⵉⵏ ⴰⴷ ⵜ ⵏⵜⵡⴰⵍⴰ ⴰⵙⵙ ⴰ ⵅⴼ ⵜⴰⵍⵖⴰ ⴰ. ⴰⵎⵏ ⵏⵙⵙⵏ ⴱⵍⵍⵉ ⴰⵎⵓⵙⵙⵓ ⵏ ⵓⵖⵏⵏⵉⵊ ⴰⵎⴰⵣⵉⵖ ⵏⵉⵖ ⴰⵔⵉⴼⵉ ⵢⵓⴳⵓⵔ ⴰⴽⴷ ⵓⵎⵓⵙⵙⵓ ⵏ ⵓⴼⴳⴰⵏ ⴰⵎⴰⵣⵉⵖ, ⴰⵙⵡⵉⵔ ⵉ ⵖⴰⵔ ⵖⴰ ⵢⴰⵡⴹ ⴰⴷ ⴽⵉⴷⵙ ⵜⵡⵡⴹ ⵜⵥⵓⵕⵉ, ⵙ ⵓⵢⴰ ⵓⵎⵉ ⴷ ⵉⵍⵓⵍ ⵓⵎⵓⵙⵙⵓ ⴰⴷⵍⵙⴰⵏ ⴰⵎⴰⵣⵉⵖ ⵉⵍⵓⵍ ⴷ ⴰⴽⵉⴷⵙ ⵉⵊⵊ ⵓⵖⵏⵏⵉⵊ ⴷ ⴰⵎⴰⵢⵏⵓ ⵡⴰⵔ ⵉⵇⵇⵉⵎ ⵙ ⵜⴰⵍⵖⴰ ⵏⵏⵙ ⵜⴰⵎⴰⵢⵙⵓⵜ, ⵣⴳⴳⴰ ⴰⵢⴷⵓⴷ ⴰ ⵉⴽⴽⵔ ⴰⴷ ⵉⵙⵙⵔⵙ ⴰⵙⵇⵙⵉ ⵅⴼ ⵎⵉⵏ ⵉⵄⵏⴰ, ⵣⴰⵢⵙ ⵢⵓⴷⴼ ⴷⴳ ⵉⵎⵏⵖⵉⵜⵏ ⴰⴽⴷ ⵢⵏⵏⵉ ⵉⵙⵙⵃⵇⴰⵔⴰⵏ ⵎⴰⵔⵔⴰ ⵎⵉⵏ ⴷ ⵉⴽⴽⵉⵏ ⵣⵉ ⵊⵊⵓⵕⵕⵜ ⵏ ⵜⴰⵎⴰⵣⵉⵖⵜ.

ⵓⵎⵓⵙⵙⵓ ⴰⴷⵍⵙⴰⵏ ⴰⵎⴰⵣⵉⵖ ⵉⵊⵊ ⴰⵏⵖ ⴷ ⴰⵟⵟⴰⵚ ⵉⵏⴰⵥⵓⵕⵏ ⵙⵙⵉⵔⵉⵡⵏ ⴰⵖⵏⵏⵉⵊ ⵙ ⵓⵙⵉⴷⴼ ⵏ ⵉⵎⴰⵙⵙⵏ ⵏⵏⵖⵏⵉ ⴰⵎ ⵍⴳⵎⴱⵔⵉ ⴷ ⵉⵎⵎⴽⵙⵉⵏ ⵣⵉ ⵜⵎⵓⵔⵜ ⵏ ⵙⴱⴱⴰⵏⵢⴰ ⴳ ⵢⵓⴷⵙⵏ ⴰⵔⵔⵉⴼ, ⵡⵡⵉⵏ ⴷ ⵉⵏⵓⵢⴰ ⴷ ⵉⵎⴰⵢⵏⵓⵜⵏ ⵙⵙⵉⴷⴼⵏ ⵅⴰⴼⵙⵏ ⵉⵣⵍⴰⵏ, ⴰⵔ ⵎⴰⵏⵉ ⵍⵅⵅⵓ ⵏⵓⴼⴰ ⵖⴰⵔⵏⵖ ⵉⵏⴰⵥⵓⵔⵏ ⴰⵎ ⵍⵡⴰⵍⵉⴷ ⵎⵉⵎⵓⵏ, ⵃⴰⵙⴰⵏ ⵜⵉⴱⴰⵔⵏⵉⵜ, ⵛⵓⴽⵔⵉ, ⴰⴳⵔⴰⴼ ⴷ ⵡⴰⵟⵟⴰⵙ ⵏ ⵜⵔⴰⴱⵓⵜⵜⵉⵏ ⵙⵙⴻⵙⵡⵏⵜ ⵉⴳⵔ ⵏ ⵓⵖⵏⵏⵉⵊ ⴰⵔⵉⴼⵉ.

ⴰⵖⵏⵏⵉⵊ ⴰⵔⵉⴼⵉ ⵙⵡⵉⵣⴰⵏ ⴷⴰⵢⵙ ⵎⴰⵔⵔⴰ ⵜⵉⵇⴱⴱⴰⵍ ⵏ ⴰⵔⵔⵉⴼ, ⵙ ⵓⵢⴰ ⵏⵜⴰⴼ ⵍⴰ ⴷ ⵜⵇⴱⵉⵍⵜ ⵏ ⴰⵢⵜ ⵜⵜⵓⵣⵉⵏ ⵜⵊⵊ ⴷ ⵓⵍⴰ ⴷ ⵏⵜⵜⴰⵜ ⵉⵏⴰⵥⵓⵕⵏ ⴰⵎ ⵄⴱⴷⵍⴽⴰⵔⵉⵎ ⴰⴽⵛⵛⴰⵔ ⴳ ⵉⵙⵙⵏⵜⴰⵏ ⴷⴳ ⵓⴱⵔⵉⴷ ⴰ ⵣⵉⴽ, ⵉⵊⵊⴰ ⵣⴳ ⵉⵣⵍⴰⵏ ⵏ ⵊⴷⴷⵙ ⴰⵎⵇⵇⵔⴰⵏ ⵉⵖⵏⵏⵉⵊⵏ ⵡⴰⵔ ⵣⴰⵢⵙⵏ ⵉⵜⵢⵉⵡⵉⵏ ⵓⵜⵔⵔⴰⵙ. ⴰⴽⵛⵛⴰⵔ ⴳ ⵉⵍⵍⴰⵏ ⵣⴳ ⵉⵎⵣⵡⵓⵔⴰ ⴷⵉ ⵜⵇⴱⵉⵍⵜ ⵏ ⴰⵢⵜ ⵜⵜⵓⵣⵉⵏ ⴰⴷ ⵉⵔⴱⵓ ⵍⴳⵎⴱⵔⵉ ⵅⴼ ⵓⵄⵔⵓⵔ ⵏⵏⵙ ⴰⴽⴷ ⵉⵎⴷⴷⵓⴽⴰⵍ ⵏⵏⵙ ⴰⴷ ⵉⵎⵏⵖ ⴰⴽⴷ ⵜⵡⵏⴳⵉⵎⵜ ⵉ ⵜⵓⵖⴰ ⴷ ⵉⵏⴷⵔⵏ ⵅⴼ ⵓⵔⵉⴼⵉ ⴷⵉ ⵜⵇⴱⵉⵍⵜ ⵏ ⴰⵢⵜ ⵜⵜⵓⵣⵉⵏ ⵏⵉⵖ ⵜⴰⵡⵏⴳⵉⵎⵜ ⵢⵓⵍⵍⵙⵏ ⵅⴼ ⴰⵔⵔⵉⴼ ⴰⵎⵏ ⵉⴽⵎⵍ.

ⵉⴳⴳⴰ ⵜⵉⵣⵎⵎⴰⵔ ⵏⵏⵙ ⵅⵎⴰ ⴰⴷ ⵉⵛⵓⵇⵇ ⴰⴱⵔⵉⴷ ⴰ ⴰⴷ ⵉⴳⴳ ⴰⵖⵏⵏⵉⵊ ⴰⵜⵓⵣⵉⵏ ⵊⴰⵔ ⵉⵖⵏⵏⵉⵊⵏ ⵏ ⵜⵇⴱⴱⴰⵍ ⵏ ⴰⵔⵔⵉⴼ, ⵡⴰⵅⵅⴰ ⴰⵎⵏ ⵏⵙⵙⵏ ⴱⵍⵍⵉ ⴰⵔⵔⵉⴼ ⴷⴳ ⵡⴰⴽⵓⴷ ⵏ ⵓⵙⵏⵜⵉ ⵏⵏⵙ ⴷⴳ ⵉⴳⵔ ⴰ ⵜⵓⵖⴰ ⵉⵇⵙⵃ ⵙ ⵡⴰⵟⵟⴰⵚ, ⵏⵉⵖ ⴰⴷ ⵏⵉⵏⵉ ⵜⴰⵏⴼⵓⵙⵜ ⵏⵏⵙ ⴰⵎ ⵜⵏⴼⴰⵙ ⵏ ⵎⴰⵔⵔⴰ ⵉⵏⴰⵥⵓⵕⵏ ⵏ ⴰⵔⵔⵉⴼ.
ⴽⴰⵔⵉⵎ ⵉⵖⵏⵏⵊ ⵅⴼ ⵜⴰⵢⵔⵉ ⴷ ⵜⵎⵓⵔⵜ ⴷ ⵓⵄⵔⴰⵇ, ⵉⵖⵏⵏⵉⵊⵏ ⵏⵏⵙ ⵡⴰⵔ ⴷⴰⵢⵙⵏ ⴱⵓ ⵜⵓⵔⵊⴰ ⴰⵟⵟⴰⵚ ⴰⵏⵉⵛⵜ ⵉ ⴷⴰⵢⵙⵏ ⵏ ⵜⵉⴷⵜ ⵏ ⵜⵓⴷⵔⵜ ⵏ ⵓⵔⵉⴼⵉ, ⵉⵖⵏⵏⵉⵊⵏ ⵏⵏⵙ ⵜⴰⴼⴷ ⴷⴰⵢⵙⵏ ⵔⵉⵎⴰⵔⵜ ⵏ ⵉⴹⵏⵏⴰⵟ. ⵣⴳ ⵉⵖⵏⵏⵉⵊⵏ ⵏⵏⵙ ⵉ ⵏⵓⴼⴰ ⵓⵎⵉ ⴷ ⵏⵕⵥⵎ ⵜⵉⵟⵟⴰⵡⵉⵏ ⵏⵏⵖ ⴷⵉ ⵜⵇⴱⵉⵍⵜ ⴰ (ⴳⴳⵉⵖ ⴰⴽⵉⴷⵙ ⴰⵎⵍⵇⵉ, ⵏⵃⴰⵔ ⴰ ⵎⴻⵎⵎⵉⵙ ⴰⴽⴷ ⴱⴰⴱⴰⵙ, ⴰⴷ ⵏⵔⴰⵃ ⵖⴰⵔ ⵉⵔⵓⵎⵉⵢⵏ…) ⴽⴰⵔⵉⵎ ⵡⴰⵔ ⵉⵣⵎⵎⴻⵎ ⴱⵓ ⵉⵖⵏⵏⵉⵊⵏ ⵏⵏⵙ ⴷ ⵎⴰⵏⴰⵢⴰ ⵉⴷ ⴰⵏⵖ ⵖⴰⵔ ⵉⵊⵊⵏ ⴰⴷ ⵏⵇⴰⴷⴰ ⵙⵎⴰⵄⵉⵍ ⵙⵓⵟⵟⵓ ⴳ ⵉⵍⵍⴰⵏ ⴷ ⵉⵊⵊ ⵣⴳ ⵉⵏⴰⵥⵓⵕⵏ ⵏⵉⵖ ⵉⵊⵊ ⵣⴳ ⵢⵏⵏⵉ ⵉⵜⵇⴰⵙⴰⵏ ⴰⵥⴰⵡⴰⵏ ⴷ ⵎⴰⵎⵎⴽ ⵉⵅⵙⵙ ⴰⴷ ⵢⵉⵍⵉ.

ⴽⴰⵔⵉⵎ ⵜⵓⵖⴰ ⵡⴰⵔ ⵉⵎⵉⵏ ⵓⵏⵖⵎⵉⵙ ⵏⵏⵙ, ⴰⵔ ⵎⴰⵏⵉ ⴳ ⵉⵙⵙⵏⵜⴰ ⵓⵏⵀⵣⵣⵉ ⵏ ⴰⵔⵔⵉⴼ ⵉⴼⴼⵖ ⴷ ⵅⵎⴰ ⴰⴷ ⵢⵉⵏⵉ ⴰⵡⴰⵍ ⵏⵏⵙ, ⵉⵖⵏⵏⵊ ⵅⴼ ⵉⵏⴽⵔⴰⴼ ⵉⵙⵔⵜⴰⵏⴻⵏ ⵉⵖⵏⵏⵊ ⵅⴼ ⵡⴰⴷⴷⴰⴷ ⴷⵉ ⵉⴷⴷⵔ ⴰⵔⵔⵉⴼ, ⵡⴰⵔ ⵉⵜⵉⵃⵍ ⵙ ⵓⵙⵡⵉⵣⵉ, ⵎⵔⵎⵉ ⵎⵎⴰ ⵉⵎⵙⴰⵔ ⵛⴰ ⴰⴷ ⵜⴰⴼⴷ ⴷ ⴰⵎⵣⵡⴰⵔⵓ ⵉⵖⵏⵏⵊ ⵅⴰⴼⵙ, ⵉⴳⴳⴰ ⵜⵉⵣⵎⵎⴰⵔ ⵏⵏⵙ ⴷⵉ ⵜⵎⵓⵔⵜ ⵏ ⵉⵔⵓⵎⵉⵢⵏ ⵅⵎⴰ ⴰⴷ ⵉⵙⵙⵉⵡⴹ ⴰⵖⵏⵏⵉⵊ ⴰⵔⵉⴼⵉ ⴳ ⵉⴽⵙⵉⵏ ⵜⴰⴱⵔⴰⵜ ⵏ ⴰⵔⵔⵉⴼ ⴷ ⵎⵉⵏ ⵉⵔⵣⵣⵓ ⵙ ⵜⵓⵜⵎⴰⵢⵜ ⵜⴰⵎⴰⵣⵉⵖⵜ ⴷ ⵜⴰⴼⵔⴰⵏⵙⵉⵙⵜ.
ⵖⴰⵔ ⵓⵎⴳⴳⴰⵔ, ⵏⵇⵇⴰⵔ ⵜⴰⵏⵎⵎⵉⵔⵜ ⵉ ⵏⵜⵜⴰ ⴷ ⵎⴰⵔⵔⴰ ⵉⵏⴰⵥⵓⵕⵏ ⴳ ⵉⵜⴳⴳⵏ ⵜⵉⵣⵎⵎⴰⵔ ⵏⵏⵙⵏ ⵅⵎⴰ ⴰⴷ ⵢⴰⵡⴹ ⵓⵖⵏⵏⵉⵊ ⴰⵔⵉⴼⵉ ⵡⴰⵅⵅⴰ ⵄⴰⴷ ⴰⵇⴰ ⵜ ⴷⴳ ⵓⴱⵔⵉⴷ ⵏ ⵓⵣⴷⴰⵢ ⵓ ⵏⵙⵙⵉⵜⵉⵎ ⴰⴷ ⴼⴼⵖⵏ ⵉⵖⵏⵏⵉⵊⵏ ⵏ ⴽⴰⵔⵉⵎ ⵖⴰⵔ ⵎⴰⵔⵔⴰ ⵡⴰⵢⴷⵓⴷ ⵅⵎⴰ ⴰⴷ ⴰⵔⵔⵏ ⵎⵣⵔⵉ ⵉ ⵉⵛⵜ ⵏ ⵜⵥⵓⵕⵉ ⴳ ⵉⵍⵍⴰⵏ ⴷ ⴰⴼⴰⵔⵙ ⵏ ⵜⵇⴱⵉⵍⵜ ⵏ ⴰⵢⵜ ⵜⵜⵓⵣⵉⵏ.

* ⴰⵙⵍⵎⴰⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ

شاهد أيضاً

جولات ثقافية برحاب تاريخ الريف الشرقي (1973- 2019)

ترمي التجربة التي سأستعرض أهم صورها ونتائجها إلى الإيمان بجعل التنمية الثقافة التاريخية الجهوية خطوة ...

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *